التهابات المهبل..تعرفي على الأسباب والعلاج

التهابات المهبل من الموضوعات اللي مهم جدا نتكلم عنها وخصوصا أننا بنلاقي بنات وستات كتير بتسأل عنها في مواقع التواصل الاجتماعي. حنتكلم عن الأعراض وازاي تعرفي الالتهاب اللي عندك نوعه ايه وازاي تعالجيه بالشكل الصحيح.

التهابات المهبل

المهبل منطقة مليانة بالبكتريا النافعة اللي لها دور مهم في تنضيفه بشكل مستمر وبشكل طبيعي، وممكن يحصل عدم اتزان وتتضاعف كمية البكتريا دي لأسباب كتيرة، ودة ممكن يؤدي لحدوث الالتهابات.

أنواع التهابات المهبل

التهابات المهبل له أنواع كتير، ولكن حنتكلم عن بعض من الأنواع دي على سبيل المثال:

• التهاب بكتيري: ودة بيكون بسبب زيادة نمو البكتريا عن الطبيعي، وبيكون لون الافرازات أبيض مايل للرمادي، وبيكون لها رائحة مميزة شبهها الأطباء برائحة السمك.
• التهاب فطري: ودة بيحصل بسبب نوع فطر معين اسمه كانديدا أو candida، وبيكون فيه حكة متوسطة أو شديدة، وإفرازات بيضاء سميكة.

اعراض التهاب المهبل

1. تغير في لون الإفرازات والرائحة وكميتها أيضا.
2. حكة.
3. ألم أثناء التبول أو أثناء العلاقة الخاصة.
4. ظهور نقط دم بسيطة في أوقات غير الدورة الشهرية.

أسباب أخرى لالتهابات المهبل

• استخدام منتجات فيها عطور وروائح على المنطقة دي بشكل مباشر على سبيل المثال: مزيل العرق، والشاور جيل، والصابونة، والسبب أنه بيسبب التهاب شديد في أنسجة المهبل.
• قلة هرمون الاستروجين في حالة الرضاعة، وبعد الولادة، وبعد انقطاع الطمث، وعمل إزالة للمبيضين.
• بعض الأدوية على سبيل المثال: بعض المضادات الحيوية.
• مرض السكر.
• بعض الأمراض المناعية.
• استخدام بعض وسائل منع الحمل.
• الملابس الضيقة، وغير القطنية.

العلاقة الخاصة والتهابات المهبل

بعض الدراسات قالت أن العلاقة الخاصة ممكن تسبب عدوى في حالة عدم استخدام المزلق المناسب خصوصا لو فيه جفاف في المهبل، ولو كان الزوج مصاب بعدوى بكتيرية أو فطرية ممكن تتنقل للزوجة بشكل سهل.

وهم الدش المهبلي!

ساعات بنسمع كلام كتير عن أهمية الدش المهبلي، وأنك لازم تدخليه في روتين عنايتك الشخصية، ولكن الكلام دة كله خاطئ علشان الدش المهبلي بيعمل عدم اتزان في البكتريا الموجودة في المهبل، وبالتالي بيكون سبب رئيسي في الإصابة.

امتا لازم تروحي زيارة للدكتور؟

1. في حالة زيادة الإفرازات، والحكة بشكل غير طبيعي، والرائحة غير المستحبة.
2. لو حصلك عدوى قبل كدة وعالجتيها، ورجعت مرة تانية، وخصوصا لو في وقت صغير.
3. لو استخدمتي أدوية مضادة للفطريات، ومعملتش معاكي أي نتيجة.
4. ألم قوي في منطقة الحوض.
5. زيادة درجة حرارة الجسم.

جفاف المهبل 

جفاف المهبل له دور رئيسي في حدوث النوع دة من الالتهابات، ودة لأنه بيحصل بسبب قلة إفراز هرمون الاستروجين.

علاج التهابات المهبل

معظم العلاج بيكون تحت إشراف الطبيب المختص، لأن كل علاج مخصص لأعراض معينة والدكتور فقط بنفسه اللي بيحددها، ولكن في حالة العدوى الفطرية البسيطة ممكن تناول دواء مضاد للفطريات، وبنتأكد من خلال سؤال الصيدلي قبل تناول أي أدوية علشان نعرف الجرعة المناسبة لحالتنا، والتأكد من عدم وجود أي أثار جانبية له علينا.

نصائح لتجنب حدوث العدوى

• اتأكدي من نوعية الملابس اللي بتلبسيها: لازم تهتمي أنك لابسة ملابس قطنية وواسعة.
• غيري الملابس المبللة فورا: وخصوصا لو خلصتي الجيم أو عملتي أي نشاط بدني.
• النظافة الشخصية: وهي سبب كفيل أنه يحميكي من أي مشاكل ممكن تحصل في المنطقة دي.
• البعد عن المنتجات العطرية: حاولي تستخدمي منتجات خالية من العطور في المكان دة، وخليكي عارفة أن المكان دة بينضف نفسه بنفسه بسبب البكتريا النافعة اللي موجودة فيه، وتنضيفه يحتاج لماء فقط.
• الدش المهبلي: لو استخدمتي الدش المهبلي لازم تستعمليه تحت إشراف الطبيب ولمدة محددة.

اقرأ أيضا: أفكار تصميم جلسة بلكونة مميزة ومريحة وعملية.

اقرأ أيضا: افضل فنادق الغردقة لشهر العسل.