تجهيزات العروسة يوم الفرح 2024

تجهيزات العروسة يوم الفرح من أكثر الحاجات اللي بتكون شاغلة تفكيرها قبلها بفترة طويلة. وتقريبًا قبل الفرح بأسبوع على الأقل لازم تكون مرتبة كل الأمور علشان تكون مطمنة ومرتاحة وتعيش فرحتها باستمتاع واسترخاء.

يوم الفرح هو أسعد يوم في حياة أي بنت، اليوم اللي بتفضل تتخيله ومستنياه، وراسمة كل تفاصيله في خيالها. وطبعًا بتكون كل التفاصيل كأنها حلم جميل بتتمنى فعلًا تعيشه. احنا كمان عايزينك تتبسطي وتعيشي الفرحة لآخرها، علشان كدا هنراجع معاكي كل تفاصيل اليوم، اقرأيها كويس.

قبل الفرح بيوم

بصي تجهيزات العروسة يوم الفرح تعتبر آخر حاجة. الموضوع بيبدأ من ليلة الحنة واللي غالبًا بتكون اليوم اللي قبله علطول. تعالي بقى نقولك الخطة:

أولًا: خلصي حفلة الحنة بدري، والأفضل تعمليها قبل الفرح بيومين ثلاثة. لأن يوم الحنة لوحده بيحتاج مجهود جبار وبتكوني خارجة منه مرهقة وتعبانة. ودا مش هينفع خالص، لأن يوم الفرح محتاج تكوني في أعلى نشاطك وقوتك البدنية.

ثانيًا: نامي بدري، بلاش سهر يا عروسة اسمعي مني. على الأقل لازم تنامي 7 ساعات متواصلين وبعمق. يعني بلاش تفكير كثير، لأن كل حاجة هتحصل زي ما ربنا مقدر بالظبط مهما خططتِ أو أرهقتِ نفسك.

ثالثًا: قبل ما تنامي اوعي تنسي روتين بشرتك. اغسلي وجهك بغسول كويس، ورطبيه، وبلاش ماسك جديد ليلة الفرح، علشان ممكن النتيجة تكون عكسية. كمان ما تنسيش ترطبي جسمك كله وايدك ورجلك. والخطوة دي مهمة علشان تكوني مستعدة لوضع الميك اب.

رابعًا: تأكدي من الليل إن كل مستلزمات يوم الفرح تمام، وإن الميك اب ارتيست والفوتوغرافر هيوصولوا على الوقت. وكمان الفستان والطرحة والإكسسورات لازم تراجعيهم وتتأكدي إن كل حاجة مظبوطة وتمام

نصايح للعروسة يوم الفرح

أولًا: يوم الفرح الصبح، اصحي من النوم بكل هدوء، واقعدي مع أهلك واخواتك وصحابك. استمتعي بالفرحة وعيشي أجواء فرحك، لأن اللحظات دي مش هتتعوض وبتفضل في الذاكرة.

ثانيًا: اهدي خالص، وسيبي كل حاجة على اللي حواليكي. اليوم يومك، وصحابك واخواتك موجودين علشان يشيلوا عنك. يعني أنت الملكة وهما والوصيفات بكل معنى الملكة، فاستمتعي.

ثالثًا: افطري كويس، وركزي على الأكل اللي ينشطك ويزود طاقتك. مثلًا بيضة مع قطع خيار وطماطم وعصير برتقان. بعد كدا خدي فنجان قهوة يعلي المزاج ويخلي دماغك في السماء. وطبعًا مش محتاجين نفكرك بشرب المياه، اشربي كتير علشان بشرتك تبقى مرطبة وحلوة.

رابعًا: حاولي تتبسطي على قد ما تقدري، بلاش تركيز على تفاصيل صغيرة مش هتفرق ومحدش هياخد باله منها غيرك. أوقات كثير اللي بيحصل فعلًا بيكون أجمل من اللي خططنا ليه وتخيلناه. هتعرفي النقطة دي بعد ما أجواء الفرح تخلص.

خامسًا: بلاش ننكد على العريس، يعني جو ” اتأخرت ليه.. أنت فين.. كل دا.. ” بلاش منه خالص. هو كمان عنده تجهيزات ومرتبك زيك بالظبط.

سادسًا: خلي تركيزك كله مع نفسك وعريسك، عيشي يومك كأن مافيش فيه غير أنتو الاثنين. بلاش تتأثري بمؤثرات خارجية وتنكد على نفسك وعليه. يعني بنت عمتك أخدت الروج، بنت خالتك قعدت على الفستان، طنط جارتكم لمحتيها هي وبنتها بيغمزوا ويلمزوا… سيبك من كل دا.

احتياجات العروسة يوم الفرح

تجهيزات ومستلزمات العروسة يوم الفرح، على قد ما هي كثيرة لكن بسيطة لو كل حاجة تم تخطيطها كويس. وتعالي يا عزيزتي أفكرك بشوية نقاط تسهل عليك الأمور:

أوضة العروسة: طبعًا الأوضة علشان تجهزي فيها، فلازم تكون واسعة ومريحة. لأن بيكون معاكي صحابك، ومصفف الشعر، وخبير التجميل. فلازم مساحة الأوضة تكون كبيرة علشان تستوعب كل دول، دا غير الفستان ومتعلقاتك الشخصية.  

