أهم أساسيات شهر العسل الناجح
بعد شهور من التحضيرات، والفرهَدة والقلق والتفاصيل اللي ملهاش آخر. من الفستان والقاعة لبطاقات الدعوة واختيار الكوشة. جه اليوم اللي كنتم مستنينه طول العمر، وهو يوم الفرح بس الأجمل من يوم الفرح هو اللي بعده، اللحظات اللي بتجمعكم لأول مرة من غير دوشة. من غير رسميات ومن غير ضغط. لحظات رومانسية هادية خاصة جدًا.
عشان كدا بنقول أن ليلة الدخلة وشهر العسل. مش مجرد طقوس. دول بداية جديدة بداية لحياة مع شريك/ة عمرك. وعشان تكون البداية دي على أسس حب وتفاهم، جَمعنالك مجموعة أفكار رومانسية واقعية، مفيدة، وبسيطة تقدروا تنفذوها سوا وتعيشوا لحظة بلحظة ذكريات تفضل محفورة جواكم، ودلوقتي هنعرف أهم أساسيات شهر العسل.
ليه لازم نعرف أهم أساسيات شهر العسل ؟
كتير من الأزواج (خصوصًا في مجتمعنا المصري) بيتعاملوا مع ليلة الدخلة وكأنها “تاسك” لازم يتعمل في أول ليلة. بس الصح إن أهم حاجة في الليلة دي هي الراحة النفسية والهدوء والتفاهم. مفيش مواعيد ولا ضغوط. هنا لازم تكلموا بعض، وكمان تفهموا مشاعركم، وتطمنوا على بعض، وتحسوا إنكم أخيرًا بقى عندكم خصوصية. ودلوقتي هنعرفكم أساسيات شهر العسل عشان يكون أجمل فترة في العمر.
١-حضروا جو رومانسي سوا
الجو المحيط بيفرق جدًا في الإحساس. ومش لازم حاجات مكلفة. لكن تفاصيل بسيطة زي شموع بريحة تحبوها (لافندر، فانيليا، ورد بلدي مثلًا)، أو موسيقى هادية أو أغنية بتحبوها من أيام الخطوبة، أو ديكورات ذي لمبة نور خافت، وردة بسيطة في الفازة، وكمان مفارش السرير يكون لونها مريح (أبيض أو بيج أو روز)، ونحاول أن واحد فيكم يحضر المفاجأة للتاني. أو حضروا الجو سوا. وقتها كل تفصيلة هتكون بحب.
٢-افهموا بعض قبل أي حاجة
في ناس كتير بتتوتر من ليلة الدخلة. وده طبيعي جدًا. بسبب الخجل وكمان التعب من يوم الفرح. دا غير الضغوط النفسية. دي كلها حاجات بتأثر على الحالة العامة، والحل هنا هو الكلام. اقعدوا مع بعض واتكلموا بصراحة عن مشاعركم أو خوفكم أو احتياجاتكم ورغباتكم، ولازم نعرف أن الاستئذان والاحترام والصبر بيعملوا فرق ضخم. وبيخلوا اللحظة آمنة ومليانة حب بدل توتر أو ضغط.
٣- نجهز مفاجأة رومانسية صغيرة
المفاجآت من أهم أساسيات شهر العسل. ولازم نعرف أن المفاجآت مش لازم تكون كبيرة علشان تلمس القلب. ممكن تكون رسالة مكتوبة بخط الإيد فيها مشاعرك، أو شوكولاتة مفضلة ليه/ليها، أو وردة حمراء أو بوكيه صغير. أو حتى صندوق ذكريات فيه صور من الخطوبة. أو حاجة رمزية بتفتكروا بيها أول خروجة أو مكالمة. المفاجآت دي بتقول “أنا كنت بفكر فيك… وبجهز لك من قلبي”.
٤-شهر عسل حقيقي مش مصطنع
ناس كتير بتحول شهر العسل لجولة تصوير وخروجات و”يلّا نلحق نعمل كل حاجة”. لكن الحقيقة شهر العسل هو وقت التعارف الحقيقي. عشان كدا حاولوا اكتشفوا مكان جديد مع بعض (قرية – كافيه مختلف – مشي في شارع هادي). مثلاً اعملوا حاجة لأول مرة سوا (ركوب عجل – رحلة مركب – تصوير جلسة مع مصور). وكمان اكتبوا في نوتة صغيرة كل يوم حاجة جديدة عرفتوها عن بعض. وممكن بردو مثلاً حضروا أكلة سوا حتى لو في الأوتيل. أو اتفرجوا على فيلم قديم بتحبوه. ولازم نعرف أن اللحظات الملموسة دي من أهم أساسيات شهر العسل الناجح.
٥-بلاش التصنع أو التركيز على الحاجات السطحية
اليوم اللي بعد الفرح أو أول يوم في شهر العسل مش لازم يبدأ بتصوير سيلفي وفلتر جديد. حاولوا ابدأوا الصبح بفطار بسيط تحضّروه سوا. ولو مش في البيت، انزلوا أقرب كافيه واقعدوا سوا في ركن هادي. هنا مش لازم أماكن غالية أو أفكار مصطنعة، أو اشتراطات ذي لازم فندق أو مطعم معين، نحاول يكون تركيزنا أننا بس نكون مبسوطين.
هل محتوى المقال دة كان مفيد بالنسبة لك؟
نعم، مفيد!لا!
