تجهيزات العريس للفرح من الألف للياء

 تبدأ تجهيزات العريس للفرح من يوم الخطوبة، وبتفضل مستمرة لحد يوم الفرح نفسه. وعلى الرغم من إنها مرحلة مهمة وسعيدة في حياة أي شاب مصري، لكنها كمان فترة مرهقة جدًا على كافة المستويات. ودا لأنها تتطلب فلوس كتيرة ومجهود أكتر. لكن الوضع بيكون أسهل لو أهل العريس بيقدموا له المساعدة، فمثلُا، الأب يساعد ماديًا، وإخواته يساعدوه في أمور التشطيب والتجهيز.

وعلشان عارفين إنك كعريس بتلف طول الوقت في دوامة مش بتنتهي غير يوم الفرح، وممكن تنسى تجهيزات ومستلزمات مهمة، فاحنا قررنا نساعدك. في المقال دا هتلاقي كل التفاصيل الكبيرة والصغيرة. دا غير إننا هنركز عليك شويتين بعيد عن أمور الشقة وطلبات العروسة.

تجهيزات العريس قبل الفرح بشهر

قبل الفرح بشهر لازم تكون خلصت كل الحاجات المهمة، أو على الأقل قربت تخلصها. ودي قائمة بأهم تجهيزات العريس قبل يوم الفرح:

تجهيزات شقة الزوجية

طبعًا الشقة بتاخد النصيب الكبير من الوقت والمجهود، وفي الفترة دي لازم تكون بتنهي التشطيبات. وبتتضمن تشطيبات الشقة:

الدهان: لازم تكون قررت اختيار اللون المناسب واللي طبعًا اتفقت عليه مع العروسة. ويكون الصنايعي شغال على آخره، علشان يلحق يخلص قبل الفرح بأسبوع على الأقل. الأفضل طبعًا تكون مخلص كل دا قبلها بفترة علشان تدخل الفرح وأنت مرتاح.

المطبخ: دولاب المطبخ من أهم مستلزمات شقة العريس. في الوقت دا لازم يكون خالص وبيتركب، وجاهز لفرش جهاز العروسة.

الستاير والسجاد: موضوع الستاير قصة لوحده، خاصة اختيار التصميم المناسب لشقتك، وطبعًا لذوق العروسة. فلازم تكونوا متفقين على تصميم الستاير وألوانها من بدري جدًا. وتبدأ تتركب قبل الفرح بشهر أو على الأقل بأسبوع.

ولو النجف عليك ومش على العروسة اوعى تنساه في زحمة التحضير. خليك في الحاجات البسيطة المودرن، وروح اشتريهم من أماكن معينة مشهورة ببيع النجف. بلاش المحلات الغالية لأنها فعلًا هتكلفك مبلغ كبير.

لوحات وتحف: اسأل العروسة عن اللوحات اللي اشتريتها ومكان تعليق كل لوحة، علشان تجهز مكانها وتحفرلها وأنت بتركب النجف. والنصيحة دي مهمة علشان ننجز، اسأل مجرب.

تنضيف الشقة: بعد طبعًا ما تخلص كل التجهيزات، وتكون اتأكدت إن مفيش نقص. التنضيف لازم يكون كويس جدًا، لأن الشقة هتكون مليانة بالتراب وآثار الدهان والتشطيب.

الأثاث: بعد كل المراحل اللي فوق دي، بتيجي بقى مرحلة استقبال عفش العريس أو الخشب أو الغرف. وكل عريس بيفرش شقته على قد ميزانيته وعلى قد مساحة البيت. بس في الغالب بتحتاج ( أوضة نوم، سفرة، أنتريه، صالون، أوضة أطفال ).

ولو الدنيا جميلة ممكن تدخل بأوضتين بس عادي، والجوازة هتم والدنيا هتبقى حلوة، بس اختار عروسة بتحبك أكثر من العفش.

استقبال جهاز العروسة: ودا يا عزيزي يوم لوحده، خاصة لو عايش في منطقة بتعمل زفة للجهاز فربنا معاك بقى. طبعًا بتحتاج كل صحابك وأهلك علشان يساعدوا في طلوع الجهاز للشقة وتوزيعه في الأماكن المناسبة. وهتفضل بقى طول اليوم تخدم على العروسة وأهلها، وتكرمهم كويس، علشان تبقى عريس لطيف.

تجهيزات العريس للزواج

في بقى شوية تجهيزات خاصة بيوم الفرح نفسه، لكن لازم تتعمل قبله بفترة. زي الحاجات دي:

قاعة الفرح: القاعة لازم تتحجز قبلها بشهرين، ولو فرحك في موسم أفراح زي الأعياد، فقبلها بثلاث شهور على الأقل. وطبعًا بتختار تورتة الفرح وضيافة المعازيم، ولو عندك طلبات معينة.

كروت الفرح: كرت الفرح بيتعمل قبل شهر أو أكثر، بتختار التصميم والكلام المكتوب، وبعدين بتطبع عدد على قد معازيمك.

