تصميم مطبخ صغير للمساحات الضيقة هياخد كل أدوات المطبخ

مشكلة كبيرة بتواجه العريس والعروسة عند اختيار تصميم مطبخ صغير للمساحات الضيقة عشان بيكونوا محتاجين التصميم يكون عملي وأنيق في نفس الوقت. لإن المساحة المحدودة خاصة في المطابخ بتحتاج دقة في اختيار التصميم ودقة في اختيار خامة التصميم، وكمان توظيف كل جزء بشكل صحيح.

عشان كدا هنقولك على كل التفاصيل اللي تساعدك في اختيار تصميم مطبخ صغير يناسب المساحة الضيقة وتتحركي فيه براحتك.

أفضل تصميم مطبخ صغير للمساحات الضيقة

تصميم مطبخ شكل L

دا من أكثر التصاميم اللي هتناسب المساحة الضيقة، لإنه بياخد جانبين فقط من الحائط وبالتالي مش هيسبب مشكلة في الحركة أو يضغط على مساحة المطبخ. كمان هتقدري تنظمي باقي الأجهزة الكهربائية في الجوانب الباقية.

مطبخ مفتوح على الصالة

رغم إنه تصميم مش مناسب للشقق الصغيرة إلا إنك هتكوني مضطرة تعمليه عشان تدي لنفسك مساحة تتحركي في المطبخ، هيكون التصميم مفتوح بشكل جزئي، وفيه كراسي على الجزء الخارجي للأكل، فيبقى المطبخ ورغم مساحته الصغيرة استوعب المطبخ والسفرة.

مطابخ ممتدة للسقف

دا تصميم مطبخ صغير بيلجأ ليه المصممين مع المساحات الضيقة ومفيش إمكانية لفتحه على الصالة. الحل بيكون خزائن المطبخ في حائط واحد ولكن مرتفعة للسقف، عشان تقدري تنظمي فيها أدوات المطبخ براحتك.

 الأجهزة الكهربائية المدمجة

ودا حل عملي جدًا للمطابخ الصغيرة إن الأجهزة الكهربائية تبقى مدمجة في تصميم المطبخ. زي الفرن والبوتجاز والميكروويف. كدا بتوفري مساحة كبيرة وفي نفس الوقت كل احتياجاتك موجودة

أنسب خامات لـ تصميم مطبخ صغير

هل الخامة ليها دور في المطبخ واتساعه؟؟ طبعًا ليها دور لإن في خامات بيكون سُمكها عريض وبتاخد حيز كبير مقارنة بالخامات الرفيعة. وطبعًا قابلية الخامة للألوان بحيث تقدري تختاري لون يتناسب مع المساحات الضيقة.

• الخشب المعالج: خامة مثالية جدًا لـ تصميم مطبخ صغير بلون فاتح يحسسك باتساع المساحة. هيكون بسُمك رفيع وتقدري تختاري مقاس عرض المطبخ في حدود 40 سم أو أقل.
• الألوميتال: من الخامات اللي نقدر نختار فيها تصميم رفيع محدود ميأثرش على المساحة، ومع لون فاتح هيدكي شعور باتساع المساحة وهتحسي بالراحة وهتنسي إن المطبخ ضيق.
• واجهات مرايا: ممكن تضيفي على جزء من دولايب المطبخ مرايا عاكسة، دي بقى هتوسع في المساحة بشكل كبير جدًا. فمن ناحية هتقلل الشعور بإن المطبخ ضيق، ومن ناحية طبقتي تصميم مطبخ صغير وحديث جدًا في نفس الوقت.

إزاي تختاري تصميم مطبخ صغير يناسب ذوقك؟؟

جينا لأصعب جزء وهو اختيار التصميم نفسه عشان يتنفذ. وغالبًا دا بيكون أصعب من اختيار غرف النوم للعروسين، لإن دا مساحة خاصة بالعروسة أكثر، وهتقضي فيها وقت أطول، وهتحب يكون ليها نظام خاص فيه، عشان كدا هنساعدك تختاري تصميم مطبخ صغير يقضي كل احتياجاتك:

• اختاري لون فاتح: بداية كدا ليكي حرية اختيار اللون، لكن ركزي فقط على الألوان الفاتحة جدًا. زي الأبيض أو البيج أو درجات الباستيل، بحيث تكون النتيجة التأثير الإيجابي على مساحة المطبخ.
• اختاري إضاءة مباشرة: دايمًا الضوء البسيط بيعطي شعور بصِغَر المساحة، وطبعًا في المطبخ هتحتاجي توسعي في المساحة بقدر المستطاع، عشان كدا هتختاري إضافة مباشرة وقوية. كمان علقي شرايط LED تحت دولايب المطبخ أو في أماكن الدُلف الزجاج عشان توسع معاكي أكتر في المساحة.
• اختاري تصميم عملي: يعني بلاش تركزي في شكل جمالي أكثر من الشكل الوظيفي. خلي كل قطعة في دولايب المطبخ ليها وظيفة واستخدام معين، ودوري على تصاميم بتقدم حلول عملية للتخزين وأكيد مصمم المطبخ هيساعدك في النقطة دي.

منظمات عملية لترتيب المطبخ

ترتيب المطبخ الصغير لا يقل أهمية عن تصميمه، لإن الترتيب هيخلي المساحة الصغيرة تستوعب أكبر قدر من أدوات المطبخ، وتقدري تحققي دا من خلال المُنظمات دي:

• الأرفف على الجدران: هتشوفي الجدار اللي مش هتعملي فيه دولاب مطبخ، وفي نفس الوقت فاضي. هتعلقي عليه أرفف بس تكون مش عريضة، تستخدميها في تنظيم الكاسات، أو ديكورات، أو أدوات مطبخ.
• حوامل مغناطيسية: هتحاولي تدوري في كل مكان تروحيه على حوامل مغناطيسية. سواء كانت للسكاكين أو أغطية الحلل، أو لأدوات المطبخ، بحيث تتعلق على شريط معدني على الجدران أو داخل دواليب المطبخ.
• مُنظمات أدراج: حل عملي جدًا يوفر عليكي مساحة للمعالق والسكاكين أو أي حاجة معدنية، وكل رفايع المطبخ. وممكن تستخدميه لترتيب علب التوابل أو تخزين بقوليات عشان تكون قريبة من إيدك ومتاخدش مكان على رخامة المطبخ.

كل التفاصيل دي لو طبقتيها عند تصميم مطبخ صغير في مساحة ضيقة مش هتحسي أبدًا إن حركتك محدودة، وكمان هتلاقي مكان لكل أدوات المطبخ بدون ما يكون في زحمة تزعجك أو تأثر على شكل المطبخ.

اقرأ أيضًا: تجهيزات شهر العسل للعروسة.

اقرأ أيضًا: أماكن بيع الأثاث في مصر الأفضل والأضمن.