النتائج الغير مرضية لتحاليل ما قبل الزواج كيف نتعامل معها ؟

في الوقت الحالي تحاليل ما قبل الزواج بقت جزء أساسي من خطوات الجواز ، يعني مش مجرد إجراء روتيني. لكن خطوة بتضمن سلامة الزوجين ومستقبل عيلتهم الصحية، وللأسف أوقات بتحصل حاجة ممكن تبقى صدمة مش متوقعة، وهي إن التحاليل تطلع نتائجها مش مرضية. هنا بيتحول الموقف من لحظة حماس للحظة توتر. لحظة مليانة حيرة وأسئلة كتير، وللأسف أغلبنا مش بيعرف يتعامل معها. ودا طبيعي لأنه أول مرة يتعرض ليها. وفي المقال ده هنساعدكم ونشرح إزاي نتعامل مع النتائج الغير مرضية لتحاليل ما قبل الزواج بطريقة عملية، وبهدوء بعيد عن القرارات اللي ممكن تكون متسرعة.

التعامل مع النتائج الغير مرضية لتحاليل ما قبل الزواج

في البداية نتمنى أن محدش فينا يقع في المشكلة دي. وأننا منكنش محتاجين للحلول دي، لكن لازم نعرفها عشان نقدر نتصرف صح. لو واجهنا المشكلة، ولازم نكون متأكدين أن الجواز مش مجرد خطوة هناخدها وتخلص. دا بداية حياة تانية ورحلة جديدة يعني لازم نبدأ صح ومن غير أي مخاطرة على حياتنا. أو حياة ناس نتمنى أنهم يكونوا بخير، عشان كدا لازم نركز ونفهم النصايح الجاية كويس.

ما هي تحاليل الزواج في مصر؟

١-الفهم الجيد للمشكلة قبل اتخاذ القرار

في حالة مواجهة مشكلة النتائج الغير مرضية لتحاليل ما قبل الزواج لازم نفهم المشكلة كويس قبل ما ناخد أي قرار، يعني لما تلاقي النتيجة فيها مشكلة، أول حاجة لازم تعملها إنك تاخد نفس عميق وتفهم الموضوع. ولازم تعرف أن مش كل نتيجة غير مرضية معناها كارثة. أوقات بيكون فيه حاجات بسيطة زي نقص فيتامينات. أو احتمالية أمراض وراثية مش شرط تتحقق، وهنا الأفضل إنك تراجع مع دكتور متخصص يشرحلك معنى النتيجة بالتفصيل.

٢-استشارة طبيب مختص

طبعاً دي نصيحة ضرورية جداً؛ لأن مش كل دكتور ممكن يقدر يفسرلنا التحليل بشكل دقيق، عشان كدا نحاول ندور على دكتور متخصص في الأمراض الوراثية. أو طبيب نساء وتوليد لو الموضوع ليه علاقة بالإنجاب؛ لأن الطبيب ده هيساعدنا نفهم تأثير النتيجة على حياتنا الزوجية وعلى صحتنا وصحة الأولاد في المستقبل.

التحاليل المطلوبة للزواج في مصر

٣-عدم التسرع في الحكم

كتير من الناس لما يلاقوا النتائج الغير مرضية لتحاليل ما قبل الزواج بيبقوا متوترين جداً . ويفكروا في أسوأ الاحتمالات، زي فسخ الخطوبة. لكن الحقيقة إن مش كل مشكلة معناها إنكم مينفعش تكملوا مع بعض. أوقات بيكون فيه حلول زي علاجات أو إجراءات معينة تقلل من تأثير المشكلة، عشان كدا ناخد وقتنا ونسأل روحنا: هل المشكلة دي فعلاً تمنع الزواج ولا مجرد تحدي ممكن نواجهه سوا؟ وبعدها نبدأ نقرر.

٤-التحرر من الضغوط الخارجية

وقت ما نعرف نتائج التحاليل ياريت لو مش كويسة منعرفش حد. إلا لما نقرر ونتأكد وندرس كل حل ممكن، ولو للأسف الأهل عرفوا فلازم نفهم إن القرار ده خاص بينا إحنا الاتنين، مش بأي حد تاني، ولازم منخليش الخوف من كلام الناس أو الضغط الاجتماعي يخلينا ناخد قرار متسرع ممكن نندم عليه بعدين، ولازم نكون عارفين أن نصايح الأهل هنا مش معناها كراهية الطرف التاني. لأن دافعهم دلوقتي هو الخوف علينا. عشان كدا لا نتأثر برأيهم ولا كمان نكرههم.

٥-التواصل مع شريكك

لازم وقت ما نكتشف المشكلة نحاول أننا نتواصل مع الطرف التاني بصراحة. ونحاول أنه يكون بينا نقاش عقلاني. يعني لازم ندرس الحلول كويس. وكمان نفكر في نتيجة قرار أننا نكمل أو ننفصل. ونحاول نختار أننا نكمل لو في احتمال أننا نتخطى المشكلة، وبلاش يكون قرار الانفصال هو القرار الأول والأسهل عندنا. لأن في حلول كتير ممكن نلجأ ليها وتساعدنا نتخطى المشكلة.

التحاليل الطبية قبل الزواج

النتائج الغير مرضية لتحاليل ما قبل الزواج ليست نهاية المطاف

الطب دلوقتي متقدم جداً. وكتير من المشاكل اللي بتظهر في تحاليل ما قبل الزواج ليها حلول. زي الأمراض الوراثية مثلاً لو فيه احتمال وراثة مرض معين، ممكن يكون فيه تقنيات زي فحص الأجنة قبل الحمل؛ لتجنب انتقال المرض. كمان مشاكل الإنجاب لو فيه مشكلة في الخصوبة. فيه علاجات كتير متوفرة زي التلقيح الصناعي أو الحقن المجهري. وكمان الأمراض المزمنة زي السكر أو الضغط، فيه طرق للسيطرة عليها عشان ما تأثرش على الحياة الزوجية، عشان كدا لازم قبل ما ناخد قرار أننا ننفصل أو نكمل نشوف نقدر نتعامل مع المشكلة ولا لأ وبعدها نقرر.