تجهيزات رحلة شهر العسل … ايه الحاجات اللي هتحتاجوها في شنطكم؟
تجهيزات رحلة شهر العسل هتبتدوا تفكروا فيها أول ما ميعاد جوازكم يقرب، ايه اللي هتحتاجوا تاخدوه في شنطكم؟
وايه الاستعدادات اللي المفروض تاخدوها قبل ما تطلعوا الرحلات عموماً؟ خصوصاً لو كنتم من محبي السفر وناويين تطلعوا رحلات كتير جاية مع بعض.
فلو ناويين تسافروا كتير بعد كدة؛ ففي حاجات لازم تكون موجودة معاكم طول الوقت تسهل عليكم التجهيز لرحلاتكم المختلفة.
وحتى لو كنتم عمليين ومبتحبوش تشيلوا شنط كتير معاكم في السفر.
إلا إن فيه تفاصيل بسيطة صغيرة هتسهل عليكم التجهيز للسفر، وفي نفس الوقت تعبر عن شخصيتكم وارتباطكم ببعض.
وهتحتاجوا تستخدموها طول الوقت، وفي المقال ده احنا حاولنا نجمع لكم أهم التفاصيل دي اللي تقدروا تهتموا بيها.
وده وانتم بتجهزوا لسفرية عسلكم، ولكل سفرية تانية بعدها؛ فتابعوا معانا المقال.
تجهيزات رحلة شهر العسل تبدأ من بطاقات الشنط:
أكتر المشاكل اللي بتواجه أي حد في السفر هي ضياع الشنط.
وعادة عشان نتغلب على المشكلة دي بنحط بطاقات على الشنط فيها اسم صاحب الشنطة وطريقة التواصل معاه.
بس وانتم طالعين سفرية مميزة زي الهاني موون أكيد هيكون أحلى بكتير إن بطاقات الشنط دي تكون مميزة زي رحلتكم.
فتقدروا تجيبوا بطاقات جلد متطابقة بألوانكم المفضلة منقوش عليها أساميكم مع بعض وتاريخ جوازكم.
والميزة في الموضوع إن البطاقات دي هتفضل عايشة معاكم تشارككم في كل سفرية، وتفكركم بأول سفرية طلعتوها مع بعض، وتحيي ذكريات حبكم من تاني طول الوقت.
أغلفة جوازات السفر:
من بين كل تجهيزات رحلة شهر العسل أكيد جواز السفر أهم حاجة فيها، خصوصاً لو بتخططوا إنكم تسافروا برة كتير بعد كدة مع بعض.
فأكيد جواز سفركم على رأس قايمة كل أولوياتكم في السفر، لإن هو تذكرة سفركم الأساسية لأي مكان في العالم.
وبالتالي يبقى لازم تحافظوا عليه من غير أي إهمال، عشان كدة لازم تجيبوا له أغلفة شيك تحافظ عليه وتديه مظهر جذاب.
والغلاف ده ممكن يبقى غلاف خاص بيكم عليه صورة ليكم مع بعض، أو منقوش عليه عبارات حب تعبر عنكم.
أو ممكن يبقى غلاف شيك عادي عليه رسمة لخريطة العالم مثلاً مع جملة محفزة للسفر زي يلا بينا نلف العالم، وممكن برضه تضيفوا أساميكم مع بعض عليه.
الشنط أهم حاجة في تجهيزات رحلة شهر العسل:
حتى لو كنتم مبتحبوش تسافروا بشنط كتير؛ فأكيد على الأقل لازم تاخدوا ولو شنطة واحدة معاكم فيها الأساسيات اللي هتحتاجوها.
وأكيد أكتر حاجة بتكرهكم في شنط السفر هي فكرة شيلها وحطها وأوزانها التقيلة، عشان كدة أنسب حاجة ليكم إنكم تشتروا شنطة واحدة كبيرة بعجل دوار 365 درجة.
