اختيار شفاط المطابخ المناسب لمطبخك اتعرفي على طريقته معانا

اختيار شفاط المطابخ هو خطوة أساسية في تصميم ديكور المطبخ، وده لأهمية أنواع شفاطات المطبخ بشكل عام في انها تساعدك انك تتخلصي من دخان الطبخ وبخاره وروايح الأكل وانت بتطبخي، فمهما قولنا المطبخ ده هيبقى أهم مكان ليكي في البيت، هو اللي هتقضي فيه أطول وقت وانت بتجهزي الأكل ليكي انت وعريسك، وبعد كدة لعيالكم كمان.

وعشان كدة لازم تكوني مرتاحة في الوقت اللي هتقضيه فيه، ومتتخنقيش وتتحري من الدخان والريحة اللي ممكن تملا المطبخ وانت بتطبخي.

وده بالأخص يعني مع أنواع الأكلات اللي بتتشوي أو ليها روايح جامدة.

وده كمان هيخلي المطبخ مكان مريح ممكن جوزك يجي يونسك ويساعدك فيه وهو مرتاح.

وكمان مع وجود أطفال صغيرين هتحتاجي تكون عينك عليهم طول الوقت ومينفعش تسيبيهم لوحدهم وانت في المطبخ لوقت طويل.

وده معناه إنك غالباً هتحتاجي تاخديهم معاكي المطبخ عشان تقدري تاخدي بالك منهم.

فلازم يكون المكان مريح وهواه نضيف عشان ميتخنقوش لإنهم هيتأثروا بسهولة طبعاً عنك.

عشان كدة في المقال ده هنكلمك عن اختيار شفاط المطابخ وأنواعه اللي ممكن تركبيها في مطبخك.

وتساعدك في إنها توفر الجو النضيف الرايق وفي نفس الوقت تكون لايقة على ديكور مطبخك.

فتابعي معانا المقال.

شفاطات المطبخ المروحة:

ده النوع القديم التقليدي من شفاطات المطبخ، واللي بيتركب في فتحة مناسبة لحجمه في حيط خارجي بيطل على الشارع أو منور البيت، وشكله شبه المروحة الكهربا العادية.

وإن كان مش من المفضل اختيار شفاط المطابخ في الوقت الحالي من النوع ده، وده لإنه مش مناسب مع الديكورات الجديدة المودرن.

إلا إنه كشفاط بيقوم بمهمته على أكمل وجه؛ لإنه بيخرج كل الأدخنة والروايح والأبخرة برة المطبخ والبيت كله.

وبتختلف جودة الشفاط من النوع ده على حسب قوة شفطه.

فكل ما كانت قوة الشفط أعلى كان ده أفضل للمطبخ والبيت ككل.

وفي حالة المطابخ الكبيرة ممكن نركب شفاطين من النوع ده؛ لإن شفاط واحد ممكن ميكونش كفاية.

وعلى الرغم إنه مش شيك أوي لاستخدامه في الديكورات الجديدة إلا إنه بيتميز بان سعره بسيط.

فممكن يكون ده الاختيار المناسب ليكم في حدود ميزانيتكم.

اختيار شفاط المطابخ الهرمي:

الشفاط ده بيكون شكله الخارجي شبه الهرم، وده لإنه مزود بفتحة تهوية في أعلى نقطة فيه.

وأحياناً بيكونوا فتحتين، واحدة في الجهة الخلفية وواحدة من فوق، وده عشان تختاروا هتركبوه إزاي؟

فإما إنكم بتركبوه من الفتحة الخلفية في حيط خارجي بيطل على الشارع أو المنور، بحيث يخرج الدخان والريحة عليها.

أو بتركبوه من الفتحة العلوية في سقف ساقط، وبيتركب له مواسير تمشي في السقف ده لحد أقرب حيط خارجي تصرف الدخان والريحة من خلاله،ولكن مشكلة الطريقة دي إنها مش عملية وبتقلل كفاءة الشفاط.

وعادة بيكون فيه برضه فلتر كربون ينقي الجو من الروايح قبل تصريفها.

وده بيزود مزاياه اللي منها إنه كمان شكله شيك جداً في الديكور، وتكلفته بتختلف حسب كفاءته وقوة شفطه.

الشفاط المسطح الكربوني:

أما الشفاط ده فهو بيمتص الروايح بس لكن مبيخرجهاش هي والأدخنة برة البيت.

عشان كدة يعتبر مش عملي في اختيار شفاط المطابخ.

وعلى الرغم إنه يبان أرخص في السعر من الشفاط الهرمي إلا إنه بيحتاج صيانة دورية مكلفة.

وده لإنه بيحتاج تنضيف لفلتر الألمونيوم كل فترة من الدهون والزيوت.

وكمان بيحتاج تغيير الكربون كل ست شهور؛ لإنه بيتملي بالروايح ومبيبقاش قادر يمتص روايح أكتر؛ فبيتعطل.

ومفيش حل بديل لتغيير الكربون، لكن ميزته إنه بيتحط في أي مكان، ومش بيحتاج فتحة في الحيط أو سقف ساقط.

حاجات تخلي بالك منها في اختيار شفاط المطابخ المناسب لبيتك:

من الأفضل إنك تختاري شفاط يكون فيه وحدة إضاءة، وده لإنها هتوفر لك إضاءة مباشرة فوق البوتجاز تساعدك تشوفي أوضح وانت بتطبخي.

ولما تيجوا تركبوا الشفاط خدوا بالكم يكون فيه مسافة 70 سم أو 75 سم بين سطح البوتجاز وسطح الشفاط، وده لإن سطح الشفاط بتتجمع عليه الدهون والزيوت، وبالتالي لو الحرارة زادت النار ممكن تمسك فيه وتحصل حريقة لا قدر الله.

وفي نهاية المقال نتمنى نكون فدناكم فعلاً في طريقة اختيار شفاط المطابخ المناسب لبيتكم، ويساعدك ده إنك تقضي وقت مريح في مطبخك وانت بتجهزي الأكل كل يوم ليكي ولعريسك.