تصميم غرف نوم ضيقة تساعد على الشعور بالاتساع

لو بتدور على أفكار تصميم غرف نوم ضيقة تناسب المساحات الصغيرة خاصة في المدن الجديدة هنساعدك تختار تصميم مناسب لاحتياجك ولمساحة الغرفة.

ولأن غرفة النوم بتحتاج اهتمام بكل التفاصيل عشان تكون مريحة وأنيقة هنحاول نساعدك على اختيار الألوان والأرضيات والأثاث المناسب، ونستعرض أفكار تساعدك على استغلال كل جزء في المساحة.

ملاحظات عند تصميم غرف نوم ضيقة

اختيار التصميم مش أول خطوة نبدأ بيها عند تجهيز المساحة، بالعكس في أمور كتير لازم نركز فيها عشان إعداد التصميم يتناسب مع حجم الغرفة واستخداماتها، عشان كدا ضروري نراعي الملاحظات الآتية:

أولًا: حجم أثاث مناسب

بما إن المساحة محدودة يبقى نركز في اختيار سرير حجمه محدود هيكون مناسب سرير 160 سم×200 سم. وكذلك نراعي حجم دولاب مناسب وتسريحة سُمكها رفيع.

ثانيًا: تنظيم المساحة

أهم حاجة اختصار مساحة الأثاث بتنظيمهم بشكل مثالي، ونشوف حلول التخزين المخفية زي أدراج السرير والأدارج الداخلية في الدولاب.

ثالثًا: تسهيل الحركة في الغرفة

نحاول قدر الإمكان الاكتفاء بأقل عدد قطع من الأثاث. نتجنب إضافة أي ترابيزات أو كراسي في الغرفة، وترتيب الأثاث بطريقة تسمح بسهولة الحركة.

طرق استغلال المساحات الضيقة في غرف النوم

هنا نحتاج عامل الإبداع والإبتكار، ممكن تستعين بمهندس ديكور أو تشوف نماذج كتير لاستغلال المساحات الضيقة.

يعني لو الغرفة شخصية ممكن تستخدم أثاث متعد الاستخدام زي الكنب اللي بيتفرد. أو لو عايز تضيف أرفف تضيفها في الأجزاء العلوية بحيث تحرر أكبر قدر من المساحة الأرضية.

ممكن تضيف وحدات تخزين فوق السرير بشكل ديكور. هيساعد تستغلها وتخزن فيها وفي نفس الوقت ديكور مميز.

تقدر تستغل الزوايا غير المستخدمة في الغرفة إنك تضيف مكتب أو ترابيزة قابلة للطي. داه يساعد يوفرلك مساحة تشتغل عليها وفي نفس الوقت تركنها تمامًا بعد الاستخدام.

ضروري تستخدم أبواب جرارة للدولاب، ولو ينفع تستخدم باب جرار للغرفة نفسها هيكون أفضل كتير، لإن دا هيوفرلك الحائط الجانبي للباب وتقدر تستغله في أي غرض تاني.

أفكار ديكورات غرف نوم ضيقة

عند اختيار تصميم غرفة نوم ضيقة هنحتاج نختار تصاميم مناسبة، تساعد في توسيع المساحة للعين عشان تبقى الغرفة مريحة قدر الإمكان، وتقدر تحقق دا ببعض الأفكار منها:

• استخدام مرايا كبيرة على أحد الحوائط في الغرفة. خاصة وإن الاحتياج لمرايا كبيرة بها إضاءة بقى ضرورة الفترة دي. لكن لازم تكون على الحائط نفسه. أو على الأقل تكون في زاوية غير مستخدمة في الغرفة عشان تساعد على انعكاس الإضاءة وتوسيع شكل الغرفة.
• لو هنستخدم ديكورات خشبية للحوائط يبقى ضروري تبقى أرفف معلقة لو محتاجين نضيف وحدات تخزين فوق السرير أو فوق التسريحة. يعني تكون أرفف مفتوحة مش مقفولة لإن المقفولة هتزيد من تقليل مساحة الغرفة.
• استخدام إضاءة مثبتة على الحائط بدل استخدام الإضاءة على الكومودينو أو الإضاءة الأرضية. بحيث نحاول تخفيف حجم الأغراض في الغرفة ودا يساعد على الشعور باتساع المساحة.

ألوان وأرضيات تناسب تصميم غرف نوم ضيقة

من أسس التصاميم للمساحات الضيقة استخدام الألوان الفاتحة. لأنها بتلعب دور أساسي في منح شعور باتساع المساحة. وبكدا تقدر تستخدم دراجات الأبيض، أو البيج، أو الرمادي الفاتح.

وطبعًا ندخل ألوان زاهية في أي ديكور من الديكورات الموجودة، بحيث نضيف أجواء بهجة للغرفة.

أما الأرضيات فلو هنستخدم أرضية خشبية تبقى بلون بيج فاتح جدًا. والأفضل للمساحات الضيقة السيراميك الفاتح، أو المنقوش نقوش طولية. دا هيساعد على توسيع الغرفة.

بالنسبة للسجاد أو مفروشات الأرضية نقدر نلون فيها بحيث تضيف جو بهجة ولطافة للغرفة. ولكن يكون حجمها صغير قدر الإمكان. لإن كلما ظهر جزء كبير من الأرضية كلما زاد الشعور باتساع المساحة.

وبتنفيذ كل اللي قولناه من أفكار تصميم غرف نوم ضيقة تقدر تستمتع بغرفة نوم مريحة وعملية جدًا.

اقرأ أيضًا: ديكورات شقق عرسان مودرن.

اقرأ أيضًا: موضة ألوان المطابخ.