التخطيط لشهر العسل في زحمة المواسم والأعياد
التخطيط لشهر العسل من أكتر الحاجات اللي بيهتم بيها أي عروسين لدرجة إن في عرسان بيلغوا الفرح عشان يوفروا تكاليفه لرحلة شهر عسلهم.
لكن لو صادف ميعاد جوازكم وقت موسم أو أعياد الناس بتسافر فيها عادة وكمان الجواز بيزيد فيها.
فده معناه إن ضغط الحجوزات هيزيد وده بيترتب عليه برضه ارتفاع الأسعار لأماكن كانت أسعارها أقل تكلفة في الوقت العادي نظراً لإن الطلب عليها مكنش شديد.
وده أحياناً بيخلي بعض الوجهات السياحية اللي بيكون عليها إقبال في المواسم والأعياد حجوزاتها خلصانة لسنة أو سنتين قدام.
في حين إنها في الأوقات العادية ممكن تلاقوا حجز في نفس المكان ده قبل سفركم بست شهور بس أو أقل.
واحنا هنا مش بنتكلم عن مصر بس؛ لإن الوضع في مصر أسهل كتير الحقيقة.
لكن كلامنا أكتر عن لو هتسافروا تقضوا شهر عسلكم برة في دولة أوروبية أو أمريكية.
طبعاً أسهل قرار ممكن تاخدوه هو إنكم تغيروا ميعاد جوازكم أو تأجلو رحلتكم لوقت أهدا.
وده عشان ميكونش في فترة المواسم والأعياد، بس حتى لو مكنش هينفع تعملوا ده وتغيروا خططكم.
فلسة فيه إمكانية إنكم تقدروا تخططوا لرحلتكم صح عشان تستمتعوا بيها لآخرها.
وفي المقال ده احنا حاولنا نجمع لكم أهم النصايح اللي ممكن تعتمدوا عليها عشان توصلوا لأقصى استفادة من فلوسكم اللي هتصرفوها في رحلتكم اللي استنتوها كتير.
فتابعوا معانا المقال.
التخطيط لشهر العسل بالحجز في أقرب وقت:
عشان تقدروا تضمنوا انكم تلاقوا الحجوزات اللي انتم عايزينها في أي مكان حابين تقضوا فيه شهر عسلكم يبقى لازم تخططوا لده من أول لحظة.
فأول ما تقرروا ميعاد جوازكم لازم تبدأوا في حجز رحلتكم.
فكل ما بدأتوا تخططوا من بدري كل ما لاقيتوا حجوزات أكتر تقدروا تختاروا منها اللي يناسبكم.
ولازم تاخدوا بالكم من مواعيد معينة بتكون المناسبات مختلفة فيها برة عن مصر.
يعني مثلاً الفترة من 18 ديسمبر لحد 4 يناير دي أهم فترة أعياد في كل دول الغرب تقريباً.
الفترة دي لو هتحجزوا فيها؛ فلازم تعرفوا إن أسعار حجوزاتها بتكون ضعف السعر عن أي وقت تاني خلال السنة.
ده غير إنها بتحتاج حجز قبلها بسنتين أو تلاتة، أما لو حابين تزوروا مناطق إستوائية؛ فهيبقى أفضل إنكم تختاروا فترة الصيف.
الفترة دي عادة ضغط الحجوزات فيها بيكون أقل، بس مش أوي يعني، هتحتاجوا بس تحجزوا قبلها بعشر شهور أو سنة.
الاستعانة بوكالات سفر:
ممكن تفكروا إنكم لو حجزتوا بنفسكم في التخطيط لشهر العسل ده يكون أريح ليكم.
وإنه هيديكم حرية أكبر في إنكم تعملوا أي حاجة انتم عايزينها في أي وقت.
وده يخليكم مش ملزمين ببرنامج لرحلة سفر مع وكالة سفريات سياحية مثلاً، ويمكن ده حقيقي فعلاً.
بس في جانب تاني من الموضوع، وهو إن وكالة السفريات بيكون عندها علاقات شغل متبادل مع الفنادق وشركات الطيران وأماكن الترفيه والحجوزات عموماً.
وده بيخليهم يقدروا ياخدوا خصومات كويسة وكمان بتضمن لهم فترات حجوزات ثابتة حتى في وقت الضغط.
فبالتالي هتقدروا تحجزوا بسهولة عن طريقهم.
كمان وكالات السفر تقدر توفر لكم مزايا إضافية قيمة متقدروش تاخدوها لوحدكم بشكل مجاني.
والمزايا دي ممكن تكون زي جلسات مساج وساونا للعرسان، أو وجبات إضافية، أو هدايا تذكارية رومانسية مخصصة لرحلات شهر عسل.
التخطيط لشهر العسل في أماكن جديدة:
الأماكن المشهورة والمعروفة هي اللي عادة بيكون عليها ضغط حجز عالي.
فحتى لو هتسافروا أوروبا أو أمريكا تقدروا تختاروا وجهات مش مشهورة.
الميزة في الأماكن دي إن محدش كتير يعرفها؛ فمبيكونش عليها حجوزات كتير، وأسعار الفنادق فيها هتبقى أرخص كتير.
ده من ناحية الحجز والأسعار لكن حتى من ناحية جودة رحلتكم نفسها؛ فده هيديكم ميزة انكم رحتم أماكن جديدة محدش راحها قبلكم وخرجتم عن الرحلات التقليدية المعتادة.
ده غير إن في أحيان كتير بيكون فيه وجهات سياحية مشهورة مقفولة بقالها فترة بسبب تجديدات أو إصلاحات أو أي أسباب من دي.
ممكن تتابعوا الوجهات دي لو أعلنوا عن إعادة فتحها في وقت قريب من وقت رحلتكم؛ فهتقدروا تحجزوا فيها بمنتهى السهولة وبأسعار أرخص من المعتاد.
خليكم واقعيين وانتم بتخططوا:
متخلوش التخطيط لشهر العسل ياخدكم بعيد وتلاقوا نفسكم خططوا لحاجات كتير لا ميزانيتكم ولا وقتكم هيسمح انكم تنفذوها.
بداية من الميزانية لو حسيتوا إن ميزانيتكم مش هتقدر تغطي الرحلة اللي بتحلموا بيها؛ فممكن تطلبوا من أهلكم وأصدقائكم المقربين إن هدية جوازكم تكون عبارة عن مساهمة منهم في تكاليف رحلتكم.
أما في الرحلة نفسها؛ فمتهلكوش نفسكم في الجري طول اليوم عشان تشوفوا أكبر قدر ممكن من المعالم السياحية في المكان.
متنسوش إن الرحلة دي مش بس سياحية وإنما عشان تقربكم لبعض أكتر وكمان لازم تحسوا فيها بالراحة والاستمتاع مش التعب والإرهاق.
عشان كدة متنسوش وانتم بتخططوا انكم تعملوا حسابكم في وقت تقضوا لنفسكم وراحتكم، زي إنكم تقضوا يوم في السبا، أو جولة هادية في حدائق طبيعية مع غداء بسيط.
وفي النهاية نتمنى إننا نكون قدمنا لكم نصايح تقدر تساعدكم في التخطيط لشهر العسل في زحمة المواسم والأعياد.
ونتمنى لكم رحلة سعيدة تكون أحلى بداية لحياتكم الجديدة مع بعض اللي تدوم بينكم للأبد.
هل محتوى المقال دة كان مفيد بالنسبة لك؟
نعم، مفيد!لا!
