تكاليف الزواج في مصر 2024

تكاليف الزواج في مصر 2024، تخطت كل حدود العقل والمنطق، بسبب ارتفاع الأسعار. وطبعًا بيقابل شباب الطبقة المتوسطة معضلة كبيرة قدام حلم الزواج وتكوين أسرة. والأمر بيزيد صعوبة للشباب اللي بيعتمدوا على نفسهم، وبيتحملوا كل تكاليف زواجهم من الألف إلى الياء، من غير مساعدة الأهل.

الأمر مش بس بقى صعب على العريس، لكن كمان على أهل العروسة، اللي بيتحملوا فوق طاقتهم علشان يجهزوا بنتهم. واللي غالبًا بيبيعوا أصول معينة زي قطعة أرض، دا غير إن البعض بيلجأ لموضوع القروض.  

السبب المباشر طبعًا الأزمة الاقتصادية المحلية والعالمية اللي أثرت على الاقتصاد المصري بشكل كبير. ومع كل يوم بيتراجع الجنيه المصري قدام الدولار، بتزيد الأزمة أكثر والأسعار بتطير في السماء. وطبعًا دا بينعكس على تكاليف الزواج في مصر، اللي كل يوم حرفيًا بتزيد عن اليوم اللي قبله.

من يتحمل تكاليف الزواج في مصر؟

تكاليف الزواج في مصر اليوم، بتتقسم بين العريس والعروسة. ودا طبعًا عكس عادة زمان، لما كان العريس وأهله بيدفعوا مهر لأهل العروسة. وبيتم استخدامه في شراء كل شيء من دهب لغرف النوم للصالون والسفرة وحتى ملابس العروسة ومتعلقاتها الشخصية وأدوات المطبخ والأجهزة الكهربائية.

اليوم الوضع اختلف، وبقى العريس بيتحمل الشبكة وتجهيز الشقة وشراء كل الغرف. والعروسة بتتحمل الملابس والمفروشات وأدوات المطبخ والأجهزة الكهربائية. كمان الوضع بيختلف حسب المحافظات والمستوى الاجتماعي.

تكاليف الزواج في مصر 2024

تعالوا بقى نعمل إحصائية بتكاليف الزواج في مصر اليوم 2024. ونشوف التكلفة ممكن توصل فين، ودي قائمة بالمستلزمات المطلوبة:

الشبكة

 بتكون عبارة عن هدية ذهب أو ألماس، حسب مستوى العريس المادي. ولو بصينا على أغلب المحافظات المصرية والطبقة المتوسطة، فهنلاقي إن الموضوع بيتراوح بين 50 ألف لـ 100 ألف جنيه مصري. ودا طبعًا بسبب غلاء سعر الدهب ووصوله لمعدلات جنونية، نتيجة الوضع الاقتصادي المحلي والعالمي.

المهر

 تقريبًا شبه انتهى من سنين طويلة، ومع ذلك لسه في محافظات وقرى مصرية متمسكة به. وهو عبارة عن مبلغ من المال بيقدمه العريس لأهل العروسة. والمبلغ بيختلف حسب الشائع في المنطقة ومستوى العروسة الاجتماعي والمادي. وغالبًا بيتراوح بين 20 ألف لـ 50 ألف.

الخطوبة: تكاليف الخطوبة تختلف حسب المكان الاحتفال، في البيت ولا في قاعة، والقاعة متوسطة ولا عالية. لكن في كل الأحوال الموضوع ممكن يوصل لـ 30 ألف بالنسبة للطبقة المتوسطة. لكن الطبقات الأعلى التكلفة مفتوحة طبعًا. كمان غالبًا حفلة الخطوبة بتكون على أهل العروسة، والعريس بيتحمل بس تكلفة الفستان والمكياج.

شقة الزوجية

 أسعار الشقق بقت نار في كل محافظات مصر، سواء في المجمعات السكنية الفاخرة، أو حتى في الأحياء المتوسطة والعادية. فلو العريس هيشتري شقة في كمبوند في زايد أو 6 أكتوبر، فأكيد بنتكلم في ملايين. كمان مدينة نصر ومصر الجديدة والزمالك والمعادي، الأسعار فيها بقت غير مناسبة للطبقة المتوسطة.

لو هننزل بالمستوى شوية ونروح للمحافظات، فالسعر بيختلف بين المدن والريف. في المدن أصبح الأمر جنوني، ووصل سعر شقة 100 متر في مكان حيوي ما بين مليون لمليون ونص. وفي بعض الأماكن بتكون الشقق أقل، يعني ممكن نلاقي شقة بـ 700 ألف، بمساحة صغيرة.

في الأرياف كان الموضوع سهل، وبيكون للعريس شقة في بيت العيلة، والأب بيبني له دور فوقه خاص به. وعادة كانت تكلفة الشقة من البناء للتشطيب متوسطة وفي المتناول. لكن اليوم الموضوع بقى صعب، بعد قرار الحكومة وقف البناء، وكمان غلاء أسعار مواد البناء نفسها.

الملخص، إن مرحلة الحصول على شقة حلم صعب وعقبة قدام شباب كتير، ممكن بسببها يتخطوا 35 سنة بدون زواج. والأغلب بقى بيتجه للإيجار اللي كمان بقت أسعاره نار.