ميزة الشنط دي إنها عادة بتكون من النوع الصلب اللي مبيتأثرش بالخدوش والتلفيات، وده هيخليكم مطمنين عليها وعلى حاجتكم فيها.
وكمان مرونة عجلاتها بتخليها تتحرك بسهولة معاكم من غير ما تحمل وزنها على إيديكم وتضطروا تجرجروا فيها في كل حودة.
أما لو بتحبوا الرحلات النهارية والأنشطة الرياضية زي تسلق الجبال مثلاً؛ فتقدروا تاخدوا معاكم في سفريتكم شنطة ضهر من الشنط المتينة وفي نفس الوقت خفيفة الوزن.
كاميرا التصوير:
أجمل حاجة في السفر مش بس الرحلة نفسها، وإنما القصص والذكريات اللي بتسيبها، وتخلينا نرجع نحكيها لصحابنا ونسترجعها طول الوقت واحنا لوحدنا.
وأكتر حاجة ممكن تخلينا قادرين نحتفظ بالذكريات دي للأبد هو إننا نوثقها في صور وفيديو.
وعشان كدة هيكون مهم إنكم تعملوا حسابكم في تجهيزات رحلة شهر العسل على كاميرا تصوير توثقوا بيها اللحظات دي.
وصحيح احنا دلوقتي كلنا عندنا كاميرات تصوير في موبايلاتنا، بس غير إن جودة الصور والفيديوهات بتكون أعلى في الكاميرات.
إلا إن كمان استخدام الموبايل طول الوقت في التصوير بيسرع من إن البطارية تخلص، ومع وجودكم في سفرية في مكان غريب.
وإنكم ممكن تفضلوا طول اليوم برة مكان إقامتكم أو في أماكن منطلقة في الطبيعة، ومفيش مصدر كهربا ثابت.
بالتالي هيبقى صعب شحن الموبايل كل شوية، وحتى لو فيه مصدر كهربا؛ فبرضه هيبقى شيء ممل إنكم تقطعوا رحلتكم واستمتاعكم بوقتكم وتقعدوا جنب الموبايل مستنينه يشحن!
أرجوحة سفر في تجهيزات رحلة شهر العسل:
عارفين المرجيحة اللي بتظهر في الأفلام الأجنبي، وبتبقى البطلة ربطاها بين شجرتين وممدة عليها؟
مين فينا متمناش يعيش اللحظة دي؟ طب ايه اللي يمنعكم دلوقتي وانتم طالعين أكتر سفرية المفروض تكون رومانسية في حياتكم؟
تقدروا تشتروا واحدة وتاخدوها معاكم في رحلتكم، وتستخدموها في أي مكان في الطبيعة، وتعيشوا المشهد اللي كان نفسكم تعيشوه.
والمميز فيها إنها بتطبق بسهولة عشان تتحط في شنط السفر، وبتبقى في حجم كف الايد، يعني مش هتاخد مكان في الشنط.
ده غير إنكم تقدروا تستخدموها في كل رحلاتكم بعد كدة، أو حتى في بيتكم لو عندكم جنينة في البيت.
وسادة الرقبة:
لو بتسافروا لمسافات طويلة سواء بالقطر أو الطيارة هتحتاجوا في تجهيزاتكم إن يكون معاكم وسادة للرقبة.
لإنكم غالباً هتحتاجوا تناموا أو تغفلوا شوية خلال الرحلة، ومن غير الوسادة دي ممكن رقبتكم تميل بوضع غلط يسبب لكم آلام بعد كدة تعكر عليكم كل مزاج رحلتكم.
وبكدة نكون وصلنا لنهاية المقال، ونتمنى إننا نكون فدناكم باقتراحاتنا في تجهيزات رحلة شهر العسل اللي هتحتاجوها معاكم.
ونتمنى لكم رحلة سعيدة مليانة حب وفرح ودفا وتكرروها دايماً وانتم مبسوطين وسعدا مع بعض.
هل محتوى المقال دة كان مفيد بالنسبة لك؟
نعم، مفيد!لا!
