جزم صحاب العروسة إزاي يختاروها لليوم ده؟

جزم صحاب العروسة من الحاجات المهمة لمظهرهم في الفرح، سهل إنكم تتفقوا كلكم على استايل فستان معين أو لونه.

لكن هتفضل الجزم مختلفة من واحدة للتانية ومحيرة في اختيارها.

ففي نفس الوقت اللي هيكون مهم ليكم انكم تختاروا الجزم مريحة في الحركة، إلا إنكم برضه لازم تهتموا باختيار شياكتها.

وإنها تكون مناسبة للفستان وطبيعة الفرح وأجواءه وستايل القاعة ومكانها.

فطبعاً فرح في قاعة مقفولة هتبقى طبيعة الجزم اللي هتلبسوها فيه غير فرح في مكان مفتوح.

زي إنه يكون في حديقة أو على شط النيل أو البحر مثلاً، وبرضه الموضوع هيختلف ما إذا كان الفرح في الصيف ولا في الشتا.

محتاجة تسيبي رجلك حرة ومنطلقة، ولا محتاجة تدفيها عشان متبرديش وتقدري تتحركي براحتك في الفرح.

وعشان كدة احنا هنا في المقال ده جمعنا لكم أفكار مختلفة تساعدكم في اختيار الجزم اللي هتلبسوها في فرح صاحبتكم وتحافظوا بيها على أناقتكم وشياكتكم.

وفي نفس الوقت تكون مريحة وعملية؛ فتابعوا معانا المقال.

أحذية الشتا البارد:

بما إننا دخلنا في فصل الشتا خلاص، والجو بدأ يتلج.

فحبينا نبدأ المقال أول حاجة مع جزم صحاب العروسة في الشتا، أكيد كلكم داخلين على موسم أفراح أجازة نص السنة دلوقتي.

ومحتارين في اختيار الجزم اللي هتلبسوها وتكون مدفية رجلكم وفي نفس الوقت شيك وأنيقة مع الفستان.

وميزة الشتا إن غالباً الأفراح في الفترة دي بتتعمل في قاعات مقفولة، وده هيخلي خياراتكم مفتوحة في اختيار الجزم.

وكمان هيساعدكم لو كنتم بتحبوا الجزم المفتوحة في إنكم تقدروا تختاروا أنواع منها لو ضامنين حركتكم في المكان.

وانكم مش هتضطروا تخرجوا في الجو البارد وهتتنقلوا من أماكنكم للفرح في عربيات مقفولة ودافية.

وأكتر أنواع الجزم المناسبة في الموسم ده هي الجزم اللي من الجلد أو القطيفة أو الستان.

وطبعاً أكتر الألوان المناسبة مع أي فستان وأي أجواء مختلفة للفرح هو اللون الأسود.

ولو حابين تتأكدوا من الدفا أكتر فتقدروا تختاروا أحذية بنعل مبطن داخلي تديكم الدفا اللي محتاجينه طول وقت الفرح.

بوط بدل الجزم:

احنا لسة في الشتا ومحتاجين دفا أكتر؛ فمين قال إننا لازم نختار جزم صحاب العروسة من الجزم الرقيقة البسيطة بس؟!

لا احنا نقدر نختار كمان أنواع مختلفة تانية زي إننا نلبس بوط أو هاف بوت مع الفساتين؛ فيضيف لها شياكة وأناقة أكتر.

وفي الحالة دي غير إننا نقدر نحتفظ بشياكة اللون الأسود إلا إننا نقدر كمان نضيف أشكال مختلفة لشياكة البوط.

فنقدر نختار ألوان تانية زي البيج والبني والفضي، وكمان نقدر نختاره بأشكال مختلفة زي إنه يكون منقوش بألوان البيج والبني ودرجاتهم المختلفة؛ فيبان وكإنه جلد تعبان.

جزم صحاب العروسة في الصيف:

أما لو هتحضروا لفرح في الصيف؛ فبكدة هتقدروا تختاروا الجزم المفتوحة براحتكم، ومن أكتر الألوان اللي بتكون مناسبة في الصيف هي ألوان البيج بدرجاته المختلفة.

وطبعاً لما هتختاروا جزم من الستان؛ فدي هتكون مناسبة جداً لأجواء الفرح وشياكة الفستان.

الجزم المسطحة:

مين قال إن جزم صحاب العروسة لازم تكون ضيقة وبكعب عالي ميقدروش يمشوا فيها براحتهم؟

لو كان ده مش ذوقكم ومبتقدروش تتحركوا براحتكم في الجزم العالية بكعب؛ فتقدروا تختاروا تلبسوا أحذية مسطحة فلات عادي.

فيه منها أشكال كتير شيك تناسب أناقة فساتينكم وأجواء الفرح، وفي نفس الوقت تقدروا تتحركوا بيها براحتكم وترقصوا طول الليل من غير ما تشيلوا هم.

كمان من مزايا النوع ده من الجزم إنها عادة بتكون مقفولة، وده معناه إنها هتكون مناسبة جداً في أوقات الشتا؛ لإنها هتدفي رجلكم طول الليل.

وفيه منها مثلاً أحذية الباليه اللي بتكون مسطحة وفي نفس الوقت شيك وبراس مدببة وفيونكة تزينها؛ فهتضيف كتير لشياكة فساتنكم.

الصنادل جزم صحاب العروسة:

دلوقتي الصنادل بقى فيها أشكال وألوان مختلفة أشيك كتير من الجزم العادية، وتقدروا تختاروا منها براحتكم اللي يتناسب مع ستايل فساتينكم.

وسواء كنتم بتميلوا انكم تلبسوا الجزم بكعب عالي أو من غير هتلاقوا اللي انتم عايزينه في الصنادل.

وحتى في خاماتها هتلاقوا خامات مختلفة مش بس الجلد بألوانه التقليدية، لكن كمان هتلاقوا صنادل من القماش.

وبكدة تقدروا تختاروا ألوان مختلفة عادة مبتكونش متوافرة في الجزم العادية، زي إنكم تختاروا صنادل من القماش باللون الوردي مثلاً.

وبكدة نكون قدمنا لكم أفكار مختلفة تساعدكم في اختيار جزم صحاب العروسة المناسبة ليكم ولأذواقكم المختلفة.

نتمنى إن المقال كان مفيد ليكم وقدرنا نساعدكم في المهمة دي، ونتمنى لكم فرح سعيد وعقبالكم كلكم.