تجهيزات العروسة قبل الفرح بشهرين

تعتبر تجهيزات العروسة قبل الفرح بشهرين من الحاجات المهمة جدًا، لأنها بتوفر عليها التعب والجهد أيام الفرح. وطبعًا كل عروسة بتحلم يكون فرحها مميز ومختلف عن كل الأفراح اللي حضرتها قبل كدا. والأهم إنها تبقى جميلة والكل يعجب بتفاصيل يومها، بداية من الفستان للمكياج لتسريحة الشعر، وحتى صالة الفرح والديكورات وشكل التورتة وبطاقات الدعوة.

وطبعًا استحالة ننسى الأوراق والإجراءات الصحية اللي بيطلبها المأذون قبل كتب الكتاب. فلو أنتِ فرحك قريب المقال دا مهم جدًا لأننا جمعنالك كل التفاصيل المهمة.

تحضيرات جهاز العروسة

احنا كمصريين مشهورين بموضوع جهاز العروسة عن أي دولة عربية تانية. لأن العرب أغلب التجهيزات على العريس، أما العروسة فالمطلوب منها بس شنطة ملابسها ومتعلقاتها الشخصية.

في مصر الموضوع مختلف تمامًا، وبيتم تقسيم التجهيزات بين العريس والعروسة، مع اختلافات بسيطة بين المحافظات. في بعض الأقاليم بيتخطى أهل العروسة حدود العقل والمنطق في التجهيزات، خاصة في الأرياف، اللي بيجهزوا بنتهم من الإبرة للصاروخ حرفيًا.

ويعتبر يوم نقل العفش أو شوار العروسة في الأرياف كرنفال بيتباهو فيه على بعض. وبيوصل الأمر بالبعض إنهم بيحملوا الجهاز في 10 عربيات نقل، مع الطبل والزمر والزراغيط من بيت العروسة لبيت العريس، اللي أحيانًا بيكون بينهم مسافة لا تقل عن 50 كيلو. المهم إن الكل يسمع ويشوف كمية العفش اللي جابها أبو العروسة ويتحاكوا فيها أربعين ليلة وليلة.

تجهيزات العروسة قبل الفرح بشهرين

تعالي بقى يا عروسة أقولك الحاجات المهمة في التجهيزات:

تجهيزات المطبخ

 ركزي على الحاجات المهمة اللي بجد هتستخدميها، بلاش موضوع كل حاجة نجيب منها طقمين وثلاثة، صدقيني كله بيتركن بالسنينن، وتضييع فلوس على الفاضي، فبلاش تزوديها على أهلك، ولو هما اللي عايزين يجيبوا كتير، إنت قولي كفاية، السعادة والطمأنينة مش بالجهاز الكثير أبدًا.

ودي قائمة بالأشياء المهمة في المطبخ:

الأجهزة الكهربائية: في حاجات ضرورية زي الثلاجة، غسالة الملابس، غسالة الأطباق، البوتاجاز، الخلاط، الميكروويف، فرن الكهرباء، المكواة. وفي حاجات أقل أهمية ممكن تستغني عنها زي العجان الكهربائي، ساندوتش ميكر، ماكينة قهوة… إلخ.

 المهم، اختاري أجهزة ماركتها كويسة، وفي الكهرباء بالذات اختاري الأنضف حتى لو غالي.

الحلل: اختاري طقم حلل أو طقمين كفاية على حسب استخدامك، المهم تختاري أنواع جودتها عالية وصحية. انصحك تدخلي يوتيوب وتشوفي مراجعات كثيرة قبل ما تقرري الماركة اللي هتشتريها.

المعالق والشوك والسكاكين: ممكن تشتري شنطة فيها كل دا، وممكن تشتري كل حاجة لوحدها، وبلاش الشنط الغالية قوي، صدقيني محدش هيركز في سعر المعلقة.

الأطباق: بلاش تتشتري 15 ألف طقم، طقمين كفاية جدًا، وبلاش الصيني اللي بـ 100 ألف. المهم الذوق يبقى عالي، ويكون في حس فني وإنت بتختاري كل قطعة.

الرفايع: اوعي يغرك الاسم، هي رفايع اه، لكن هتفضلي تشتري كل ما تنزلي، لحد يوم الفرح. بلاش رفايع ملهاش لازمة ركزي في اللي فعلًا هتستخدميه.

الملابس والمفروشات

الملابس: طبعًا أهم جزء في تجهيزات العروسة قبل الفرح، اختيار ملابسها، وبتشمل ( ملابس الخروج، ملابس المنزل، الشنط والجزم، الإكسسورات ). بلاش تشتري كثير، لأن كل يوم بتظهر موضة جديدة.

 أهم حاجة في ملابس النوم، بلاش عدد كبير لأن ممكن يكون ذوق جوزك مختلف عن اللي اختارتيه. انصحك اشتري الأشكال والخامات والألوان اللي تناسب جسمك وتظهر جمالك.

المفروشات: مفارش السرير، كفاية جدًا 5 أطقم. الفوط كفاية 10، مع 2 لحاف.  بلاش الأعداد الخيالية اللي بتفضل في الدولاب لحد ما تجوزي عيالك.

