اختيار أنواع السجاد المناسب لكل أوضة اتعرفوا على طريقته

اختيار أنواع السجاد المناسب لكل أوضة حاجة مهمة جداً واحنا بنختار الديكور والفرش، وده لإن خامات السجاجيد المختلفة بتدي ملمس مختلف لكل أوضة، وكمان لإن مساحة السجادة عادة ما بتاخد مساحة كبيرة في الأوضة؛ فده بيخليها تدي لون مختلف للأوضة وتكمل ألوان الديكور.

عشان كدة مهم إن أرضيات أوض الشقة متكونش كلها مكشوفة مش مفروش عليها أي سجاجيد.

وده لإن السجاد بيعتبر من العناصر الأساسية اللي بيتبني عليها أي ديكور ناجح.

ده غير إن خامات السجاجيد المختلفة ونوعياتها المتميزة بتقدر تمتص الصوت وصدى الصوت في البيت عشان ميخرجش لبرة.

وفي المقال ده هنحاول إننا نكون دليلكم في اختيار أنواع السجاد المناسب لكل أوضة في عشكم الجديد عشان متحتاروش كتير وانتم بتشتروه.

وده لإن كل أوضة ليها معايير مختلفة في نوع السجادة المناسبة ليها من حيث المقاسات ونوع الخامة.

فالسجادة المناسبة لأوضة النوم غير اللي تنفع في الصالون غير اللي ممكن نستخدمها في السفرة، وهكذا.

فتابعوا معانا المقال.

اختيار أنوع السجاد المناسب لأوضة النوم:

أهم حاجة في أوضة النوم إن تكون السجادة هي أول حاجة بتلمسها الرجل أول ما تنزل من على السرير.

عشان كدة من المهم إن خامات السجاجيد في أوضة النوم تكون أنعم وأريح من باقي سجاجيد البيت.

أما بالنسبة لمساحة السجادة؛ فمن الأفضل إنها تكون مغطية مساحة 60 سم في كل جنب من جناب السرير، وأكتر من 60 سم قدام السرير وممكن توصل لمتر.

وكل ما كانت السجادة أكبر ده بيخليها تظهر جمال الموبيليا وقطع الأثاث في الأوضة بشكل أكبر.

وده بيخلي أوضة النوم تبان أكتر شياكة وأناقة.

لكن برضه لازم ناخد بالنا إنها متكونش كبيرة زيادة عن اللزوم لدرجة إنها توصل لتحت الدولاب أو الكومودينو أو التسريحة.

وده لإن قطع الأثاث دي في أوضة النوم من الأفضل ليها إنها تكون حرة ومش مرتبطة بالسجادة وألوانها في الأوضة.

السجادة المناسبة لأوضة السفرة:

أما بالنسبة لأوضة السفرة فمكان السجادة فيها هو تحت ترابيزة السفرة.

والمفروض ان حجم السجادة يكون أوسع من الترابيزة بمسافة 60 سم من كل الاتجاهات.

وده عشان لما أي كرسي من كراسي السفرة يتسحب من مكانه عشان يتقعد عليه لازم يفضل جوة إطار السجادة.

الاختيار الأفضل لأوضة الليفينج:

لما نيجي نختار سجادة لأوضة الليفينج لازم نراعي إن على الأقل تكون كل الرجلين القدمانية للكنب والكراسي تكون على السجادة.

ولكن الأفضل كمان إن العفش الأساسي كله يكون فوق السجادة، وتكون زيادة حواليه كمان بـ 10 سم.

وده الوضع المثالي في اختيار نوع السجاد المناسب لأوضة الليفينج.

أما بالنسبة لكماليات الأوضة زي وحدات التخزين اللي هي زي المكتبات وترابيزة التلفيزيون؛ فدي بتكون برة إطار السجادة.

عشان كدة من أهم المعايير اللي لازم ناخد بالنا منها في اختيار أنواع السجاد المناسب لأوضة الليفينج هي مقاسات الأرضيات وأحجام الكنب وقطع الأثاث المختلفة في الأوضة.

وده عشان نقدر نختار مقاس السجادة المناسبة للأوضة.

لإن من أهم قواعد الديكور في النقطة دي إن اللي قاعد على أي كرسي أو كنبة لازم متلمسش رجليه أرض مفيهاش سجاد.

اختيار أنواع السجاد المناسب من حيث خاماته:

احنا كدة عرفنا إزاي نختار السجادة المناسبة لكل أوضة، لكن خامات السجاجيد نفسها بتختلف من سجادة للتانية وده ممكن يخلينا نحتار كتير.

عشان كدة هنحاول نعرفكم الفرق بين الخامات المختلفة عشان تقدروا تختاروا الأنسب منها.

ففي البداية فيه خامات السجاجيد الطبيعية ودي بتتميز إنها بتمتص الألوان كويس؛ فده بيخلي ألوانها زاهية.

لكن مشكلتها برضه إن ده بيخليها كمان تبقع بسرعة لو وقع عليها أي حاجة.

وكمان مش سهل تتغسل لإن المواد الكيماوية بتاعة مساحيق الغسيل بتأثر فيها وتبوظها للأسف.

ومن الأفضل إن عند اختيار أنواع السجاد المناسب ليكم من خامات السجاجيد الطبيعية متختاروش سجادة قطن.

وده لإنها عادة بتنحل بسرعة وتبوظ ومش هتعيش معاكم.

لكن ممكن تختاروا سجادة صوف، وده لإنها بتتميز بمرونتها وملمسها المريح خصوصاً لما تكون وبرتها عالية.

كمان ممكن تختاروا سجادة حرير خصوصاً في أوض النوم.

وده لإنها بتتميز بالنعومة الشديدة، وكل ما كان الحرير طبيعي كل ما كان أفضل وأغلى برضه أكيد طبعاً.

أما بالنسبة لخامات السجاجيد الصناعية فيهي منها البوليستر والفسكوز والبوليبوبرين والنايلون وكل الخامات الخارجة من أصل صناعي.

ولإن خامات السجاجيد دي بتتصنع أصلاً من لدائن بلاستيك؛ فهي بتتحمل الكيماويات بشكل أكبر، وبيكون سهل تنضيفها.

ده غير إنها أصلاً مبتمتصش الألوان بسهولة؛ فمبتبقعش بسرعة لو وقع عليها أكل أو شرب، عشان كدة بيكون من الأفضل اختيار أنواع السجاد الصناعي ده في أوض السفرة والليفينج اللي ممكن ناكل ونشرب فيها كتير.

وفي نهاية المقال نتمنى نكون فدناكم فعلاً وقدمنا لكم نصايح تقدروا تستعينوا بيها في اختيار أنواع السجاد المناسب لكل أوضة وانتم بتفرشوا عشكم الجديد.