اختيار خامة الستائر المناسبة لديكور عشكم الجديد

اختيار خامة الستائر هي خطوة رئيسية ومهمة في تصميم ديكور أي مكان؛ فمش ممكن نصمم ديكور لأي أوضة من غير ستارة أو سجادة.

والستاير عادة بتأدي وظيفة إنها تكون زي برواز للحيطة.

فلو في حيط في البيت فيه شباك أو بلكونة ومش عليها ستارة؛ فده بيكون عيب كبير في الديكور.

وفي المقال ده هنحاول نعرفكم أنواع قماش الستاير المختلفة ومميزات كل نوع فيهم وعيوبه.

وده عشان تقدروا تختاروا المناسب منها لعشكم الجديد وديكور بيتكم اللي اختارتوه؛ فتابعوا معانا المقال.

نصايح قبل اختيار خامة الستائر:

قبل اختيار خامة الستائر اللي ناوين تستخدموها في ديكور البيت لازم تعرفوا الأنواع والتصميمات اللي هتبقى مناسبة مع ستايل البيت.

يعني مثلاً لو كان ديكور البيت في الأساس معاصر أو مودرن؛ فمينفعش تستخدموا معاه ديكورات ستاير كلاسيك قديمة.

ودي زي الستاير اللي بتعتمد على البلتنكات وقماشها تقيل ونقشاته قديمة.

الستاير دي هتكون مناسبة أكتر لو ستايل ديكور البيت كلاسيك أو نيو كلاسيك.

لكن الاستايل المودرن أو المعاصر بيمشي معاه أكتر استايل الستاير الأمريكية الحديثة.

ودي برضه ممكن تمشي مع استايلات الديكور الكلاسيك والنيو كلاسيك.

وفي الحالة دي بنختار أنواع قماش الستاير اللي تتناسب مع الاستايلات دي زي الستان والحرير والقطيفة أو القطيفة المشغولة.

أفضل أنواع قماش الستاير:

وعشان نقدر نحدد اختيار خامة الستائر المناسبة لديكور البيت لازم نكون عارفين أنواع قماش الستاير والفرق بينهم وايه الأنسب منهم لكل ديكور؟

ويعتبر الساتان من أكتر أنواع قماش الستاير المنتشرة، وهو قماش لامع، وممكن تختلف درجة لمعانه على حسب ذوقكم في ديكور بيتكم.

وبيتميز قماش الستان في الستاير إنه قوي وبيتحمل فمبيتقطعش أو يدوب بسرعة.

وكمان لازم تركزوا في انكم تختاروا منه اللي ينفع يتغسل ويتحمل الغسيل؛ لإنكم أكيد هتحتاجوا تغسلوا الستاير كل فترة.

أما في حالة انكم اخترتوا ستاير من الأقمشة الطبيعية زي الحرير والقطن والكتان؛ فعلى الرغم من كونها خامات راقية وغالية جداً، إلا إنها مش عملية.

وده لإنها مصنوعة من خامات طبيعية بتكون صعبة في التنضيف والغسيل، ومبتتحملش الكيماويات ومنظفات الغسيل.

كمان بتحتاج لعناية خاصة بعد الغسيل زي ستاير الكتان اللي بتحتاج إنها تتكوي قبل ما تتعلق تاني عشان تحافظ على شياكتها وأناقتها.

وفيه كمان الستاير القطيفة المعروفة بشياكتها وأناقتها في ديكور البيت، وكمان كثافة قماشها بيمنع دخول نور الشمس للأوضة وقت النوم.

ولكن عيبها انها بتحتاج تتنضف كتير لإن القطيفة بتلم تراب طول الوقت، كمان عشان تضمنوا جودتها لازم تختبروها قبل ما تشتروها.

وده بإنكم تمرروا ايدكم عليها، لو طلع منها وبر؛ فده معناه ان القماش من نوع رديء.

وكمان لو اختيار خامة الستائر من القطيفة كان هو قراركم؛ فلازم تعملوا حسابكم تشتروا لها مواسير ستاير قوية عشان تتحمل وزنها التقيل.

وآخر نوع في أنواع قماش الستاير هو البلاك أوت، وده نوع عملي جداً، وبيليق على الديكورات المودرن والمعاصرة.

وهي عبارة عن ستارة بتتكون من طبقتين قماش من قدام ومشمع من ورا، وبالتالي مبتحتاجش معاها بطانة للستارة.

وده برضه بيخليها ممتازة في تضليم الأوضة بالنهار، وكمان بتحجب الرؤية جوة البيت للجيران.

وبتتميز أنها منتشرة بألوان كتير وده يخليها تقدر تليق على أي ديكور وألوان في بيتكم.

نصايح إضافية في اختيار خامة الستائر:

من الأفضل انكم تختاروا ستاير من أقمشة ألوانها سادة، عشان يبقى من الأسهل انها تليق على أي ديكور في البيت وتمشي مع ألوان السجاد، ومتحتاجوش كل شوية تغيروا حاجة فيهم عشان يليقوا على بعض.

أما لو حابين تختاروا ستاير منقوشة؛ فمن الأفضل إن ده يكون مع ديكور أوضة سادة، والسجادة بتاعتها تكون سادة برضه أو منقوشة نقشة خفيفة أو فيها رسمة بسيطة جداً.

وعشان تحافظوا على الستاير وجمالها لأطول وقت لازم تهتموا بنضافتها أول بأول، وده ممكن يبقى بكنسها بالمكنسة الكهربا كل فترة قريبة، وغسيل اللي ينفع يتغسل منها لما تتوسخ.

وفي نهاية المقال نتمنى اننا نكون قدمنا لكم معلومات تفيدكم في اختيار خامة الستائر المناسبة لديكور عشكم الجديد، وألف مبروك مقدماً.