التخطيط للفرح خلال الخطوبة نصايح تساعدك في تنظيم أفكارك

لو كنت لسة مخطوبة جديد غالباً هيكون من المغري ليكي إنك تبدأي التخطيط للفرح خلال الخطوبة.

خصوصاً وإن أكيد كل قرايبك وصحابك من أول لحظة في إعلان خطوبتك بيسألوكي الفرح هيبقى امتى وفين وهتعملي فيه ايه؟ وهتلبسي ايه؟

بس دي حاجة مننصحكيش بيها، هيكون ضغط كبير أوي عليكي إنك تبدأي تخططي لحفل الزفاف من أول لحظة في خطوبتك!

وبغض النظر عن مدى صعوبة الموضوع بالنسبة لك، لكن حاولي تمسكي نفسك شوية، واستني.

ادي لنفسك ولعريسك وقت تستمتعوا فيه بلحظات من السعادة والقرب في خطوبتكم اللي مش هتتكرر تاني.

الحاجة الوحيدة اللي ممكن تكونوا محتاجين تناقشوها من الأول وتاخدوا قرار مبدأي فيها هي إنكم هتاخدوا مدة قد ايه في فترة خطوبتكم؟ وإجابة السؤال ده هي اللي هتحدد هتبدأوا امتى في التخطيط للفرح خلال الخطوبة.

وعلى هذا الأساس هتحددوا جدولكم الزمني وتقرروا هتقضوا وقت قد ايه مع بعض من غير ضغط التخطيطات والترتيبات؟

وعشان كدة في المقال ده احنا هنحاول نساعدكم بأفكار تقدروا تستخدموها في تحديد جدولكم الزمني وايه اللي تقدروا تعملوه في كل فترة؛ فتابعوا معانا المقال.

لو فرحك بعد سنتين:

لو لسة بتتعرفوا على بعض جديد ومحتاجين وقت تكتشفوا فيه بعض وتفهموا بعض.

فممكن تكونوا قررتم تاخدوا وقت كافي للتعارف في خطوبتكم.

فلو كان قراركم إن خطوبتكم تستمر لمدة سنتين مثلاً عشان تبقوا عرفتوا بعض كويس.

فده معناه إن قدامكم وقت طويل على ما تبدأوا التخطيط للفرح خلال الخطوبة.

وكمان ده هيديكوا براح كافي لما تبدأوا تخططوا بالفعل؛ لإنكم مش هتكونوا مزنوقين في الطلبات والحجوزات.

هيبقى قدامكم وقت كافي لحجز اليوم اللي يناسبكم في القاعة وتتفقوا مع مكاتب تنظيم الأفراح برواقة.

لإنهم غالباً بتكون حجوزاتهم مفيهاش وقت لما بيتحجزوا قبلها بكام شهر بس.

وده معناه إنكم مش هتحتاجوا تبدأوا تخططوا لفرحكم قبل شهرين تلاتة على الأقل تقدروا تستمتعوا فيهم بلحظات وذكريات الخطوبة براحتكم.

التخطيط للفرح خلال الخطوبة لو الفرح بعد أكتر من سنة:

عادة فترة الخطوبة بتمتد لـ 13 أو 14 شهر، ودي مدة كويسة ومناسبة جداً.

فلو دي المدة اللي اختارتوها لخطوبتكم؛ فتقدروا تستنوا شهر على الأقل قبل ما تبدأوا تخطيط.

الفترة دي هتديكي وقت كافي إنك تستمتعي بخطوبتك، لكن متطوليش عشان متفقديش حماسك.

بمجرد ما تحسي إنك بدأتي تكوني مستعدة تاخدي خطوات في تخطيط الفرح ابدأي فيه.

وده لإن مش هيكون حلو إنك تزنقي نفسك لحد آخر لحظة، وتضطروا تخططوا للفرح كله دفعة واحدة.

انت عندك وقت كافي للتفكير والتخطيط؛ فحاولي تستغليه صح، ابدأي بتحديد ميزانية الفرح مع عريسك وتقدير عدد الضيوف اللي هتعزموهم.

بناء على ده ابتدوا دوروا على المكان اللي هيناسب ميزانيتكم ويكفي معازيمكم.

ونظراً للمدة الكافية مش هيكون أماكن كتير محجوزة وهتقدروا تلاقوا الحجز اللي يناسبكم بسرعة.

ولو الفرح بعد أقل من سنة:

يمكن في أسباب كتير تخليكم عايزين تتجوزوا في أقل من سنة، زي إنكم اتخطبتم في ديسمبر وحابين الفرح يكون في أجواء الخريف مثلاً.

وأكيد مش عايزين تستنوا سنتين على ما الخريف اللي بعده يجي، لكن حتى لو هتتجوزوا في فترة قصيرة أقل من سنة فده مش معناه إنكم مضطرين تفكروا في تفاصيل الفرح من دلوقتي.

تقدروا تستنوا أسبوعين على الأقل قبل ما تبدأوا تفكروا في التخطيط للفرح خلال الخطوبة، ومش مضطرين في الوقت ده إنكم تردوا على أي استفسارات من أي حد أو تدوا لهم تصورات وأفكار ثابتة عن اللي هتعملوه في فرحكم.

لسة قدامكم وقت كافي تقدروا تخططوا فيه براحتكم؛ فاستمتعوا بخطوبتكم في الوقت البسيط ده واسترخوا شوية قبل ما تدخلوا على الضغوطات اللي جاية.

التخطيط للفرح خلال الخطوبة لو فرحكم بعد تلات شهور بس:

قدامك عشر دقايق بس تستمتعي فيهم بخطوبتك، بهزر معاكي طبعاً، بس برضه فعلاً لو ده قراركم إنكم مش هتقضوا فترة خطوبة طويلة؛ ففعلاً هتبقوا مضطرين تبدأوا التجهيزات بسرعة.

حطي في اعتبارك إنك مش هتقدري تنجزي كل حاجة في مدة أسبوع مثلاً؛ فتقدري تريحي كام يوم بعد خطوبتكم، وتبدأوا تخطيط بعد كدة.

في النهاية نتمنى إننا نكون قدرنا نفيدك في تنظيم أفكارك عن التخطيط للفرح خلال الخطوبة، ونتمنى لك بداية موفقة، وفرح سعيد.