تلفزيون أوضة النوم… أفكار لدمجه في الديكور

أكيد مفيش أحسن من إنكم تمددوا في السرير بعد يوم طويل ومرهق تتفرجوا مع بعض على فيلمكم أو مسلسلكم المفضل أو تتابعوا برامج التلفزيون المفضلة عندكم، وعشان كدة أكيد قررتم تحطوا تلفزيون أوضة النوم في عشكم الجديد.

وده معناه ان التلفزيون بقى جزء أساسي من أوضة نومكم.

وبالتالي لازم توفروا له مكان في تصميم الأوضة والديكور الخاص بيها.

وعشان كدة احنا هنا في المقال ده هنحاول نقترح عليكم شوية أفكار.

واللي تقدروا تستخدموها في دمج التلفزيون في ديكور أوضة نومكم.

وتقدروا تختاروا من الأفكار دي اللي يتناسب مع تصميم الديكور اللي اختارتوه ومساحة أوضتكم؛ فتابعوا معانا المقال.

في الدريسينج روم:

لو أوضة نومكم مصممة بحيث يكون فيها دريسينج روم مساحتها مناسبة؛ فهتقدروا تحطوا تلفزيون أوضة النوم فيها.

وده بانكم تقدروا تستغلوا المساحة المجاورة للدولاب في انكم تحطوا فيها ترابيزة بأدراج صغيرة تنفع لتخزين قطع الملابس الصغيرة والاكسسوارات.

وكمان تستغلوا سطحها في انكم تحطوا عليه التلفزيون، وبكدة تقدروا تستمتعوا بمتابعة برامجكم المفضلة وانتم في الأوضة.

وده في خلال أي وقت من اليوم حتى لو كنتم بتغيروا هدومكم وبتستعدوا لبداية يوم جديد في الشغل.

أو قبل ما تنزلوا لأي خروجة خلال اليوم، أو حتى وانتم راجعين تعبانيين بعد يوم طويل وبتغيروا هدومكم عشان تناموا وترتاحوا.

تلفزيون أوضة النوم على الحيطة قدام السرير:

أما لو مفيش مساحة كافية في الأوضة؛ فتقدروا تستغلوا حتى الحيطان، ويبقى التلفزيون جزء من ديكور الحيطة.

وده بانكم تحطوا الشاشة على الحيطة المقابلة للسرير، وبكدة هتقدروا تستمتعوا بالفرجة على التلفزيون وانتم مرتاحين في السرير.

ولو كنتم من الناس اللي بيحبوا يناموا على صوت التلفزيون وهم بيتفرجوا عليه؛ فده هيبقى موقع مثالي جداً ليكم.

وحتى لو مفيش مساحة كافية قدام السرير؛ فتقدروا برضه تستغلوا الحيط الجانبي للسرير.

خصوصاً مع الشاشات الحديثة اللي بتتمتع بانسيابية في تكوينها.

وده هيخليكم قادرين تشوفوها كويس من غير ما تكونوا مضطرين تلووا جسمكم أو تقعدوا على طرف السرير عشان تعرفوا تتفرجوا على التلفزيون.

استخدامه في تقسيم الأوضة:

لو أوضتكم واسعة وعاملين فيها جزء للقعاد مشابه لأوضة المعيشة أو جزء مكتبي للشغل؛ فتقدروا تستغلوا تلفزيون أوضة النوم في انه يكون ديكور يفصل الجزئين عن بعض.

وده بإنكم تجيبوا ترابيزة للتلفزيون طويلة تتحط في الجزء الفاصل بين الناحيتين وعليها التلفزيون.

وفي الحالة دي تقدروا تختاروا اتجاه الشاشة للناحية اللي انتم هتحبوا تتفرجوا فيها، هل هتكون وانتم ممدين على السرير فتكون الشاشة باصة للسرير؟

ولا هتحبوا تتفرجوا وانتم قاعدين في جزء الليفينج فتكون الشاشة باصة ناحيتها؟

تلفزيون أوضة النوم صغير في الحجم:

أما في حالات صغر الأوضة وإن مفيش مكان يساع شاشات كبيرة على الحيطان؛ فتقدروا تكتفوا بشاشة صغيرة تحطوها على ترابيزة صغيرة في ركن صغير من الأوضة.

ودي فكرة هتناسب حكم الأوضة لإنها مش هتاخد مساحة كبيرة، وممكن كمان تحطوا الشاشة دي على الكومدينو لو مفيش مكان لترابيزة تانية.

تعليق التلفزيون من السقف:

ودي برضه فكرة مناسبة للأوض الصغيرة اللي مفيهاش مساحة، وكمان فكرة مميزة وهتبقى مختلفة محدش كتير عملها قبل كدة.

وتقدروا من خلالها إنكم تعلقوا التلفزيون في حامل نازل من السقف، وأنسب مكان ليه هيكون في منطقة السرير.

وده عشان تقدروا تتفرجوا عليه براحتكم وانتم ممدين على السرير خصوصاً إن دي الوضعية الأنسب اللي هتخليكم قادرين تشوفوا التلفزيون كويس من غير ما تعوجوا راسكم.

وبكدة نكون قدمنا لكم أفكار مختلفة لدمج تلفزيون أوضة النوم في الديكور واستغلال أي مساحة متاحة ليه.

فنتمنى إننا نكون فدناكم وتكون أفكارنا دي متاحة للاستخدام بالنسبة لكم وتخليكم مرتاحين في عشكم الجديد، وألف مبروك عليكم.