الأثاث والفرش

 بعد مرحلة الحصول على شقة، بندخل على عقبة جديدة وهي مرحلة الفرش واللي بتضمن الآتي:

الغرف: وبتشمل غرفة النوم، الصالون، السفرة، أنتريه، غرفة أطفال. وفي بعض الأماكن بتتقسم الغرف بين أهل العروسة والعريس.

الفرش: وبيشمل السجاد، الستاير، النجف. وعادة بيتقسم بين العريس والعروسة.

الأجهزة الكهربائية: في المدن بيتحمل العريس جزء الأجهزة الكهربائية، عكس الريف. وطبعًا لو بصينا على أسعار الأجهزة النهاردة فالموضوع بقى مرهق وفوق طاقة الشباب. وغالبًا يحتاج البند دا لـ 100 ألف على الأقل.

الفرح

ودي مرحلة الوصول ليها بقى إنجاز عظيم بجد. لكن كمان محتاج ميزانية كبيرة لوحده، علشان تغطي كل تكاليف مستلزمات الفرح، واللي بتضمن:

حجز القاعة: بيتراوح حجز القاعات ما بين 20 ألف لـ 100 ألف غالبًا. وبيختلف السعر حسب الفئة والمكان، هل قاعة عادية أم قاعة في فندق. ونضيف على حجز القاعة كروت الدعوة، ضيافة المعازيم، تورتة الفرح، فيديو جرافر، وفوتوغرافر.

تجهيزات العروسة: بتشمل مستلزمات العروسة ( الفستان، الإكسسوارات، الميك اب ). والتكلفة بقى بترجع لطلبات العروسة ورغباتها، اللي بتتراوح بين المنخفضة والمتوسطة والعالية. يعني ممكن تطلب ميك اب ارتيست سعره عالي، أو فستان من ديزاينر معين. وممكن تكون بسيطة وتمشي الأمور مع العريس.

تجهيزات العريس: غالبًا بيكون أصلًا ملهوش طلبات، وممكن يدخل الفرح ببدلة واحد صاحبه عادي. لكن عادة بيكون محتاج بدلة وجزمة، وشوية ملابس علشان عريس جديد وكدا. 

شهر العسل

تفتكروا الموضوع خلص بعد كل اللي فوق دا، لا طبعًا. في بقى قصة شهر العسل، واختيار وجهة سياحية مناسبة للعرسان، وتفاصيل اختيار الفندق والأنشطة. طبعًا الطبقة المتوسطة ممكن يلغوا موضوع شهر العسل خالص لأجل غير مسمى ولحين تعافي الحالة الاقتصادية. وأغلب اللي بيروحوا شهر عسل بيكون داخل مصر ( شرم الشيخ، الغردقة، دهب، سهل حشيش، الجونة، سيوة، الأقصر وأسوان ). واللي بيكون لسه فاضل معاهم فلوس بيسافروا لتركيا، لبنان، دول أوروبا الشرقية، وجنوب أفريقيا.

تكاليف الزواج في الصعيد

محافظات الصعيد مشهورة بالمغالاة في المهر والشبكة وتكاليف الزواج. وطبعًا بيختلف الموضوع حسب مستوى العائلات. وغالبًا يتشابه الصعيد مع أرياف وجه بحري في قصة تكاليف الفرح، اللي حرفيًا بتقسم ضهر العريس وأهل العروسة. والأمر بيوصل لمرحلة التباهي بين العائلات، وبيتم ربطه بالتقدير، وكل ما غلا المهر والمصاريف على العريس كل ما كان في تعزيز لمكانة العروسة.

أقل تكاليف الزواج في مصر 2024

الموضوع بيختلف حسب الشقة، هل متوفرة أم لا. وفي حالة كان العريس بيبدأ من الصفر، فغالبًا في الوضع الحالي أقل تكلفة مليون جنيه. علشان يشتري شقة ويشطبها ويجهزها، ويشتري شبكة، ويتكفل بتجهيزات الفرح.

مبادرات لمواجهة المغالاة في الزواج

مع تصاعد تكاليف الزواج في مصر كل يوم عن اليوم اللي قبله بشكل جنوني، انطلقت مبادرات كثيرة للحد من الموضوع. فمثلًا الأزهر الشريف عقد مؤتمر رسمي تحت توجيهات فضيلة الإمام ، وأطلق مبادرة بعنوان ” لتسكنوا إليها“. الهدف منها مواجهة التكاليف الباهظة للزواج في محافظات مصر المختلفة. ومن الأشياء اللي تم اقتراحها، تلخيص مراسم الخطوبة في قراءة الفاتحة ودبلة بحضور المقربين فقط. وكمان التقليل من الهدايا المتبادلة بين المخطوبين، وعدم تطويل فترة الخطوبة. 

وفي بعض قرى الصعيد عمل أهلها نفس المبادرة واتفقوا بينهم على تحديد مهر معين ممنوع تخطيه. لكن طبعًا تبقى مجرد مبادرات، لأن التغيير لازم يبدأ من العقول نفسها اللي ورثت حب التباهي والتفاخر على مدى عصور.

إقرأ أيضًا: تجهيزات العروسة قبل الفرح بشهرين