تجهيزات يوم الفرح

 القاعة: طبعا قاعة الفرح لازم تتحجز قبلها بشهرين على الأقل، خاصة في موسم أفراح زي الأعياد والصيف. وطبعًا مع القاعة هنختاري تورتة الفرح والمشروبات والضيافة اللي هنقدمها للمعازيم، وديكورات معنية لو حابين.

ومصر مليانة بمستويات مختلفة من القاعات وصالات الأفراح تناسب كل الفئات. وطبعًا ما ننساش إن اختيار القاعة حسب حالة العريس المادية، يعني ممكن تكون صالة في أفخم فندق، أو قاعة أفراح عادية، وعلى فكرة هنا هنتبسط وهنا هنتبسط يا عروسة، المهم اختيار العريس يكون صح.

بطاقة الدعوة: كرت دعوة الفرح من الحاجات اللي لازم نختاريها بدري، علشان تتفقي مع العريس على شكل التصميم والكلام المكتوب. وعلى فكرة ممكن كرت بسيط مش لازم غالي، وافتكري إنه في الآخر معظم المعازيم بيرموه في الزبالة.. وفري يا عروسة!.

وعلى فكرة ممكن تعملي تصميم رقمي وترسليه على مواقع التواصل، كدا عريسك هيحبك قوي!

 الفستان: اختيار الفستان ضروري وأهم جزء في تجهيزات العروسة قبل الفرح بشهرين. لأنه بياخد وقت في اختيار التصميم ونوع القماش، وشكل الإكسسوارات اللي هتلبسيها معاه.

 ميك اب ارتيست: اوعي تنسي تحجزي قبلها بفترة، خاصة لو في حد معين نفسك يعملك المكياج. وكمان علشان تختاري معاه شكل الميكاج، وتنفذي نصايحه الخاصة بروتين العناية بالبشرة.

فوتوغرافر: علشان تعملي فوتوسيشن حلوة ومميزة، تحتفظي بها طول العمر ويشوفها أولادك.

التحضيرات الشخصية

دا أهم جزء ممكن تصرفي فيه الفلوس اللي نصحتك توفريها في الجهاز، لأن شكلك وجمالك أهم جزء في تحقيق سعادتك الزوجية وتعلق جوزك بيكي.

العناية بالبشرة: بتشمل العناية بالبشرة وجهك، وجسمك، وايديكِ.

أولًا الوجه: لازم تعملي روتين مناسب لبشرتك، والأفضل تستشيري طبيبة جلدية وتمشي معاها على الخطوات. وغالبًا الروتين بيكون عبارة عن ( إزالة الشعر، غسول مناسب لبشرتك، مرتب كويس، ماسك لشد الوجه وتجديد البشرة، واقي شمس ).

ثانيًا الجسم: خليني أقولك إن العناية بجسمك المفروض تكون دايمة، أو حتى قبل الفرح بـ 6 شهور على الأقل. لكن كمان نلحق قبلها بشهرين مش عايزاكي تقلقي خالص.

وبتشمل العناية بالجسم ( الليزر لإزالة الشعر، تقشير المناطق الداكنة، ترطيب، حمام مغربي لإزالة الجلد الميت)، وأهم نقطة الترطيب بعد كل استحمام بيفرق جدًا في نعومة البشرة ولمعانها.

العناية بالأظافر: ضوافر إيدك ورجلك بيعبرو عن مدى اهتمامك بنضافتك الشخصية، ولازم العناية بيهم تكون قبل الوجه والجسم.

العناية بالشعر: لو عندك مشاكل معينة في شعرك لازم تتعالج قبل الفرح ب، 6 شهور على الأقل. لكن ممكن نعمل حمام كريم، ومسكات علشان يكون شكله صحي أكثر. ولو شعرك كيرلي ممكن تفرديه بمواد فرد زي البروتين والكيرياتين، وإن كنت ما انصحش أبدًا بدا. وعلى فكرة الشعر الكيرلي جميل، المهم يكون لايق عليكي وتهتمي به.

ملاحظة: ممكن تعملي كل دا في البيت وتوفري مبلغ كبير على عريسك أو تستخدموه في شهل عسل في مكان مميز.

الإجراءات والأوراق المطلوبة

طبعًا قبل كتب الكتاب في شوية أوراق لازم تكون جاهزة زي:

البطاقة الشخصية، و3 صور منها.

بطاقة وكيلك ( والدك، عمك، خالك.. )، وصورة منها.

شهادة صحية من مستشفى حكومية فيها طب أسرة وتقدري تعرفي اقرب مكان ليكي من الموقع الرسمي لوزارة الصحة لفحص المقبلين على الزواج بالضغط هنا.

وثيقة طلاق لو كنت مطلقة، ولو كنت أرملة وثيقك زواجك ووثيقة وفاة الزوج.

6 صور شخصية.

دي كانت أهم النقط في قايمة تجهيزات العروس قبل الفرح بشهرين. وفي حالة التأخير، فلازم على الأقل تنجزي القايمة قبل الفرح بأسبوعين. علشان تدخلي أيام الفرح وأنت مرتاحة وذهنك صافي، وتقدري تستمتعي بكل لحظة.