الفستان: طبعًا الفستان بيكون جاهز ومتعلق، وجنبه الجزمة والطرحة والإكسسوارات. في نقطة مهمة، بوكيه الورد بلاش يجي بدري علشان ما يدبلش، ويا ريت تحطيه في مياه. لكن طبعًا يتنشف كويس قبل ما تمسكيه علشان الفستان.

خبير المكياج: اخرجي من بيتك قبل ما يوصل الفندق، وكوني في انتظاره. وطبعًا قبلها تأكدي عليه وقت وصوله، علشان كل حاجة تتعمل في وقتها بدون تأخير. مش محتاجة أقولك إن شكل المكياج والماركات اللي حابة تستخدميها لازم تحدديها قبل يوم الفرح. الأفضل تشوفي صور كثيرة، وتقرري مع الميك اب ارتيست الشكل اللي يناسب وجهك.  

الفوتوغرافر: دا بقى أهم واحد في الليلة دي كلها، فلازم تختاري حد معروف بصوره وعينه الحلوة. ودا لأنه هيكون مسؤل عن تصوير ألبوم الفرح، وتصويرك أنت وصحابك، وتصوير لحظات تجهيزك.

 نصيحة اتصوري كتير قوي، خاصة اللحظات العفوية بينك وبين صحابك. اطلبي منه ياخد صور لكل حاجة بتحصل طول اليوم، هيكون إحساس حلو جدًا وأنت بتتفرجي عليها في المستقبل.

شنطة شهر العسل: لو هتخرجوا لشهر العسل تاني يوم، فلازم تكوني محضرة الشنطة قبلها. اتأكدي إن فيها كل احتياجات وتجهيزات العروسة من ملابس واكسسورات ومكياج وبرفان. اختاري محتويات الشنطة بدقة، ورتبيها برواق علشان ما تنسيش حاجة.  

وصول العريس

بعد ما تلبسي فستاك وطرحتك، وتخلصي المكياج، بتكوني مستعدة لاستقبال شريك حياتك. حاولي تكون اللحظة الأولى عفوية، سيبي مشاعركم الحقيقية تتكلم وتلقطها عدسات المصور. بلاش تمثلوا حركات علشان هو دا التريند اللي ماشي، مافيش أحلى من التلقائية في اللحظات دي.

بعد كدا بتطلعوا على القاعة، ودي آخر مرحلة من مراحل يوم الفرح. بتطلي زي الملكات والكل بيكون فرحان ليكي ومعاكي. عيشي فرحتك من قلبك واتبسطي مع عريسك زي ما تحبي.

تجهيزات أهل العروسة

الموضوع كبير جدًا، يعني مش بس تجهيزات العروسة يوم الفرح. أهل العروسة كمان بيكون عندهم مهام كثيرة، ومشغولين لأقصى درجة، وعايزين اللي يساعدهم.

أم العروسة: بيبدأ اليوم بدري جدًا لأم العروسة، لأنها بتهتم بتجهيز الشقة وبتتأكد إن كل حاجة جاهزة ومافيش نقص في بيت بنتها. من مستلزمات يوم الفرح المهمة هو أكل العريس والعروسة، والمهمة دي كلها بتكون على أكتاف أم العروسة وخالاتها. واليوم بيمشي كالتالي:

بعد العروسة ما بتخرج من البيت، بتكون والدتها جهزت الأكل أو طلبته من مطعم معين.

كمان بتجهز قايمة من مستلزمات المطبخ والثلاجة ( خضار، فاكهة، عصير، لحوم، جبن، منظفات ).

بعد كدا بتاخد كل دا وبيرافقها حد وبتروح الشقة. بتحط كل حاجة في مكانها، وبتتأكد من فرش البيت بشكل مظبوط.

 وفي طبعًا عادات معينة حسب كل محافظة. في بعض الأقاليم في طقوس محددة لازم يعملوها في بيت العريس والعروسة. زي تشغيل سورة البقرة والرقية، وضع مصحف على سرير العرسان، استخدام بخور.

والد العروسة: بتبدأ مهمته في قاعة الفرح، بيروح بدري قبل المعازيم، وبيوصل مع أهل العريس. وطبعًا بيكون معاه أم العروسة وأهلها، والكل بيستقبل الضيوف. وطول الليلة بيكون واقف على رجله، دا غير فرحته ببنته وزعله إنها هتسيبه في نفس الوقت، يعني بيعيش مشاعر متضاربة. 

أخت العروسة: دي بقى بتعمل أي حاجة وكل حاجة، هي العصا السحرية اللي بتلبي كل رغبات العروسة. دورها بيكون كبير، وبتكون مع أختها طول اليوم، وبتتأكد إن كل حاجة اتعملت من الألف للياء.

أخ العروسة: الإخوات الولاد بقى، حاجة تانية خالص، بيكونوا سند وضهر العروسة. وجودهم ومحبتهم وشكلهم وسط الناس والضيوف مش ممكن يتعوض أبدًا. وإحساس العروسة وهي شيفاهم حواليها بالدنيا كلها.