تحديد صور الفرح خمس أفكار في اختيار نوعيتها وجدولها الزمني

رغم إن الموضوع يبان سهل، وإن فوتوسيشن الأفراح بتطلع منه صور حلوة ببساطة، إلا إن الحقيقة هي إن في وقت وجهد كبير جداً ورا النتيجة المذهلة دي بتبدأ من تحديد صور الفرح اللي عايزينها.

وعشان كدة من المهم إنكم تفكروا كويس في طبيعة الصور اللي عايزينها لفرحكم.

وتحددوا جدول زمني للتصوير على حسب ظروف التصوير.

ومن الأسئلة اللي ممكن تيجي على بالكم في الموضوع ده هي: إزاي تعرفوا الوقت اللي محتاجينه في التصوير؟ وعلى أي أساس تحددوا الجدول الزمني المناسب ليكم؟

وعشان كدة في المقال ده احنا هنحاول نجاوب على أسئلتكم دي، ونوضح لكم إزاي تحددوا الصور المناسبة ليكم وتعرفوا هتحتاجوا لها وقت قد ايه؟

فتابعوا معانا المقال.

تحديد صور الفرح اللي عايزينها:

من الطبيعي إن الفوتوسيشن السابق للفرح بيركز بشكل أساسي على العريس والعروسة.

لكن طبيعي برضه إنكم ممكن تبقوا حابين تضيفوا صور ليكم مع أهلكم أو أصدقائكم المقربين.

وفي الحالة دي لازم تبقوا محددين الأشخاص اللي انتم حابين يشاركوكم الصور دي.

ومحددين هتاخدوا كام صورة جماعية مع مين بالظبط.

وطبعاً كل ما زاد عدد الصور وعدد الأشخاص بالتالي هيزيد الوقت اللي هتاخدوه في التصوير.

فلازم تحطوا ده كويس في اعتباركم.

اختيار مكان التصوير:

ودلوقتي بعد ما اخترتم مين اللي هيظهروا معاكم في صور فوتوسيشن فرحكم جه وقت اختيار المكان اللي هتتصوروا فيه.

وطبعاً الاختيارات السهلة في تحديد صور الفرح وانتم بتختاروا مكان التصوير هو انه يكون في مكان حفل الزفاف نفسه.

وده سواء كان في قاعة الأفراح اللي هتتجوزوا فيها أو ريسيبشن المكان أو الفندق اللي بتجهزوا فيه.

أما لو كنتم مخططين لأفكار معينة حابين تنفذوها ومحتاجة أماكن معينة مش في منطقتكم أو مش سهل توفروها في يوم جوازكم نفسه.

زي إنكم تكونوا مخططين إنكم تتصوروا على شط أو في حديقة معينة مثلاً أو في مكان معين ليه ذكرى عندكم.

أو فيه في دماغكم أفكار معينة للفوتوسيشن محتاجة أماكن معينة ممكن تضطروا تاخدوا وقت في حجزها.

أو تكون بعيدة عنكم فتحتاجوا تسافروا لها مثلاً.

في الحالة دي هتحتاجوا وقت إضافي للتصوير قبل الفرح، وتحطوا في اعتباركم الوقت اللي هتحتاجوه في السفر والتنقلات.

فممكن التصوير يكون قبل يوم الاحتفال نفسه بكذة يوم، وكمان هتحتاجوا تقرروا إذا كان في حد من المقربين ليكم هيظهر معاكم في الصور دي ولا هتكون صور شخصية ليكم بس.

اتأكدوا من المدة اللي هيحتاجها المصور في التصوير:

بعد ما تقرروا مع بعض تحديد صور الفرح اللي عايزينها وتختاروا تفاصيلها اتكلموا مع المصور اللي اختارتوه وعرفوه كل تصوراتكم وأفكاركم عن الصور اللي قررتوها مع بعض.

وفي النهاية اعرفوا منه المدة الفعلية اللي هيحتاجها في تصوير الصور دي، وعلى هذا الأساس هتقرروا التصوير هيكون في أنهي وقت.

هل هيكون يوم الفرح نفسه ولا قبله؟ ولو في اليوم نفسه هيكون قبله بقد ايه وهتحددوه الساعة كام؟

وده عشان تجهزوا نفسكم للوقت ده وكمان تبلغوا أهلكم وصحابكم اللي ممكن يشاركوكم بالظهور في صور منها.

اعملوا حسابكم دايماً على احتمالية التأخير:

حتى لو كنتم من النوع اللي بيقدر يلتزم بمواعيده دايماً مظبوطة وبتيجوا على الوقت بالظبط، إلا إن الأفراح أمر مختلف تماماً.

غصب عنكم ممكن تظهر لكم حاجات مفاجئة تأخركم؛ فاعملوا حسابكم دايماً في تحديد صور الفرح والوقت اللي هتاخده على ربع ساعة على الأقل براح في الوقت تحسباً لأي تأخيرات.

أفكار في تحديد صور الفرح:

في النقطة دي حبينا نعرفكم بعض نماذج للصور اللي هتحتاجوا تتصوروها عادة خلال الفوتوسيشن عشان تبقوا عاملين حسابكم عليها.

هتحتاجوا صور ليكم مع بعض، وصور لكل واحد فيكم لوحده، وصور ليكم مع كل الناس اللي اختارتوها تشارككم التصوير.

وكمان هتحتاجوا تتصوروا صور ليكم انتم الاتنين مع أهل كل واحد فيكم لوحدهم، يعني صورة للعريس والعروسة مع أهل العريس بس وبعدين صورة تانية مع أهل العروسة بس.

وبرضه كل واحد فيكم يتصور لوحده مع أهله مرة ومع أهل الطرف التاني من غير الطرف التاني نفسه.

وصور تانية ليكم مع أصحابكم المقربين بنفس الطريقة، صور مجمعة لصحابكم كلهم، وبعد كدة كل واحد منكم يتصور مع صحابه.

وممكن كمان يبقى فيه صور منفردة لكل واحد منكم مع والدته أو والده وكذلك مع والد أو والدة الطرف التاني وبرضه الأجداد لو موجودين.

ولو عندكم أي أفكار تانية خاصة بيكم طبعاً تقدروا تضموها للأفكار دي، دي خطوط عامة بس عشان تساعدكم في التفكير والتخطيط.

وفي نهاية المقال نتمنى إننا نكون قدرنا نساعدكم ونفيدكم في تحديد صور الفرح اللي هتحبوا تاخدوها وتحتفظوا بيها للذكرى السعيدة لليوم ده.

ونتمنى إنها تفضل أسعد ذكرياتكم للأبد وتكون بداية جديدة لحياة جميلة سعيدة مليانة حب وهنا وفرح.