ازاى تهتمي بنقاء ونضارة البشرة قبل الفرح؟

في فترة التجهيزات اللي بتبدأ بعد الخطوبة بتبدأي تشوفي اللي ناقصك، ودة بيخليكي تنزلي بشكل يومي وممكن تفضلي اليوم كله برة البيت، خصوصا كمان لو بتشتغلي، فالموضوع حيكون صعب، طب سألتي نفسك عن نضارة البشرة بتاعتك ونقائها؟

النهاردة جاية أفكرك أن قبل أي تجهيزات المهم تكوني بصحة كويسة، وتهتمي بصحة بشرتك اللي حتديكي ثقة كبيرة في نفسك. وحقولك على شوية نصايح حتخلي بشرتك منورة ونضرة، بس المهم تلتزمي بكل النصايح وتخليها في روتين يومك. 

اشربي ماية وحتلاحظي نضارة البشرة في أيام قليلة

ودة عشان الماية بتساعد على ترطيب البشرة، وعشان كدة لازم تشربي على الأقل 2-3 لتر ماية يوميا. والماية أفضل من القهوة والعصاير، ودة لأن مفيهاش سعرات حرارية تزود وزنك. 

ايه علاقة نضارة البشرة بالضغط النفسي؟

بناءا على دراسات علمية، الضغط النفسي بيخلي البشرة تعجز بدري زي ظهور التجاعيد، واللي بتسبب مشكلة كبيرة لستات ياما. والحل في استخدام زيوت عطرية للاسترخاء زي اللافندر والبابونج، وممارسة الرياضة زي المشي. 

استخدمي المرطب المناسب لنوع بشرتك

ودة لأنه بيساعد على استعادة البشرة لنضارتها، وميحصلهاش جفاف بسهولة، وبينصح أطباء الجلدية باستخدام المرطب مرتين يوميا صباحا ومساءا، والمهم تستخدمي مرطب مناسب لنوع بشرتك. 

أمثلة على مرطبات حتفيدك

• هيالورونيك أسيد.
• چيل الصبار.
• مستخلص البابونج.
• البانثينول.

استخدمي ميك أب مصدره معروف

ودة علشان المنتجات مجهولة المصدر بتدمر البشرة، وبتخليها باهتة، وممكن تطلعلك حبوب كمان، وتاخدي وقت طويل في علاجها. 

إزالة الشعر بطريقة تناسب نوع بشرتك

طرق إزالة الشعر لا تعد ولا تحصى، بس لازم تخللي بالك أنك لو استخدمتي طريقة غير مناسبة وخصوصا للوش ممكن تقلل نضارة بشرتك وتطلعلك حبوب واللي ممكن تسبب إسمرار بسبب الندبات اللي بتسيب علامات كتير. 

نامي عدد ساعات كافية كل يوم

لازم تنامي على الأقل 8 ساعات في اليوم، ودة لأن النوم غير المتواصل بيسبب أرق، ومشاكل هرمونية، ومشاكل في البشرة زي التجاعيد، والهالات السودة، وأمراض جلدية زي الاكزيما والصدفية، واللي علاجهم ممكن يستمر معاكي سنين! 

واقي الشمس وعلاقته بنضارة البشرة

واقي الشمس من الحاجات اللي لازم تهتمي بيها في روتين يومك، ولازم يكون في شنطتك وأنتي برة البيت، ودة لأن الشمس بتأثر بشكل كبير جدا على بشرتنا وبتسبب كمان إسمرار، واللي عرايس كتير بتضايق منه خصوصا لو قبل الفرح. 

نصائح قبل ما تستخدمي واقي الشمس

 لازم تحطيه قبل ما تنزلي من البيت بربع ساعة على الأقل، ولازم تجدديه كل ساعتين، والأهم تستخدمي نوع مناسب لبشرتك، وتستخدمي نوع له معامل حماية أو SPF 50 على الأقل. 

جلسة نضارة للبشرة

جلسات نضارة البشرة أو تنضيف البشرة منتشرة جدا في الفترة الأخيرة، وبيوتي سنتر كتير بتعمله في عروض أسعارها كويسة. عشان كدة حابة أقولك أن تنضيف البشرة مهم جدا.

نصائح قبل عمل تنضيف البشرة

مش شرط تعملي تنضيف المراحل بتاعته كتيرة، الأهم أنك تختاري عيادة أو بيوتي سنتر فيها متخصصين في تنضيف البشرة ودكاترة جلدية. وتشوفي ايه اللي بشرتك محتاجاه واعمليه، متخليش حد يضحك عليكي بإعلانات وهمية. 

امشي حتى لو نص ساعة يوميا

المشي بيحسن من الدورة الدموية للجسم والبشرة وبيسبب نضارة للبشرة حتبهرك، وحتخليكي ملتزمة في ممارسة الرياضة. 

أنواع رياضة تانية حتفيد جسمك وبشرتك

• الجري. 
• تمرينات لياقة بدنية في الچيم. 

مكملات غذائية حتساعدك لنضارة البشرة

1. الفيتامينات زي: فيتامين C، وفيتامين E، والبيوتين. 
2. كولاجين وهيالورونيك أسيد لزيادة ترطيب البشرة وتقليل التجاعيد، ولازم يكون تحت إشراف دكتور الجلدية. 
3. الشاي الأخضر ودة لأنه مضاد للبكتريا والالتهابات. 

اقرأ أيضا: تجهيزات شهر العسل للعروسة

اقرأ أيضا: ما هي فحوصات قبل الزواج التي يجب عليك عملها؟