تمارين شد الجسم قبل الزواج

قبل الجواز كل واحد مننا بيفكر إزاي يظهر بأفضل شكل ليه قدام شريك حياته. ولأن شكل الجسم من اهم الحاجات ال بتشغلنا في الوقت ده، تعالوا نشوف أفضل تمارين شد الجسم قبل الزواج للشباب والبنات.

كيف أشد جسمي في أسرع وقت

الجسم المشدود بيكون نتيجة شغل شهور، ولكن اقدر اقولك اهم النصائح ال تساعدك في شد الجسم في أسرع وقت:

• شرب كمية كويسة من المياه في اليوم لا تقل عن 3 لتر. الماية بتساعد على زيادة الحرق، وبتعطي الترطيب ال الجسم محتاجه، وكمان بتحسن من شكل الجلد.
• اعتماد رجيم صحي لإنقاص الوزن.
• في حالة جسمك مش مليان لكن مترهل، ركز على اتباع نظام غذائي صحي قليل السكريات، كتير الفيتامينات.

• اعتمد في النظام الغذائي على الدهون الصحية الموجودة في الأسماك الدهنية زي السلامون والتونة. وكمان الدهون الموجودة في المكسرات بأنواعها.
• ركز على البروتين في نظامك الغذائي علشان تساعد الجسم على بناء عضلات.
• ممارسة التمارين الرياضية بانتظام كارديو ومقاومة على الأقل 3 ايام في الأسبوع. ونعرف ايه هي التمارين المناسبة لجسم مشدود في السطور الجاية.

أفضل تمارين لشد الجسم في البيت

علشان تعيش بطريقة صحية وجسم مشدود، مش محتاج تروح الجيم باشتراك، ولا تدفع مبالغ عند اخصائيين التغذية. كل ال عليك إن يكون عندك ارادة وتستمر في التمارين وتحافظ على النصايح ال قولتها فوق.

تعالى ندخل في الموضوع وأقولك إيه هي أفضل التمارين دي وال هنقسمها لتمارين كارديو، وتمارين مقاومة. تعالى نعرف الفرق بينهم وأفضلهم:

تمارين كارديو لشد الجسم

تمارين الكارديو هي تمارين هوائية يعني بتعملها في الهوا، بتساعد على تقوية عضلة القلب، وتنظيم التنفس، وكمان بتساعد على زيادة حرق السعرات الحرارية.

والتمارين دي زي السباحة، والجري والهرولة والمشي على المشاية أو في الشارع، والتمارين التانية ال هنعرفها دلوقت بالصور:

• نط الحبل من التمارين الهوائية ال ممكن تساعدك في ضبط شكل جسمك. كمان ممكن نستغنى عن المشي نص ساعة ب10 دقايق من نط الحبل.
• المشي السريع يوميا نص ساعة بيساعد على زيادة الحرق وشد الجسم. والمشي السريع أفضل من الجري. تقدر تمشي في البيت أو في الشارع عادي.

• ركوب الدراجة، من افضل التمارين الهوائية لأنه بيساعد على تقوية عضلة القلب، وكمان عضلات الساقين والذراعين.
• السباحة لو فيه مكان تمارس فيه السباحة هيكون ممتاز، لأنها بتساعد على التوازن، وتنظيم النفس، وتقوية عضلات البطن، ومن تمارين شد الجسم المميزة.
• تمرين jumping jacks وهو من تمارين الكارديو ال بتساعد في حركة الجسم والعضلات وبالتالي شد الجسم.

تمارين المقاومة لشد الجسم في المنزل

خلينا متفقين ان علشان توصل لجسم مشدود ووزن كويس يرضيك، لازم تشتغل على 3 حاجات: نظام غذائي صحي، وتمارين كارديو، وتمارين مقاومة ودي ال بتساعد بنسبة كبيرة في شد الجسم وبناء العضلات.

وتمارين المقاومة هي تمارين بالوزن، يعني تشيل أوزان. وممكن نستغنى عنها في البداية ونشتغل على وزن الجسم. وواحدة واحدة نشيل اي وزن زي ازازة الماية، تعالوا نشوف إيه هي تمارين المقاومة الأفضل لشد الجسم:

• تمارين الاسكواتس squats، أو تمرين القرفصاء. يعني تقف وتنزل قرفصاء 10 عدات في 3 مجموعات. ممكن نعتمد على وزن الجسم في التمرين ده، ولو محترف امسك وزن في ايدك.
• تمرين بلانك، من أقوى تمارين شد الجسم بالكامل، وبيعتمد على وزن الجسم.
• تمرين الضغط وله أشكال كتير تتناسب مع المبتدئين والمحترفين.
• تمارين رفع الساق بالعكس مع الإيد لشد البطن والأجناب.

في الآخر لازم تمزج بين التمارين الهوائية والمقاومة لجسم مشدود وعضلات قوية، مع نظام حياة صحي. والنوم لمدة 8 ساعات متواصلة في الليل.