بيجامات البيت للعروسة اللي لازم تكون في جهازك

بيجامات البيت للعروسة هي أول حاجة بتفكري فيها في جهازك أكيد، بخلاف اللانجري اللي هتلبسيه في أوقاتك الحميمية.

لإنك مش بس محتاجة هدوم مثيرة في الأوقات دي لوحدها.

وإنما هتحتاجي إن هدوم البيت اللي هتقعدي بيها خلال اليوم أو تنامي بيها تكون برضه شيك وحلوة ومثيرة.

وسواء كنت بتدوري على اللي هتلبسيه في ليلة الدخلة وأول يوم جواز بالتحديد أو في فترة شهر العسل.

أو طول الفترة الجاية عموماً بعد الجواز فمن المهم انك تختاري هدوم للبيت اللي هتقدري تكوني مرتاحة فيها.

وفي نفس الوقت تديكي الثقة في جمالك ومظهرك، وفي المجال ده هيكون عندك خيارات كتير.

سواء الأروبة الحرير أو البيجامات المنقوشة أو الترينجات الرياضية الشيك أو قمصان النوم الساتان المثيرة.

فانت عندك خيارات كتير تقدري تختاري بينها واللانجري مش هي خيارك الوحيد في الفترة دي.

أهم حاجة بس انك تحطي في اعتبارك وانت بتختاري إذا كانت الراحة في الهدوم دي هي خيارك الأساسي ولا هتتنازلي عن الراحة في سبيل الأناقة؟

لحسن الحظ في خيارات كتير تقدر توفر لك الاتنين، وفي المقال ده حاولنا نجمع لك أكتر أفكار الخيارات المريحة والأنيقة من بيجامات البيت للعروسة.

فتابعي معانا المقال.

رومبر مزهر:

الرومبر ده اللي هو زي السلوبيت بتاع البيبيهات، دلوقتي بقى فيه منه على مقاس البيبهات الكبار اللي بيبدأوا حياة جديدة.

وطبعاً مفيش أحلى منه تقعدي بيه مع جوزك كإنه بيجامات البيت للعروسة؛ فيديكي مظهر طفولي يخليه عايز ياكلك أكل.

وطبعاً لإنه عادة بيكون حمالات وبشورت قصير؛ فده معناه إنه هيظهر أكبر قدر من جمالك وإثارتك.

وفيه منه أشكال وألوان مختلفة تقدري تختاري منها، زي إنه يكون مطبوع بزخارف نباتية ملونة، وبحواف دانتيل في نهايته.

وممكن يبقى بحمالات بتتفتح وتتربط فيونكات، وتبقى هي الطريقة اللي بتلبسيه وتفتحيه بيها بدل السوست.

بيجامات البيت للعروسة بالشورت:

وانت لسة بتبدأي حياة زوجية جديدة أكيد هتحبي، وهو كمان هيحب، ان لبسك في بيتكم يكون كاشف أكبر جزء ممكن من جسمك.

وده مش معناه إنك تكوني مضطرة تتخلي عن راحتك في البيت وانك تقعدي طول الوقت بهدوم لانجيري ضيقة أو قماشها وأربطتها مش مريحة ليكي في الحركة.

ولكن تقدري توفقي بين الاتنين بإنك تختاري هدوم مريحة، وفي نفس الوقت تكون كاشفة لكتير من جسمك.

وده تقدري تحققيه لما تختاري البيجامات الشورت، واللي بيميزها إن فيها أشكال وألوان مختلفة تقدري تختاري منها اللي يعجبك ويكون على ذوقك وذوق عريسك.

وتقدر تختاريها ما بين انها تكون بقمصان ليها أزرار بتتفتح وتبين جسمك أكتر أو تيشيرتات قطن مريحة.

أو إنها تكون بحمالات ومطبوعة بنقشات ملونة ومبهجة، أو يبقى الجزء العلوي منها أقصر من بداية الشورت؛ فيظهر منطقة السرة.

وممكن كمان تكون من الحريرمع شرايط قطيفة بألوان مختلفة على الكمام والشورت، ده غير إنك تقدري تطلبي تصميمات مخصوص ليكي.

زي إنك تكتبي عليها أساميكم أو جمل رومانسية موجهة لعريسك يشوفها عليكي كل ما يلمحك.

وكمان تقدري تختاري إنك تطبعي عليها من الضهر مثلاً صورة ليكم بتحبوها أو ذكرى جميلة ليكم مع بعض.

البيجامات التقليدية:

لو الاختيار اللي بترتاحي فيه على كل الأحوال هو الاختيار التقليدي؛ فتقدري تختاري بيجامات البيت للعروسة من النوع التقليدي.

وده بإنها تكون بيجامة بأكمام طويلة وبنطلون كامل، لكن تقدري تضيفي عليها رونق العروسة في اختيار ألوانها.

وده سواء اختارتيها باللون الأبيض عشان تفضل مدياكي إحساس العروسة، أو ألوان فاقعة تضيف عليكي رونق البهجة والاحتفال زي الأحمر مثلاً.

وكمان تقدري تختاريها من الحرير الخفيف، وده مش بس هيخليها مريحة ليكي في الحركة وعلى جسمك، وإنما كمان مريحة في تنضيفها.

فمعروف طبعاً إن الحرير مبيحتاجش مجهود كبير في تنضيفه وغسله، كل اللي هتحتاجيه إنك تحطيه في دورة غسيل بسيطة في الغسالة ويطلع أنضف من الأول.

وبرضه زي البيجامات القصيرة تقدري تضيفي عليها عنصر من الخصوصية بإنك تنقشي عليها أساميكم أو أول حروف منها.

بيجامات البيت للعروسة بالريش:

ولو بتدوري على نوع من البيجامات يكون شكله غير تقليدي ومبهر، وفي نفس الوقت حلو ومريح؛ فتقدري تختاري النوع ده من البيجامات.

واللي عادة ما بتكون بأكمام طويلة وبنطلونات، ولكن حوافها بتنتهي بالريش، وتقدري تختاريها من ألوان مختلفة وتبعدي عن اللون الأبيض التقليدي.

وفي نهاية المقال نتمنى إننا نكون قدمنا لك أفكار مختلفة ومميزة في بيجامات البيت للعروسة تقدري تختاري منها اللي يناسبك ويكون على ذوقك.

ونتمنى لك بداية حياة زوجية سعيدة مليانة حب وفرح وهنا وسعادة.