بلاط أرضية الحمام 6 أفكار في اختيار أشيك أنواعها

أول حاجة بنعملها في يومنا دايماً أول ما نصحى من النوم هي إننا نروح للحمام، وواحنا بين الصحيان والنوم وعنينا لسة مفتحتش بتبقى أكتر حاجة مركزة عليها وبصالها هي بلاط أرضية الحمام.

فأكيد أي حد هيحب إنه يفتح عينيه على منظر شيك وأنيق، ومش بس أول ما يصحى لكن في أي وقت من اليوم.

وسواء كان بيلبي نداء الطبيعة المعتاد أو بياخد شاور أو بتحط مكياجها قبل ما تخرج من البيت؛ فأكيد انكم تلاقوا حواليكم عالم من الألوان المتناسقة بشكل فني ده هيكون شيء مريح لعيونكم وأذهانكم ويديكوا براح من الراحة والاسترخاء.

ولإنكم بتبدأو حياة جديدة وبتأسسوا لعشكم الجديد.

فده هيكون أسهل كتير عليكم انكم تختاروا اللي يعجبكم ويتناسب مع ذوقكم من الأول.

وده بدل ما ترجعوا بعد كدة تفوروا الحمامات من تاني وتصرفوا عليها وعلى ديكورها من جديد.

وعشان كدة في المقال ده احنا جبنا لكم شوية أفكار مختلفة ومتنوعة لأشيك أنواع بلاط أرضية الحمام.

فتقدروا تختاروا منها اللي يعجبكم ويتناسب مع ذوقكم وستايل الديكور العام اللي اختارتوه لبيتكم.

فتابعوا معانا المقال.

ستايل البلاط الإيطالي:

نقشات البلاط الإيطالي بتتميز بكونها فنية جداً ورسوماتها وألوانها مبهجة وبتضيف رونق وأناقة على المكان.

وكمان البلاط الإيطالي بيوحي بعبق التاريخ كدة وكإنه خارج من قصور روما القديمة.

وفيه منه أنواع كتير زي البلاط الريجيولي من القرن التاسع عشر، وبلاط سيلين من عصر فيبي فلو.

فلو ده الاستايل اللي بيتناسب مع ذوقكم تقدروا تختاروه في عشكم الجديد.

البلاط الهندسي:

أما لو بتحبوا التصميمات الدقيقة والواضحة؛ فتقدروا تختاروا بلاط أرضية الحمام بتصميمات هندسية محددة.

ودي غالباً بتكون عن رسومات هندسية على شكل مربعات أو مستطيلات، وأحياناً بتكون متداخلة في بعضها.

وهي مناسبة أكتر لستايلات ديكور الحمامات اللي واخدة النمط المودرن أو المظهر المعدني الاستيل.

بلاط أرضية الحمام المغربي:

طبعاً الحمامات المغربية أشهر من نار على علم، وعلى الرغم من إن شهرتها كانت بتتمثل في كونها حمامات عامة.

إلا إن في عالم الديكور تم استغلال شهرتها دي بدمج ديكورها في ديكورات الحمامات المنزلية العادية.

والحقيقة ان استخدام النمط ده بيكون مناسب جداً خصوصاً مع الحمامات اللي مساحتها صغيرة.

وده لإنه بيخليها تبان أكبر من مساحتها الحقيقية؛ لإنه مبيتركبش في الأرضية بس لا ده بيتركب على الحيطان كمان؛ فبيديها مظهر متماثل يحسس بالاتساع.

البلاط النحاسي:

وده عادة بتكون من قطع من البلاط منقوش عليه دواير صغيرة بألوان نحاسية مع دواير تانية قليلة بلون أبيض كريمي.

وده بحيث إنه لما يتركب مع بعضه الدواير البيضة دي تشكل خط رئيسي بطول البلاط وعرضه تبان وكإنها حواف لتصميم البلاط.

ومن المناسب مع النوع ده إن يكون تصميم الحيطان خصوصاً عند البانيو أو منطقة الاستحمام على شكل بلاط مترو الأنفاق.

أو أحجار البناء قبل الخرسانة اللي بنقول عليها الطوب الأحمر بس هنا يكون لونها أخضر عشان يتماشى مع لون الأرضية.

بلاط أرضية الحمام الأزرق السماوي:

ولو بتحبوا الأنماط التقليدية الكلاسيكية في الديكور؛ فالنوع ده من البلاط هيكون مناسب ليكم أوي.

وده لإنه بيدي مظهر تقليدي للحمام واللون الأزرق السماوي هو اللون الطبيعي اللي بنشوف بيه المية والبحر عادة.

فهيكون مناسب جداً مع سقف باللون الأبيض، وكمان تقدروا تستخدموه مش بس كأرضية، وإنما كمان ممكن تركبوه على الحيطان وعلى تصميم البانيو من برة.

ولو بتحبوا تداخل الألوان؛ فتقدروا تدخلوا معاه درجات تانية من اللون الأزرق أو الأسود والأبيض اللي بيكونوا لايقين دايماً على أي لون تاني.

تصميمات تعبر عن أذواقكم وهوايتكم:

في أفكار تانية كتير ممكن تستغلوها وانتم بتتكلموا مع مصمم الديكور اللي هيشتغل على بيتكم عن التصميمات اللي تحبوا انها تتنفذ في بلاط أرضية الحمام عندكم.

مثلاً لو بتحبوا الشطرنج؛ فممكن تتطلبوا تصميم الأرضية إنه يكون على هيئة الأرضية الخاصة بلعبة الشطرنج.

كمان لو عندكم تصميمات معينة بتحبوا شكلها في هدومكم أو اكسسوارتكم ممكن تطلبوا نقشها على البلاط، زي تصميمات قماش الباندانا مثلاً.

وفي نهاية المقال نتمنى إننا نكون قدمنا لكم أفكار تناسبكم في اختيار بلاط أرضية الحمام اللي تقدروا ترتاحوا في التواجد فيه خلال اليوم وتحسوا انه مكان مميز في بيتكم مش مجرد حمام وخلاص.

ونتمنى لكم بداية جديدة سعيدة في عشكم الجديد وحياة مليانة حب وود وفرح وسعادة أبدية.