تحضير شنطة يوم الفرح للعريس

سمعت قبل كدا عن شنطة العريس يوم الفرح؟ طيب لو مسمعتش يبقى ضروري تعرف تفاصيل تحضير شنطة يوم الفرح للعريس عشان هترتاح من تفاصيل كتير بتشغلك في اليوم دا.

من خلال المقالة دي هتعرف إيه اللي هتحتاجوا يوم الفرح وتحضره قبلها بفترة. سواء بقى تنقل الشنطة مباشرة لشقة الزوجية لو هتجهز للفرح فيها. أو تاخدها معاك الفندق أو المكان اللي هتجهز فيه.

أفكار تحضير شنطة يوم الفرح للعريس

في الأول اقعد مع نفسك كدا وشوف محتاج ايه في اليوم دا. وابدأ في كتابة قايمة عشان متنساش حاجة. ولو أصلًا مش مجهز حاجة ولا عندك أفكار فاكتب ورانا الحاجات دي.

أولًا: الملابس

ودي تضيف فيها بدلة الفرح، والإكسسوارات اللي هتلبسها زي الحزام ومنديل البدلة والدبابيس وأزرار الأكمام. والجزمة ويكون معاك الملمع واللبيسة والشرابات، وطبعًا الملابس الداخلية.

ثانيًا: ملابس التجهيز

على حسب المكان اللي هتجهز فيه، يعني لو فندق وهتعمل سيشن للتجهيز هتحتاج يكون معاك ترنج قطن لطيف. بحيث تجهز فيه وتحلق وتستعد وبعدين تغيره. ويكون معاك الروب الخاص بالعريس غالبًا بيكون لونه أسود عشان تتصور بيه مع العروسة.

ثالثًا: مستحضرات العناية الشخصية

ودي أساسها العطر المفضل اللي بتستخدمه، أو لو مجهز عطر خاص ليوم الفرح. وكمان لو كريم مرطب وصن بلوك. ولو هتحلق في الفندق تاخد أدوات الحلاقة. وشامبوا وشاور جيل ولوشن عشان الدش قبل لبس البدلة. وفرشاة ومعجون وخيط أسنان عشان تعطير الفم يكون لطيف.

أساسيات في شنطة يوم الفرح

أو شنطة الطوارئ ممكن تسميها كدا. ودي واضح من أسمها إن هيكون فيها كل حاجة تلزمك لو حصلت حاجة طارئة.

• أدوات خياطة من خيط وإبرة عشان لو حصل أي تمزق في البدلة.
• مسكنات ولو ليك أدوية خاصة وممكن نضيف علاج للحموضة احتياطي.
• نضيف جزمة أو كوتشي احتياطي تحسبًا إنك مترتاحش في جزمة الفرح وتحتاج تغيرها.
• قميص أبيض احتياطي تحسبًا برضو لأي بُقعة على القميص.

لوازم جمع الذكريات

حاول تهتم في اليوم دا بجمع أكبر قدر من الذكريات، حتى لو في فوتوجرافر معاك طول اليوم.

اهتمامك إنت بجمع تفاصيل يومك مع عروستك هيفرق معاها جدًا وهيفرق معاك برضو، خاصة إن العروسة في اليوم دا بتكون مشغولة فمش هتعرف تهتم بالجزء دا.

• ممكن تاخد معاك كاميرا صغيرة تصور بيها العروسة ونفسك ولقطات من التجهيزات.
• تاخد صور قديمة ليك وللعروسة وتستخدمها في السيشن بس تكون صور مطبوعة. في وضعيات تصوير لطيفة تتعمل بيها.
• لو بتمارس رياضة معينة ممكن تاخد أدواتها تعمل بيها صورة لطيفة ومختلفة.
• خد معاك أجمل هدية من عروستك أو ذكرى منها تفاجئها إنك محتفظ بيها وتتصوروا معاها.

تحضير شنطة يوم الفرح للعريس لو مش راجع على الشقة

الجزء دا لو إنت مش راجع على شقتك وهتبات في الفندق أو هتسافر مباشرة بعد الفرح. بس دا لا يغني عن التجهيزات لو مسافر شهر العسل. فلو هتسافر شهر عسل ارجع لمقالة تجهيزات شنطة شهر العسل للعريس هتلاقي فيها كل التفاصيل.

• الأوراق الشخصية زي البطاقة وقسيمة الزواج لو كاتبين قبل الفرح بفترة، وجواز السفر.
• ملابس يومية على حسب هتقعد كام يوم قبل ما ترجع للشقة، وتشمل ملابس داخلية، تيشرتات وبناطيل، بيجامات لو مسافر في الشتا.
• طبعًا شبشب عشان تتحرك براحتك، وكوتشي أو اتنين برضو عشان لو هتخرج تبقى مرتاح.
• فلوس بقى لزوم المصاريف ممكن في فيزا أو معاك ورقي عشان متضمنش الظروف.
• هدية لطيفة للعروسة بمناسبة إنكم خلاص بقيتو مع بعض.

وبكدا يكون انتهى تحضير شنطة يوم الفرح للعريس بكل تفاصيلها. مش هتحتاج غير إنك تحضرها وترتاح منها قبل الفرح بأسبوع مثلًا عشان تدخل على الفرح بدون توتر.

اقرأ أيضًا: تحضير شنطة يوم الفرح للعروسة بالتفصيل.

اقرأ أيضًا: أفضل فنادق شهر عسل في إسطنبول.