تصرفات تزعج الرجل حاولي تتجنبيها في حياتك الزوجية الجديدة

ألف مبروك يا عروسة، خلاص هتبدأي حياتك الجديدة مع حبيبك، وأكيد بتخططي إنها تكون حياة مثالية سعيدة مفيهاش خناق ومشاكل، وعشان كدة أكيد مش هدفك خالص إنك تكوني سبب لأي تصرفات تزعج الرجل اللي بتحبيه واخترتيه يكون شريك حياتك.

مفيش أي ست في الدنيا في الحقيقة بتبقى عايزة تكون زوجة مزعجة.

كلنا أكيد بيبقى نفسنا إننا نكون هاديين وعايشين في علاقة مثالية، لكن للأسف العالم مش مكان مثالي ومفيهوش أي متسع للمثالية.

ولا الرجالة نفسهم كائنات مثالية بغض النظر عن مدى رغبتنا إنهم يكونوا كدة.

وده اللي بيخلينا في أوقات كتير نخرج عن شعورنا احنا كمان ونتصرف بأساليب غريبة.

لكن لو لاحظتي إنك بدأتي تتحولي للشخص ده، وإنك هتبدأي تكوني الزوجة المزعجة اللي بتزعج زوجها باستمرار.

وده بيخليه يهرب من وجوده معاها طول الوقت، وده خلاكي تبدأي تفكري ان دي مش انت، وانك مش حابة تكوني بالشكل ده.

فاحنا هنا عشان نساعدك، في المقال ده هنحاول نظهر لك إيه هي أكتر تصرفات تزعج الرجل اللي ممكن تحاولي تاخدي بالك منها وانت بتتعاملي مع شريك حياتك؛ فتابعي معانا المقال.

بطلي تقوليله يتصرف إزاي وإيه اللي لازم يعمله:

لو لاقيتي نفسك كل شوية بتقولي لشريك حياتك ايه اللي لازم يعمله أو ميعملوش في كل موقف من غير ما يكون هو اللي طلب رأيك؛ فياريت تبطلي فوراً تعملي ده، هو بالتأكيد إنسان بالغ وعاقل بما فيه الكفاية عشان يقدر يعرف لوحده ايه اللي يعمله أو ميعملوش.

وأكيد انت اخترتيه من بين كل الرجالة اللي في الدنيا عشان بتثقي فيه.

يبقى اثبتي الثقة دي وسيبيه يكتشف العالم بنفسه!

وده سواء كان الموضوع بيتعلق بالأمور المنزلية وترتيبه لحاجاته في البيت، أو مشاركته ليكي في شغل البيت وانه يختار معاكي هتاكلوا ايه مثلاً أو هتخرجوا فين أو أموره الشخصية المتعلقة بشغله وصحابه.

مفيش تصرفات تزعج الرجل أكتر من إنه يحس إن مراته مبتثقش فيه وفي اختياراته.

وبتتعامل معاه كإنه طفل صغير مش فاهم حاجة ومحتاج اللي يمشي وراه!

سيبيه يختار لنفسه اللي هو عايزه، ومتضيعيش وقتك في التفاصيل دي.

وبدل ده ركزي أكتر على نفسك وعلى اللي عايزة تعمليه في حياتك الشخصية ومستقبلك والخيارات اللي تخص حياتك.

انت مش والدته، ومش دورك انك تمشي وراه تاخدي بالك منه ومن كل خطوة بيخطيها.

سيبيه هو يجي لك بنفسه لما يحتاج رأيك في حاجة.

غيري أسلوبك لو كان فيه تصرفات تزعج الرجل:

أوقات بننسى اننا بشر وبنتصرف كإننا نملك الطرف التاني في العلاقة وده مش حقيقي.

جوزك مش ملكية خاصة بيكي ولا تحت تصرفك وطوع أمرك طول الوقت.

وعشان كدة لو حسيتي إنك بدأتي تتنرفزي من تصرفاته وتشتكي منها.

ففكري بس إنك تعيدي صياغة كلامك وتعبري عنه وتقدميه كطلب مؤدب بدل التذمر ولوي البوز.

تخيلي إن واحدة صاحبتك اللي عملت التصرف ده أكيد هتلوميها بهدوء أو هتطلبي منها بذوق وانت بتعبري لها عن إن التصرف ده ضايقك، بيتهيألي جوزك أو الرجل اللي في حياتك أياً كانت مرحلة العلاقة بينكم لسة؛ فهو يستاهل نفس الاحترام والتقدير اللي بتديه لصحابك.

ومتفتكريش إن عمق العلاقة بينكم وقربكم لبعض ده مبرر لانك تتعاملي معاه بقلة ذوق من غير تحفظ.

وان المتوقع إنه يستحمل ده ويتقبله عادي؛ فأكتر تصرفات تزعج الرجل إنه يحس ان مراته أو الست اللي في حياته مستهونة بيه وبمشاعره ومبتديهوش الاحترام والتقدير الكافي.

خصوصاً لو كان بيشوفك بتتعاملي مع باقي الناس بذوق واحترام، ساعتها هيحس انك بتستقلي بيه هو بالتحديد ومش عملاله اعتبار.

حاولي الوصول معاه لحلول وسط:

يمكن من أكتر تصرفات تزعج الرجل إنه يحس إنه مجبر على حاجة طول الوقت.

أو إنك بتحاولي تمشي الدنيا على مزاجك.

وعشان كدة لما تكونوا في أي نقاش أو جدال حاولي إن النقاش يكون عقلاني.

وإنكم توصلوا مع بعض لحلول وسط للخلاف اللي بينكم.

وخليه يكون مشارك معاكي في التفكير ده، إسأليه عن الخيارات المتاحة بالنسبة له وشايف إنها ممكن تكون حل للموقف.

واطرحي عليه خياراتك وحلولك برضه، واوصلوا مع بعض لحل وسط يكون مفيد ومريح ليكم انتم الاتنين.

وده هيخلي الخلاف ما بينكم ينتهي بسرعة، وهيحس بالراحة معاكي وإنك حتى في أوقات الخلاف بتبعدي عن أي حاجة ممكن تزعجه.

وفي نهاية المقال نتمنى اننا نكون فدناكي بنصايح تقدري تطبيقها وتاخدي بالك منها في حياتك الجديدة.

ويكون ده دليلك عشان تبعدي عن أي تصرفات تزعج الرجل، وتكوني زوجة محبوبة لطيفة يستمتع بصحبتها، ونتمنى لك حياة زوجية سعيدة أبدية.