التشنج المهبلي.. اسبابه و4 طرق لعلاجه

التشنج المهبلي من المشكلات الغامضة بالنسبة لناس كتير، واللي ستات كتير بتكتشفها بعد الجواز، وفي الفترة الأخيرة تم تسليط الضوء عليه بشكل أكبر. النهاردة هنتكلم عن أسبابه وأعراضه وعلاجه بطريقة سهلة.

التشنج المهبلي vaginismus

هو انقباض مستمر للعضلات الموجودة في منطقة المهبل بطريقة غير إرادية أثناء العلاقة الجنسية أو الكشف الطبي لمنطقة الحوض.

اعراض التشنج المهبلي

تتمثل أعراض تشنج المهبل في جزئين وهما:

1. عدم راحة في منطقة المهبل، وبتكون فترة مؤقتة أو لعدة دقائق.
2. ألم شديد غير محتمل، وفي الحالة دي لازم تستشيري الطبيب المتخصص.

متى تظهر اعراض التشنج المهبلي؟

•  في بداية الزواج بسبب ممارسة العلاقة الزوجية لأول مرة، وفي معظم الأحيان بيختفي بعد كدة.
• دخول جسم غريب داخل المهبل على سبيل المثال: العضو الذكري أو السونار المهبلي أو التامبون tampon وهو بديل للفوط الصحية أثناء الدورة الشهرية.

اسباب التشنج المهبلي

مفيش سبب علمي وطبي وعضوي واضح من وجهة نظر الأطباء لحد دلوقتي للمشكلة دي، ولكن يوجد احتمالات مختلفة على سبيل المثال:

1. مشكلة بدنية زي عدم ممارسة الرياضة.
2. مشكلة نفسية زي الاكتئاب، ووجود تجربة جنسية مؤلمة سابقة .
3. مشكلة جنسية من الزوج أو الزوجة.
4. التهابات المهبل.
5. عدم معالجة عدوى الخميرة yeast infection.

فرقي كويس!

لازم تعرفي ايه المشكلة اللي عندك وتفرقي مثلا بين مشكلة تشنج المهبل وجفاف المهبل، ودة بيبان من خلال زيارة طبيبة النسا وشرح الأعراض اللي عندك.

ما هي عدد حالات التشنج المهبلي؟

للأسف لحد دلوقتي صعب تحديد عدد المصابات بيه، ودة لأن ستات كتير بتتحرج وبتخاف تقول أن عندها مشكلة جنسية خاصة.

علاج التشنج المهبلي

زي ما قولنا من شوية أن بيكون فيه كذا احتمال للإصابة بتشنج المهبل، وبناءا على كل سبب بيحدد الطبيب طرق العلاج.

العلاج الطبيعي

يساعد العلاج الطبيعي في حل مشكلة انقباض العضلات، وذلك عن طريق عمل بعض التمارين لارتخاء عضلات قاع الحوض، ومن أشهر تمارين الحوض هي تمارين كيجل، واللي ممكن تعمليها في البيت بكل سهولة.

موسعات المهبل

هي قطع بلاستيكية مختلفة الحجم تساعد على توسعة منطقة المهبل، وبالتالي بيقل بعدها مشكلة ضيق المنطقة، ولكن لازم تحطي قبلها كريم مخدر علشان متحسيش بألم خصوصا أول مرة استخدام.

العلاج السلوكي النفسي

وهو علاج نفسي خصوصا لو عندك اكتئاب أو قلق من ممارسة العلاقة الجنسية، وبتتكلمي فيه مع دكتور نفسي وتوضحي مخاوفك وقلقك ولغبطة مشاعرك.

العلاج الجنسي

وفي الحالة دي بتروحي أنتي وزوجك لمتخصص في العلاقات الأسرية والزوجية، وبتتكلموا معاه في المشكلة اللي عندكم، ودوره أنه بيحاول يوجهكم لحلول لزيادة المتعة الزوجية، ولو مش بتفضلوا الذهاب لمختص ممكن تحجزوا الجلسة أون لاين.

نصائح قبل وأثناء عمل الفحص بالسونار المهبلي

• استخدمي مخدر موضعي زي كريم ليدوكايين lidocaine أو التراكيين ultracaine أو إيملا emla.
• أثناء الفحص حاولي متركزيش مع شكل جهاز السونار.
• خدي نفس عميق كل شوية، وحتحسي في الوقت ده أنك في حالة استرخاء ومش متوترة ولا فيه ألم شديد.

معلومة مهمة!

مش شرط يكون التشنج المهبلي سبب ألم أثناء فحص منطقة الحوض، ولكن بيكون فيه مشاكل عضوية أخرى تسبب وجود ألم أثناء الفحص.

ليه ناس كتير بتتكسف تتكلم عن تشنج المهبل؟

لأننا مجتمع شرقي وناس كتير تعتقد أن الشكوى من وجود مشكلة في العلاقة الزوجية هي حاجة “عيب” وميصحش أي حد يتكلم فيها، أو حتى يروح لدكتور لمعرفة سبب المشكلة.

وبالتالي الفكرة دي تتوارث مع الأجيال، ولكن في عوامل كتير أظهرت المشكلة على سبيل المثال: الانترنت ومواقع التواصل الاجتماعي والتلفزيون. والمهم تكوني عارفة أن عدم علاج المشكلة بيزودها، ودة حيأثر على حياتك الزوجية والنفسية والجسدية.

اقرأ أيضا: فساتين زفاف 2025 | نظرة على أحدث صيحات بيوت الأزياء المصرية.

اقرأ أيضا: جفاف المهبل … أسبابه وأعراضه و 3 طرق لعلاجه.