تصميم مساحات الترحيب في مدخل قاعة الفرح

تصميم مساحات الترحيب بضيوف الفرح في مدخل القاعة هو من الحاجات المهمة اللي بتدي أول انطباع للمعازيم وهم داخلين الفرح.

وعادة المساحة دي بتكون في مدخل القاعة عبارة عن ترابيزة عليها صورة للعريس والعروسة مع كلمة ترحيبية وأدوات زينة.

وده بالإضافة للويدينج بوك اللي المفروض المعازيم يكتبوا فيه أمنياتهم الطيبة للعريس والعروسة في بداية حياتهم الزوجية.

ونادر ما حد بيفكر في استغلال المساحة دي في إنها تكون بمظهر مميز مختلف عن المظهر التقليدي المعتاد يسيب أثر وانطباع ميتنسيش عند المعازيم والضيوف.

لكن احنا شايفين إن ده مكان مهم جداً بيبرز شخصية الفرح واختيارات العريس والعروسة من أول لحظة بيبدأ فيها.

وعشان كدة في المقال ده احنا هنحاول نقدم لكم أفكار مختلفة في تصميم مساحات الترحيب وايه الأدوات والفنيات اللي تقدروا تستخدموها فيها وترتبوها إزاي؟

فتابعوا معانا المقال.

مجموعة ترحيب بضيوف الفرح مع إطارات ذهبية:

بتتميز المجموعة دي بإنها عبارة عن إطار دهبي متقسم على تلات صفوف رأسية وأربعة أفقية يعني 12 مربع مع مشابك دهبية برضه.

وده يخليكم تعلقوا فيها أي رسايل ترحيبية حابين تحطوها للضيوف أو صور تذكارية ليكم مع بعض أو مع المقربين منكم.

وده غير لوحة تصميم مساحات الترحيب الأساسية اللي بتكون فيها جملة ترحيبية للضيوف مع صورتكم الرسمية مع بعض.

واللي تقدروا تختاروا انها تكون بتصميم بسيط تقليدي أو تصميم مقوس يشبه مداخل القصور التاريخية ويدي صورتكم عبق تاريخي وكلاسيكي من العصور القديمة.

وكمان تقدروا تضيفوا ليها براويز صور مدهبة صغيرة تحطوها على الترابيزة بشكل متفرق وجميل يضيف لزينتها.

ده غير الزهور الصناعية المعدنية أو زجاجية واللي ممكن يكون لونها دهبي برضه أو أزرق أو وردي عشان تتناسب مع بقية الألوان.

وكل ده على مفرش أبيض شفاف متزين بأضواء صفراء رقيقة وبسيطة.

تصميم مساحات الترحيب باللون الأبيض:

بطبيعة الحال اللون الأبيض هو أكتر الألوان المناسبة لأجواء الأفراح؛ فلإن فستان العروسة دايماً أبيض في العادة؛ فده بيسهل استخدام أي ديكورات بيضاء.

وده بينطبق برضه على مساحة ترحيبكم بضيوف فرحكم اللي تقدروا تختاروها هي كمان باللون الأبيض.

خصوصاً لو ده اللون الأساسي اللي قررتوا تستخدموا في تيمة فرحكم بشكل عام، وبرضه هيكون فيها اللوحة الأساسية للترحيب.

واللي ممكن تكون عبارة عن لوحة شفافة مكتوب عليها جملة ترحيبية بضيوفكم مع أساميكم وتاريخ يوم الفرح باللون الأبيض.

وده هيديها مظهر ولا أروع خصوصاً وهي بتعكس الإضاءة من حواليها، وجنب اللوحة الترحيبية ممكن تحطوا إطار كولاج لمجموعة صور ليكم مركبينها مع بعض.

الإطار ده ممكن يبقى عبارة عن حامل خشبي عليه إطارات تكفي أربع صور مثلاً، تقدروا تستغلوها في إنكم تحطوا صور تذكارية ليكم من فترة التحضير للفرح.

وجنب الإطار ده حطوا تلات براويز صور صغيرة بإطارات مختلفة تدي أشكال متنوعة تحطوا فيها صور ليكم من فوتوسيشن الفرح.

ده غير إنكم تقدروا تضيفوا ليهم خمس شموع بيضا بأشكال مختلفة توزعوها على الترابيزة عشان تدي مظهر رومانسي.

لكن طبعاً متولعوهاش عشان متولعش في الفرح كله وتحرقه، أو ممكن تستبدلوها بشموع كهربية لو عاوزين تستغلوا إضاءتها.

أما لو هتحتفظوا بيها كشموع طبيعية للزينة بس؛ فتقدروا تستخدموا أسلاك أضواء رفيعة للإضاءة تحطوها تحت مفرش الترابيزة الأبيض الشفاف.

ده غير إنكم تقدروا تستغلوا الشموع دي بعد كدة للزينة في بيتكم، وتحتفظوا بيها كذكرى جميلة من فرحكم.

رسوم كاريكاتورية ترحب بالضيوف:

زي ما قولنا فوق إنكم بتستخدموا صور بتحطوها في البراويز والإطارات الموجودة في تصميم مساحات الترحيب في مدخل قاعة الفرح.

بس الصور دي مش لازم تكون صور فوتوغرافية ليكم، أو على الأقل مش لازم كلها تكون صور فوتوغرافية.

تقدروا تستغلوا شوية منها في إنكم تضيفوا أجواء من الضحك والمرح بإنها تكون عبارة عن رسوم كاريكاتورية تعبر عنكم.

ولو بتعرفوا ترسموا؛ فممكن تصمموا الرسوم دي بنفسكم، وفي أفكار كتير ممكن تستغلوها في الرسوم دي.

زي إنها تكون رسمة لعريس شايل عروسته على كتفه وبيجري بيها، وكأنه بيخطفها ويهرب بيها من الفرح.

أو تكون رسمة لطيفة لاتنين في قعدة عشا رومانسي وهم بيتكلموا بحب مع بعض ونظراتهم لبعض فيها حب ورومانسية.

ده غير إن ممكن يتحط في تصميم مساحات الترحيب رسوم كاريكاتورية منفصلة لرجل العريس ورجل العروسة.

وتتبروز كل واحدة لوحدهم، ويتوزعوا بشكل لطيف على الترابيزة، وممكن يكونوا بالألوان أو بالأبيض وأسود.

في النهاية نتمنى إننا نكون قدمنا لكم أفكار مختلفة تقدر تساعدكم في تصميم مساحات الترحيب في مدخل قاعة الفرح.

وإنكم تنفذوا التصميمات دي بطريقة تظهر فرحكم بشكل مميز يخليه يعلم في ذكريات كل معازيمكم.

ونتمنى لكم فرح سعيد مليان ذكريات حلوة وبداية حياة زوجية مليانة حب ودفا وفرح بينكم.