العقم عند الرجال: أعراضه وأسبابه وعلاجه

لو عريس جديد، أو شاب مقبل على الزواج اكيد فكرت بنسبة كبيرة في حاجات تسبب العقم عند الرجال، وازاي تعرف ان عندك عقم أو لأ. لأن العقم من أول المشاكل المسببة للانفصال بين الزوجين، علشان كده مهم تعرف إيه هو العقم، واعراضه، وأسبابه.

في البداية العقم عبارة عن مرض بيصيب الجهاز التناسلي للرجل أو المرأة بنسبة متساوية، وزي اي مرض بيكون له أسباب، وأعراض، واحتمالية وجود علاج من عدمه واردة. وكل شيء بإرادة ربنا طبعاً.

أسباب العقم عند الرجال

التكاثر والإنجاب بيعتمد على شوية حاجات عند الرجل زي؛ الحيوانات المنوية ال بتخصب البويضة، والصحة العامة، أو الإصابة بأمراض الكبد والكلى ال بدورها بتسبب سرعة القذف، أو ضعف الانتصاب. وغيرها من الأسباب المشهورة زي:

الحيوانات المنوية

تعتبر مشاكل الحيوانات المنوية من اكتر اسباب العقم عند الرجال انتشارًا. وممكن يكون عدد الحيوانات المنوية قليل، أو مشوهة، أو ضعيفة، أو حتى عددها قليل. وكل الأسباب دي بيتم معرفتها من خلال تحاليل طبية للسائل المنوي. وده ممكن يكون نتيجة لـ:

• التدخين، أو تعاطي المخدرات، وشرب الكحول.
• التعرض للمواد الكيميائية أو المواد المسممة.
• وجود أمراض وراثية.
• الإصابة بأمراض مناعية اتسببت في تكون أجسام مضادة للحيوانات المنوية فتقضي عليها.
• اضطرابات الهرمونات، أو اضطراب الغدة النخامية.

مشكلات جسدية

ممكن تكون المشكلات الجسدية واحدة من أهم أشياء تسبب العقم للرجال، زي في حالة ان يكون الجهاز التناسلي للرجل مسدود، وبالتالي تدفق الحيوانات المنوية هيتمنع. وحالة زي دي بتحصل بسبب عيب خلقي، أو وراثي، أو بسبب مرض مناعي من الأمراض المنقولة جنسيًا.

وممكن تحصل الحالة دي بسبب الأوردة الملتوية في كيس الصفن، أو الأوردة المنتفخة. وبيزيد خطر إصابة الرجل بالعقم في واحدة من الحالات دي:

• التهابات الأعضاء التناسلية.
• التهاب البروستاتا.
• الخصية المعلقة.
• البلوغ المتأخر أو المبكر.

اعراض العقم عند الرجال

ازاي تعرف ان عندك عقم؟ وامتة تبدأ في الكشف الطبي؟ وما هي اعراض العقم عند الرجال؟ ممكن تظهر علامات زي:

• الشعور بألم، أو ملاحظة تورم في الخصية.
• عدم الرغبة الجنسية.
• مشكلة في الانتصاب أو القذف.
• زيادة هرمون الأنوثة واعراضه زي؛ نمو غير طبيعي في الثدي وقلة شعر الوجه.

وبتبدأ الشكوك في بداية الزواج مع تأخر الحمل شهر واتنين وتلاتة. ولكن بينصح الأطباء بالبحث عن الإنجاب وتأخره بعد سنة من الزواج، والعلاقة المنتظمة.

ومن هنا بيتم عمل التحاليل الطبية زي (اختبارات الدم، وعدد الحيوانات المنوية، وشكلها وحجمها). وبيتم السؤال عن التاريخ المرضي، وأي أدوية بيتم استخدامها في الوقت الحالي أو من قبل كده.

علاج العقم عند الرجال

بعد الكشف وتقديم التحاليل ومعرفة سبب العقم ودرجته، بيتم علاج العقم عند الرجال على حسب المشكلة، فممكن يتم العمل على:

التلقيح الصناعي

وبتحصل عملية التلقيح الصناعي بأكتر من طريقة. ممكن يتم اختيار مجموعة سليمة من الحيوانات المنوية، وحقنها في رحم الزوجة. وده في حالة تشوه عدد من الحيوانات المنوية، أو ضعف القذف.

التخصيب؛ وهي طريقة مشابهة للتلقيح الصناعي، ولكن العملية كلها بتتم في مختبر المستشفى. وهناك بيختاروا مجموعة سليمة من الحيوانات المنوية، ويخصبوا بيها البويضة من الزوجة وبعد كده بيتم تلقيح البويضة داخل القناة فالوب.

الحقن المجهري، وهنا بيتم حقن حيوان منوي واحد في البويضة، وبيتم تخصيبها في رحم الزوجة.

العمليات الجراحية

ممكن يتم اللجوء لعملية جراحية في حالة احتاجت حالة المريض، زي دوالي الخصية، وتحسين حركة وجودة الحيوانات المنوية، أو تسليك الأنابيب في الجهاز التناسلي لسهولة قذف الحيوانات المنوية.

الأدوية والعقاقير

في حالة كان العقم للرجال مرتبط باضطرابات هرمونية، أو أمراض الغدة النخامية أو غيرها من الحالات ال ممكن تتعالج بالأدوية. فهنا بيتم وصف علاج وأدوية فعالة من الطبيب المختص.

نصائح لعلاج العقم في المنزل

في حالة كنت شاكك في قلة عدد الحيوانات المنوية، أو مشاكل في الصحة الجنسية، تقدر تغير من نمط حياتك:

• وقف تدخين، وشرب كحوليات.
• وقف علاجات من غير روشتة، أو علاجات الأرق والاكتئاب من غير داعي.
• اهتم بأكلك، والتزم بنظام غذائي صحي يعتمد على الخضروات الورقية والفواكه بشكل كبير. واهتم بأكل السمك، واعرف اكتر عن الصحة الجنسية والأسماك.
• مارس رياضة، وصمم لنفسك جدول رياضي؛ امشي، واجري، وارفع اثقال.
• عزز صحتك بمكملات غذائية مهمة لصحتك.

المصادر:

https://my.clevelandclinic.org/health/diseases/17201-male-infertility

https://www.mayoclinic.org/diseases-conditions/male-infertility/symptoms-causes/syc-20374773