جزم مريحة للفرح اختاري الجزمة اللي هتناسبك منهم

جزم مريحة للفرح ده لازم يكون أول حاجة بتفكري فيها وانت بتشتري الجزمة اللي هتلبسيها يوم فرحك.

مش كفاية إنها تكون جزمة شيك ولايقة على الفستان وشكلها هيبقى حلو في الصور.

الأهم من ده كله إنها تكون مريحة لرجلك.

أكيد مش هتبقي حابة إنك آخر اليوم تروحي مع عريسك ورجلك وجعاكي ومتعورة ومش قادرة تمشي عليها!

غالباً انت هتقضي اليوم كله بترقصي مع عريسك، أو حتى بتتمشي معاه في القاعة وبتسلموا على المعازيم.

فلو الجزمة مكنتش مريحة خلال الفترة دي كلها؛ فأكيد علامات عدم الراحة دي هتبدأ تظهر على وشك.

ومش هتقدري تستمتعي بيومك المميز زي ما كنت بتتمني.

ومين قال إن جزمة العروسة لازم تكون جزمة بيضة ضيقة بكعب كبير ميخليهاش تعرف تمشي فيه؟

في أنواع كتير للجزم غير النوع التقليدي ده ممكن يبقى مريح ليكي أكتر.

وفي نفس الوقت يكون لايق على الفستان وجو الفرح.

وعلشان كدة احنا في المقال ده جمعنا لك أهم أنواع جزم مريحة للفرح تقدري تختاري منها اللي يناسبك ليوم فرحك ويليق على فستانك.

فتابعي معانا.

صنادل بخرز ذهبي:

لو فستانك سيمبل وفرحك في بالنهار في مكان مفتوح خصوصاً لو على الشط؛ فهيبقى مناسب ليكي انك تختاري النوع ده من الصنادل.

صندل بسيط وخفيف مفيهوش زخرفة كتير بس شريط بسيط من الخرز على أول رجلك يضيف لك أناقة بمنتهى البساطة.

جزم مريحة للفرح بسيطة:

مش لازم جزمة الفرح تكون بكعب عالي ممكن جزمة بسيطة بكعب صغير تبقى أشيك بكتير.

الجزم الشيفون:

برضه مين قال إن جزمة الفرح لازم تكون جلد خشن تقيل يجرح رجلك وانت بتتحركي فيه؟ مفيش أي كتاب قواعد بيقول الكلام ده!

وعشان كدة احنا هنا بنقترح عليكي إنك ممكن تختاري جزمة فرحك تكون جزمة كلاسيك جسمها من الشيفون.

وفي الحالة دي ممكن تبقى متزينة بفصوص من الخرز يضيف لها أناقة وتبقى أليق على جو الفرح.

ومش لازم تكون بيضا على فكرة، ممكن تبقى سودة مزينة بخرز أبيض.

أو لو مصممة انها تكون بيضا ممكن تعكسيها والخرز يبقى هو الإسود.

وميزة النوع ده من الجزم إنه هيبقى مناسب كمان لو حبيتي تخرجي بيه بعد كدة وتحضري أي مناسبة أو سهرة برة البيت مش بس هتلبسيها في فرحك وتركنيها.

كوتشي الفرح:

تقريباً أول مرة ظهر فيها الموضوع ده كان في فيلم father of the bride سنة 1991.

ساعتها البطلة لبست كوتشي في فرحها، وحتى بالنسبة لصناع الفيلم وقتها كان الأمر غريب.

والبطلة نفسها قالت انها كانت مترددة تعمل ده في فرحها الحقيقي.

لكن دلوقتي الموضوع بقى موضة جداً ومنتشر سواء برة أو عندنا.

فلو مبتحبيش الجزم سواء جزم الباليه المسطحة أو الجزم اللي بكعب.

فأعتقد إن هيكون من الأفضل ليكي انك تختاري الكوتشي كنوع جزم مريحة للفرح بالنسبة لك.

وفي الحادة دي طبعاً مش هيبقى أي كوتشي والسلام.

لكن كوتشي الفرح عادة بيكون أبيض ورباطه من الدانتيل، ويكون مزين بخرز لامع على الجانبين.

جزم مريحة للفرح براس مدبب:

لو عايزة تحتفظي بالمظهر الكلاسيكي لجزمة الفرح بتاعتك لكن في نفس الوقت انت مبترتاحيش في الكعب العالي ومش بتعرفي تمشي فيه.

فاحنا هنا ممكن نرشح لك النوع ده من الجزم، مظهرها الكلاسيكي الشيك هيبقى بديل مناسب لجزم الأفراح التقليدية.

وكمان تقدري تنوع في اختيارك لألوانها فاللون الفضي هيبقى بديل مناسب للون الأبيض.

أو ممكن كمان تختاري انها تكون بلون دهبي.

جزم بكعب إسفيني:

أما لو انت مصرة على انك تختاري في فرحك حزمة بكعب، سواء لإنك بتحبي المظهر التقليدي ده أو لإن عريسك طويل وانت عايزة تظهري بطول مقارب ليه.

ففي الحالة دي ممكن نرشح لك جزم بكعب إسفيني.

الكعب ده بيكون عريض وده بيسمح لك بقدر أكبر من الراحة فيه وانت بتتحركي من الكعب المسمار الرفيع.

وفي الحالة دي انت بتختاري درجات الألوان الأبيض أو العاجي أو البيج من الجزم دي عشان تبقى مناسبة لفستان فرحك.

كمان تقدري تختاري أنواع منها تكون مزينة بخرز من الكريستال مثلاً أو شرايط الدانتيل عشان تديكي الإستايل اللي حابة تظهري بيه في فرحك.

وبكدة نكون وصلنا لنهاية مقالنا، نتمنى نكون قدمنا لك أفكار تقدر تساعدك في اختيار جزم مريحة للفرح ونكون قدرنا نخفف عنك حاجة من ضغوط اليوم الكبير ده، وألف مبروك مقدماً.