بدلة العريس الرسمية 6 أفكار إزاي تكون مختلف فيها عن باقي المعازيم؟

العروسة دايماً مميزة بفستانها اللي محدش يقدر ينافسها فيه، لكن العريس للأسف مظلوم في الحتة دي، بدلة العريس الرسمية غالباً بتتشابه مع بدل السهرات المعتادة اللي ممكن يلبسها أي حد من صحابك أو المعازيم في الفرح.

وعشان تحس بالتميز في يوم فرحك زي عروستك بالظبط، احنا جيبنالك النهاردة كذة فكرة ممكن تنفذهم وتضيفهم لمظهرك.

وده عشان تبقى مميز وسط الفرح لو بعدت عن العروسة والكوشة شوية.

ولو اختلطت بالمعازيم يبقى الكل عارف إنك العريس ومحدش يفتكرك واحد من صحابه أو قرايبه أو معزوم عادي وسطهم.

غير كرافتتك:

عادة كل الرجالة بيروحوا الأفراح والمناسبات بكرافتات طويلة؛ فلو عايز تبقى مميز وسطهم كعريس ممكن تغير كرافتتك وتلبس بابيون بدالها.

وخلي البابيون تكون متناسقة مع طبيعة بدلة العريس الرسمية ونوع قماشها.

فلو كانت البدلة من قماش السهرات اللميع خليك ملتزم بتصميمات الحرير أو البلويستر للبابيون، وأكتر الألوان التقليدية المناسبة هتكون الأسود والأبيض.

أما لو البدلة من تصميم كاجوال والفرح هيكون بالنهار وفي مكان مفتوح

فممكن في الحالة دي تلبس معاها بابيون من القطن أو الصوف بألوان زاهية.

ضيف عروة مع بدلة العريس الرسمية:

عادة محدش من الرجالة بيهتم يحط حاجة في عروة بدلهم؛ فعشان تكون مميز وسطهم في يوم فرحك غير انت القاعدة.

ضيف زهرتين صغيرين في عروة بدلتك، واختارهم بألوان متناسقة مع البدلة وفستان عروستك.

وممكن كمان تبقى ماشية مع ديكور المكان، عشان تبقى مميز وسط كل المعازيم.

غير المظهر العام لبدلتك:

هتحتاج هنا إنك تسأل على الأقل صحابك وقرايبك عن طبيعة البدل اللي ناويين يحضروا بيها الفرح.

حاول تتفق معاهم بحيث يلبسوا حاجة مختلفة عن اللي هتلبسها.

يعني مثلاً لو هيلبسوا بدل بوليستر تبقى انت بدلتك من الصوف الفاخر.

أو انهم يلبسوا بدل قطعتين بس لكن انت بدلتك تبقى تلات قطع بالبليزر الداخلي.

طبعاً وارد في النهاية يتحصل مصادفة قدرية ان واحد من المعازيم يكون لابس شبهك.

بس على الأقل هيكون حد بعيد عنك، ومش هيكون من مجموعتك المقربة اللي هيفضلوا جنبك طول اليوم.

تغيير لون بدلة العريس الرسمية:

فكرة تانية ممكن تستخدمها وهي إنك تغير لون بدلتك.

أغلب بدل المناسبات الرجالي عادة بيكون لونها أسود أو رمادي أو أزرق كحلي أو بني.

حاول تبعد عن الألوان دي واختار لون مميز يبقى صعب حد يفكر فيه.

ممكن تعكس التقليدي وتختار اللون الأبيض للبدلة والأسود للقميص وتبقى كدة مطقم مع فستان عروستك.

أو ممكن تختار أي لون تاني تفضله وتحس انه مميز ومختلف ومش هيجي بسهولة على دماغ حد من المعازيم.

اختار تصميمات الطبعات لاكسسوارتك:

دي فكرة ممكن تضيفها لاكسسوارتك زي الجرافتات أو منديل بدلة العريس الرسمية أو القميص.

الفكرة هي انك تختار حاجة من الحاجات دي أو تطقمهم كلهم مع بعض بحيث يكونوا بتصميمات مطبوعة.

يعني تبعد عن الشكل التقليدي اللي عادة بيعتمد ان الاكسسوارات دي تكون بلون واحد سادة ومش عليها أي طبعات أو رسوم.

ممكن كمان تختار ان الطبعات دي تكون ماشية مع ثيم أو موضوع الفرح لو انتم مختارين له موضوع معين.

لبس كاب:

الفكرة دي مناسبة بس للأفراح النهارية اللي بتتعمل في مكان مفتوح.

هيكون من المميز ليك انك تكون لابس كاب (قبعة) شيك لايقة على بدلة العريس الرسمية اللي مختارها للفرح.

طبعاً الفكرة دي محتاجة مظهر كاجوال عام، مش هتبقى لايقة على بدلة من البدل الفخمة.

وإنما هتبقى ماشية لو انت معتمد ان مظهرك يكون لايت وكاجوال مع بدلة قطن أو كتان.

وفي نهاية المقال نتمنى نكون قدمنا لك أفكار مميزة تقدر تفيدك في تمييز نفسك وسط الفرح وانت لابس بدلة العريس الرسمية اللي ممكن تتشابه مع بدل أي حد من المعازيم.

ونتمنالك يوم فرح عظيم انت وعروستك يتحفر في ذاكرتكم للأبد ويكون أحلى ذكرى لحياتكم اللي جاية إن شاء الله.