إتيكيت المقابلة الأولى مع العريس.

الإنطباع الأول عند مقابلة العريس بيفضل عالق في الذاكرة، عشان كده التصرف بلباقة وبثقة غير زائدة وبدون تصنع مهم للفكرة اللي بتتاخد عنك. وإتيكيت المقابلة الاولى مع العريس لا يتعلق فقط بالكلام ولكن السلوك والتصرفات كلها قدام الضيوف والزوق في التعامل.

في المقال ده جمعنا لكل عروسة مجموعة من قواعد إتيكيت المقابلة الأولى عشان تساعدك تظهري بشكل لائق قدام ضيوفك…

قواعد إتيكيت المقابلة الأولى مع العريس

ولإنطباع كويس وعالق في الذاكرة، بننصحك تخلي بالك من:

1. المظهر الخارجي

مظهرك في المقابلة الأولى مينفعش يكون عشوائي، بالعكس كل تفاصيل إطلالتك ليها إتيكيت معين. على سبيل المثال، لبسك لازم يكون أنيق وبدون مبالغة ويناسب ثقافة الحدث والمكان وثقافة العيلتين، بمعنى إنك مينفعش تلبسي فستان مبالغ فيه أو سواريه ولا جينز وبلوزة. فكري في فستان بسيط ناعم خالي من المبالغة، أو طقم كلاسيك بسيط، أو جيب وبلوزة بسيطة بألوان هادئة، أو سالوبت أنيقة.

وطبعاً المظهر مرتبط بالمكياج، اختاري مكياج بسيط غير متكلف مع لفة حجاب أو تسريحة شعر أنيقة وناعمة. وكمان قطعة أو إثنين من الإكسسوارات لكمال مظهرك.

وفيما يخص العطر، اختاري عطوري هادئة غير مزعجة أو قوية. افتكري إن المقابلة الأولى سواء الجواز كان “صالونات” أو عن معرفة مسبقة لازم تكون خالية من المبالغة وبسيطة.

2. إتيكيت كلامك وتصرفاتك

أول حاجة لازم تعمليها أما تدخلي على العريس وأهله هي تحية وترحيب مع ابتسامة وكلمات لبقة زي “اتشرفت بيك” “أهلا وسهلا” “شرفتونا”، وافتكري… بدون مبالغة ولا برود.

وبخصوص الكلام، خلي كلامك واضح ورزين وهادئ، مع صوت متوسط ولغة مهذبة. تقدري تشاركيهم الموضوعات المطروحة بهدوء وبدون مقاطعة أو كلام كتير، وتقدري تتكلمي عن اهتماماتك وهواياتك. لا تترددي تسئلي العريس عن شغله واهتماماته وخططه بابتسامة واحترام.

المقابلة الأولى مش وقت للحديث عن المشاكل الشخصية أو المشكلات العامة أو الانتقادات، وكمان مش صح الكلام كتير عن النفس بدون الاهتمام بالآخر.

طريقة جلوسك تكون مستقيمة وتجنبي الكلام بالإيد أو وضعيات الجلوس الغير مناسبة.

لو المقابلة أمام أهله مهم تاخدي بالك من فارق السن في الألفاظ وعدم التنمر على عادات الغير، وكمان كوني منصته ليهم لأنه علامة كويسة على النضج والاحترام.

4. أخطاء تتنافى مع إتيكيت المقابلة الأولى

• التكلف والتصنع شئ سهل الإكتشاف وبيدي انطباع مش كويس عنك.
• الانشغال بالهاتف علامة على عدم الاحترام خصوصاً في مقابلة فيها الأهل.
• النقد أو السخرية حتى لو بشكل غير مباشر علامة على عدم النضج أو الاحترام.
• عدم اعطاء الآخر فرصة للحديث.

5. تتكلمي مع العريس في إيه؟

بعبارات لبقة وغير جارحة اطرحي عليه أسئلتك واستفساراتك، شاركيه اهتماماتك وخططتك والحاجات اللي محتاجة توصلوا لتفاهم عليها. اتجنبي الأسلوب الغير لائق أو العنيف. وكمان وصلي ليه قد ايه إنتي مهتمة بشغفة واهتماماته وإنك تعرفي عنها.

افتكروا إن الهدف من المقابلة الأولى مش القرار النهائي للطرفين، لكن الإنطباع الأول وبناء حوار وارتياح متبادل. من المقابلة الأولى تقدري تقيمي نوعاً ما هل حسيتي براحة؟ هل يبادلك الاحترام؟ هل هناك توافق مبدأي؟

حاولي توصلي مع العريس لنقطة تفاهم، لأن الغرض مش الجدل والإعتراض على أراء وأفكار بعض، الغرض هو الوصول لنقطة تفاهم…

تجهزي نفسك إزاى

بما إنك مهتمة بإنك تتصرفي صح وفقاً لقواعد إتيكيت المقابلة الأولى مع العريس، من المهم إنك:

• تدربي نفسك كويس على القواعد السابقة وعلى الكلام اللي حابة تطرحيه.
• التدريب المُسبق على الكلام بلباقة بيديكي ثقة وقت المقابلة.
• دربي نفسك على لغة جسد هادئة ورزينة.
• كوني صادقة وهادئة ولطيفة مع الضيوف وايجابية.

زوري منصة إيجي ويدينج لمساعدتك في التجهيز لخطوبتك بأفضل الخيارات.

خلاصة الأمر، المقابلة الأولى مع عريسك هي لحظة فارقة ومهمة للإنطباع الأول لا تُقاس بالمظاهر فقط، بل باللي هيظهر منك من انطباع صادق ولبق يعكس شخصيتك الحقيقية. الإتيكيت لا يعني التكلّف أو التصنّع، بل هو فن التعامل برقي وثقة واحترام مع الغير حتى لو مش عاجبنا.

حرصك على إنك تكوني هادئة وأنيقة ومحترمة بيعكس قيمك وتربيتك وطريقتك في الحياة. لذلك خلي الإنطباع الأول يليق بيكي.

ولمعلومات أكتر:

بوفيه الخطوبة في البيت | تقدمي إيه وإزاي

كوشة في البيت | أفكار وديكورات ونصائح.