اختيار الوقت المناسب للفرح إزاي تحددوه؟

دلوقتي بعد ما قررتم الجواز واتفقتم على كل التفاصيل الأساسية، هنبدأ خلاص نفكر في اختيار الوقت المناسب للفرح.

كتير مننا مبيعرفوش إزاي نفكر في اختيار التوقيت الأكتر مناسبة، وبيسيبوا الموضوع يجي بالصدفة كدة على حسب الترتيبات.

وفي الحقيقة هو مفيش قواعد معينة فعلاً لتحديد ميعاد حفل الزفاف، وده اللي بيزود الحيرة أكتر.

بس برضه بما إن مفيش قواعد معينة ده بيديكم براح وحرية أكتر انكم تختاروا التوقيت الأفضل ليكم.

لكن برضه بيفضل السؤال هنا: نحدد الوقت الأفضل ده بناء على ايه؟!

وعشان كدة احنا في المقال ده هنحاول نساعدكم بإننا نفكر معاكم ايه المعايير اللي تحطوها في دماغكم وانتم بتحددوا توقيت الفرح؟

ايه الأوقات اللي ممكن تكون أفضل ليكم وكمان أفضل لضيوفكم؟

وتساعدهم انهم يقدروا يحضروا فرحكم بسلاسة من غير ضغوط في التوقيتات والمواعيد؟

إجابات كل الأسئلة دي هتلاقوها إن شاء الله هنا؛ فتابعوا معانا المقال.

اختيار الوقت المناسب للفرح بتحديد الفترة اللي عايزين تتجنبوها:

ممكن يكون في أوقات معينة من السنة مش مناسبة ليكم.

أو مبتكونوش في أحسن حالاتكم فيها كونها بتأثر على صحتكم مثلاً، زي إنكم تكونوا من الأشخاص اللي بيصابوا بالزكام طول الشتا مثلاً.

أو بتجيلكم حساسية في الربيع بسبب حبوب اللقاح اللي بتنتشر في الوقت ده.

أكيد مش هتكون حاجة حلوة إنكم تبدأوا حياتكم الزوجية الجديدة في وقت صحتكم مبتكونش فيه مظبوطة.

ده غير طبعاً مواعيد الدورة الشهرية بالنسبة للعروسة، أكيد مش هيكون ظريف خالص إنها تجيلها أول أيام الجواز.

فهيكون من الأفضل في اختيار الوقت المناسب للفرح إنه يكون بعيد عن ميعاد الدورة الشهرية بفترة.

أو يكون بعد ميعاد انتهائها عشان يكون فيه وقت كافي لحد ما تجيلها تاني.

وطبعاً لازم تحط في اعتبارها في الحالة دي ان الدورة الشهرية ساعات بتقدم أو بتأخر في ميعادها لما يكون فيه توتر وقلق زايد< فلازم تعمل حساب ده كمان.

وكمان من الحاجات اللي المفروض تاخدوا بالكم منها وانتم بتحددوا ميعاد فرحكم هي فترة الأجازات المسموحة ليكم في شغلكم.

في أوقات بتكون معروفة إن فيها ضغط شغل جامد والموافقة على الأجازات بيكون قليل وفي أضيق الحدود ومدته قليلة.

ووقت تاني بيكون مش موسم بالنسبة لطبيعة شغلكم والشغل فيه بيكون قليل وخفيف؛ فمبيكونش في اعتراضات من الإدارة على طلب الأجازات وبيسمحوا فيها بأوقات طويلة.

فأكيد هيكون من المناسب ليكم في الحالة دي إنكم تحددوا ميعاد فرحكم في الوقت اللي هيكون متاح ليكم إنكم تقدروا تاخدوا أجازة طويلة عشان كمان تقضوا شهر العسل على رواقة.

فكروا في الوقت اللي هتحبوا تحتفلوا فيه كل سنة:

بطبيعة الحال يوم جوازكم هو اليوم اللي هتحتفلوا فيه كل سنة بعيد جوازكم، وعشان كدة لازم تحطوا الموضوع ده في اعتباركم عند اختيار الوقت المناسب للفرح.

فممكن تفكروا إنه يكون وقت أجازات عشان تقدروا تحتفلوا براحتكم، أو يكون موافق عيد ميلاد حد فيكم عشان الاحتفال يكون مضاعف.

كمان ممكن تختاروا انه يكون نفس يوم عيد جواز أهلك أو أهله أو حد من أخواتكم أو أصدقائكم المقربين وتحتفلوا كلكم مع بعض.

اختيار الوقت المناسب للفرح حسب الحجوزات المتاحة:

لو مقررين إنكم عايزين تعملوا فرحكم في مكان محدد أو عايزين تتعاقدوا مع شركة تنظيم أفراح معينة.

ففي الحالة دي هيكون من الأفضل ليكم إنكم تتواصلوا مع المكان أو الشركة اللي عايزينها، وتعرفوا مواعيدهم المتاحة قبل ما تقرروا اختيار الوقت المناسب للفرح.

عادة الحاجات دي بيكون عليها إقبال زيادة، ولو معندكوش استعداد تغيروا خططكم في استئجارها فلازم تحطوا في حسابكم توقيتاتهم وتكونوا عارفينها من الأول.

حطوا ضيوفكم في اعتباركم:

طبيعي إن ضيوفكم برضه ممكن يكون عندهم التزامات وظروف في بعض الأوقات تتعارض مع وقت فرحكم.

وعلى الرغم إن أكيد مش منطقي إنكم تاخدوا رأي كل واحد في ضيوفكم وتحددوا ميعاد فرحكم على حسب التزاماته.

إلا إن برضه في خطوط عامة ممكن تحطوها في اعتباركم، زي لو أغلب ضيوفكم موظفين أو عندهم أولاد في المدارس.

فوقتها هيكون من المناسب أكتر إن الفرح يكون في الويك إيند مثلاً، أو في فترة الأجازات عموماً، ولو هيكون في نص الأسبوع فميبقاش فرح نهاري وهم لسة في شغلهم ومدارسهم.

وفي النهاية نتمنى إننا نكون فدناكم وساعدناكم في اختيار الوقت المناسب للفرح وتحديد النقط اللي تفكروا فيها وانتم بتقرروه.

ونتمنى لكم فرح سعيد وذكرى سعيدة ليه في كل سنة تعيشوها مع بعض للأبد.