أهمية دي جيه الفرح في تنظيم اليوم

أهمية دي جيه الفرح أكبر بكتير من مجرد تشغيل قايمة الأغاني اللي اتفقتم عليها معاه.

في الحقيقة الدي جيه المحترف ليه مهام كتيرة خلال حفل الزفاف عليه إنه يقوم بيها.

وعشان كدة من الحاجات المهمة اللي المفروض تختاروها كويس هي واحد محترف يقوم بالمهمة دي وتكون تقييماته عالية.

مش مجرد واحد ينزل قايمة أغانيكم من سبوتيفاي ولا الساوند كلاود ويشغلها على مكبرات الصوت وخلاص على كدة!

ودي لو كانت المهمة الرئيسية ليه إلا إنها عشان تخرج بالشكل الملائم ليها محتاجة مهمام إضافية تانية كتير يكون بيجيدها.

وعشان كدة احنا في المقال ده جمعنا لكم المهام اللي المفروض يقوم بيها وتوضح قيمة دوره.

وده عشان الصورة النهائية لليوم تخرج بأفضل شكل؛ فتابعوا معانا المقال.

يساعد في تنظيم الجدول الزمني لليوم:

على الرغم من إن المسئول عن تنظيم حفل الزفاف أو إدارة القاعة هم المسئولين الأساسيين عن إنهم يحطوا الجدول الزمني لليوم، إلا إن أهمية دي جيه الفرح في النقطة دي بتتمثل في إن هو اللي عارف كل جزء من الاحتفال ممكن ياخد قد ايه في الوقت، وبالتالي هو اللي بيدير العملية دي في النهاية.

وده سواء بتحديد فقرات الأغاني أو بإنه يعلن عن بداية الفعاليات المختلفة خلال اليوم.

ولو حصلت أي ظروف طارئة واستلزمت أي تعديلات على توقيتات الحفل.

فهو اللي عادة بيكون قادر على هندلة الموضوع من موقعه والإعلان عن أي طوارئ.

أهمية دي جيه الفرح في توفير المعدات:

على الرغم من إن قاعات الأفراح عادة بتكون مجهزة بمعدات صوت إلا إن نظراً لاستخدامها المتكرر ممكن متكونش إمكانياتها أفضل حاجة.

ومن غير ميكروفونات ومكبرات صوت صوتها واضح ونقي، ضيوفكم مش هيقدروا يسمعوا تقديمكم وانتم داخلين القاعة.

ولا كلمات الأغاني اللي هترقصوا عليها رقصتكم الأولى وبقية الرقصات، أو الإعلان عن فتح البوفيه.

ده غير إن الدي جيه المحترف عارف كويس طبيعة المعدات اللي هيحتاجها في كل مكان مختلف عن التاني وحسب طبيعة الحفلة والأغاني المطلوبة.

وبيختبر معداته وجودة الصوت الخارج منها في مكان الحفلة قبل وقت كافي.

وده عشان يتأكد إن كل حاجة شغالة كويس وبأفضل إمكانية تجنباً لأي عطل خلال الفرح.

ومش بس معدات الصوت كمان ممكن تظهر أهمية دي جيه الفرح في انه يوفر لكم إضاءة أفضل.

صحيح إن القاعة ومنظمين الأفراح بيكونوا موفرين إضاءة كويسة في المكان.

لكن عادة الدي جيه المحترف بيهتم بتوفير إضاءة تتسلط على مكان الرقص عشان تبرز شغله بشكل أوضح وأحلى.

تحديد مزاج الحفلة:

ممكن نبسط الموضوع ونقول ان الدي جيه بيشغل أغاني وبس، لكن في الحقيقة الموضوع مش متعلق بس باختيار الأغاني وتشغيلها.

لكن أهمية دي جيه الفرح المحترف إنه يقدر يقرأ الأوقات المناسبة لكل أغنية ومزاج الضيوف.

وبالتالي بيختار الأغاني اللي تتناسب مع الحالة العامة.

ولو حس إن الضيوف ابتدوا يكسلوا ويرتاحوا في كراسيهم؛ فيقدر يختار الأغاني اللي تنشطهم من تاني وتخليهم يرجعوا جري للرقص.

وكمان يقدر يساعدكم في اختيار قايمة الأغاني المناسبة ليكم من الأول.

وده لإن عنده خبرة كافية بالأغاني وعارف ألحان كل أغنية، وايه أحدث اصدراتها،ويقدر يحدد ايه منها يناسب الأجواء اللي انتم عايزينها.

سواء كنتم عايزين فرح شبابي مهيبر بأغاني كلها حركة أو فرح رومانسي كلاسيكي بسيط.

وبخبرته هو عارف ايه الأغاني اللي بتنجح والضيوف بيتفاعلوا معاها، وايه الأغاني اللي مبتثيرش اهتمامهم وبتخليهم يندمجوا في أحاديث جانبية بعيد عن الحفلة.

أهمية دي جيه الفرح كمقدم للحفلة:

ولأن هو اللي ماسك المايك ومكبرات الصوت طول الوقت؛ فده يخليه هو الوحيد القادر على ان يقوم بمهمة المذيع خلال حفل الزفاف.

وبالتالي هو اللي هيعلن عن أي فعاليات خلال اليوم سواء كانت متعلقة بفقرات الأغاني والرقص أو الانتقال لفقرات تانية زي التصوير الجماعي أو البوفيه.

وأكيد ده أفضل من ان حد من المنظمين أو قرايبكم أو انتم شخصياً تقعدوا تصرخوا للناس ان دلوقتي وقت العشا أو هنوقف رقص ونتصور.

وبكدة تتخلصوا من ضغط التوقيتات وتسيبوها للدي جيه اللي الضيوف هيركزوا معاه بالتبعية عشان يعرفوا ايه الفقرة أو الخطوة الجاية؟

وفي نهاية المقال نتمنى نكون وضحنا لكم أهمية دي جيه الفرح وده يساعدكم في إنكم تختاروا واحد محترف يقوم بالمهمة دي عشان متحصلش أي غلطات متحبوهاش.

ونتمنى لكم فرح سعيد وبداية حياة جديدة سعيدة مليانة حب وفرح وهنا.