فتوغرافر: كمان بيكون محتاج حجز وتأكيد يوم الفرح عليه، علشان طبعًا بيكونوا مش فاضيين.

ميك اب ارتيست: وأنت بتحجز كل الحاجات اللي فوق دي، لازم طبعًا تحجز ميك اب عشان العروسة. وعلشان تبقى راضية عليك ومبسوطة يوم الفرح، احجز لها في المكان اللي تقولك عليه. 

تجهيزات العريس الشخصية

في الجزء دا هنحضرلك قائمة بأهم حاجات العريس الشخصية، زي:

تجهيزات الملابس

البدلة: بدلة الفرح من أهم تجهيزات العريس، وطبعًا أكيد بتختارها مع العروسة، علشان تاخد رأيها. حاول تكون جاهزة قبل الفرح بأسبوع، علشان تخفف الضغط عليك. كمان اختار قميص أبيض، وجزمة شيك مع بابيون جميلة ودبوس بدلة مميز.

ملابس البيت: مش محتاج نقولك إنك لازم تختار كم قطعة ملابس للبيت ( ملابس داخلية، بيجامات، بنطلونات، تيشرتات). علشان تكون في صورة حلوة وشيك قدام زوجتك.

ملابس خروج: مهما كان عندك هدوم كتير، فأنت أكيد محتاج شوية قمصان على شوية بنطلونات، وشوية تيشرتات. لأن في شهر عسل وخروجات وعزومات وناس رايحة وناس جاية، مواااال كبير حضرتك.

جزم: اشتري تشكيلة جزم تناسب كل الأوقات والخروجات ( رياضية، رسمية، للمشاوير النهارية، للبيت).

العطور والإكسسوارات

البرفانات مهمة جدًا، أهم من الهدوم نفسها. ريحتك لازم تبقى طول الوقت حلوة، علشان العروسة كدا تحبك وتفضل تشوفك بنفس صورة أيام الخطوبة. يفضل تختار الأنواع اللي العروسة بتحبها.

نضارات الشمس مهمة علشان الخروجات وشهر العسل، خاصة لو هيكون في مدينة ساحلية وفي الصيف. يا ريت نشتري نضارتين كدا حلوين ومناسبين.

مستلزمات النظافة الشخصية

نضافة العريس الشخصية أهم من كل اللي فات، علشان ما يبقاش في نفور من العروسة. ودي بعض المتطلبات اللي لازم تشتريها:

معجون وفرشة أسنان، لأن نضافة سنانك أساسية ومش محتاجة كلام.

فرش وكريمات للشعر، لوازم التسريح والعناية بشعرك.

أدوات حلاقة للوجه والجسم، ولازم طول الوقت تكون مهتم بالموضوع دا.

تجهيزات العريس يوم الفرح

يوم الفرح هو يوم تتويج كل المشوار اللي فات، اليوم اللي بتجني فيه نتيجة التعب والفلوس اللي صرفتها. وفي تجهيزات معينة وأخيرة خاصة بيوم الفرح، زي:

اصحى الصبح في ميعادك الطبيعي، بعد ما تكون نمت 7 ساعات على الأقل، ولو تقدر خليهم 12 ساعة. علشان تقدر تكمل اليوم لآخر الليل وأنت في نشاطك.

افطر كويس جدًا، واشرب مياه. لكن طبعًا ابعد عن كل الأكلات اللي ممكن تسبب إزعاج للمعدة أو القولون.

فقرة الحلاقة بقى، يا ريت تبدأها من بعد الضهر علشان ما تتأخرش.

خد بقى دوش ممتاز، واهتم بنظافتك الشخصية.

جهز نفسك والبس قبل موعد وصولك للعروسة بساعة، علشان تروح على الوقت وتخلص نفسك من النكد والهرمونات اللي ممكن تطلع عليك.

تجهيز عربية الزفة، ودي سيبها على صحابك، علشان الحمل يخف من عليك.

وبس يا سيدي اركب العربية، وطبعًا أصحابك واخواتك بيكونوا معاك. واطلع على مكان العروسة، وخدها وادخل القاعة.

اتبسط في الفرح على قد ما تقدر، وبس خلاص خد عروستك واطلع على شقة الزوجية، وألف ألف مبروك.

تجهيزات ام العريس

أم العريس زي أم العروسة بالظبط، مش بتقعد وترتاح غير لما ابنها يروح بعروسته على شقته. وغالبًا هتكون مشغولة بحاجات زي:

استقبال الضيوف وضيافتهم، وطبعًا بيكون بقالها كم يوم في الموضوع دا.

بتمم على شقة العريس مع أم العروسة وتتأكد إنها جاهزة من كل شيء.

بتقف طول الليل في القاعة، تسلم وتستقبل وتودع.

وبس كدا بيخلص الفرح، وبتروح تنام فيها أسبوع على ما تفوق من التعب.

إقرأ أيضًا: تجهيزات العروسة قبل الفرح بشهرين

اقرأ أيضًا: تجهيزات العروسة يوم الفرح 2024