ألوان ديكورات الفرح أجدد الاتجاهات فيها تساعدكم في تحديد تفاصيل يومكم المميز

ألوان ديكورات الفرح هي أهم تفصيلة فيه واللي بتحددوا على أساسها كل التفاصيل الباقية.

وده لإنها هي اللي هتحدد لكم ستايل الفرح والتيمة الأساسية ليه وباقي التفاصيل كلها.

وتحديد الألوان دي هو اللي بيأثر على كل حاجة تانية في مظهر الفرح، حتى لو كان فرح صغير بسيط في قاعة صغيرة أو حديقة البيت.

وعشان كدة تحديد مخطط الألوان اللي هتستخدموها في اليوم ده هو أول خطوة لازم تعملوها وانتم بتخططوا لفرحكم.

وده لإنه هيدخل في كل الخطط التاتية اللي هتبدوا تشتغلوا عليها بعد كدة، زي دعوات حفل الزفاف، وديكورات القاعة.

وهيأثر كمان على اختيارات الهدوم سواء ليكم أو لضيوفكم، واختيارات الورد اللي هتستخدموه سواء في الديكورات أو الاكسسوارت الشخصية ليكم.

وفي الوقت الحالي فالألوان الفاتحة والمبهجة هي المسيطرة على الموضة في الاتجاه ده.

وفي المقال ده احنا جمعنا لكم كل الاتجاهات الجديدة فيها.

وركزنا على أهم الألوان اللي تقدروا تستخدموها بسهولة في كل ديكوراتكم وتفاصيل يومكم المميز.

فتابعوا معانا المقال.

الوردي الباهت:

اللون الوردي الباهت أو المغبر حالياً هو من أكتر ألوان ديكورات الفرح انتشاراً.

وهتشوفوه داخل في تفاصيل كتير خلال الفترة الجاية،وده سواء تم دمجه مع لون محايد يديه إطلاله أكتر نعومة زي النبيتي.

أو ممكن يتعمل تباينات لونية معاه من ألوان مختلفة تانية زي الأخضر الغامق أو الرمادي أو الأزرق أو الدهبي.

والمميز فيه إنه لون جميل ودافي وده بيخليه مناسب مع لون أي بشرة.

فنقدر نستخدمه بسهولة في إنه يكون لون فساتين وصيفات العروسة.

والدرجة الأغمق منه واللي ممكن يبقى ليها تدرجات من اللون البني بتكون مناسبة مع أي ذوق من الاستايلات المختلفة سواء كلاسيكية أو مودرن.

ولو حفل الزفاف هيكون في أجواء صيفية؛ فاللون الوردي الباهت مع درجات ألوان من البنفسجي والأخضر أو الأزرق الباستيلي هيدي له أجواء حالمة رومانسية ممتعة.

ألوان ديكورات الفرح مستوحاة من التوت:

في الفترة الجاية هتكون مجموعات الألوان من درجات اللون البنفسجي والأحمر، زي الفوشيا والنبيتي ولون الكريز أكتر شعبية.

وهتبقى منتشرة أكتر في أفراح موسم الربيع ومن بعدها الصيف والخريف، وده لإن الألوان دي هتضيف بهجة وحيوية على حفل الزفاف مع لمسة رقيقة من الرومانسية.

فلو هتستخدموا الألوان دي في فرحكم الصيفي تقدروا تضيفوا ليها لون مميز زي الأصفر الأناناسي أو اللون الفيروزي عشان يزود الطاقة بشكل أكبر في فرحكم.

أما لو فرحكم في الخريف أو الشتاء؛ فتقدروا تضيفوا لمسات داكنة تديكم إحساس بالدفا زي ألوان الأزرق الغامق والأخضر الزمردي والبني الموكا.

وبكدة تجددوا دايماً من لون التوت في ديكوراتكم وتخلوه مناسب وملائم لكل موسم طول السنة.

اللون اللبني أو السماوي (الأزرق الناعم):

على الرغم من إن اللون ده مشهور عادة انه بيتم استخدامه في ألوان ديكورات الفرح خلال موسم الربيع، إلا إنه في الحقيقة مش مرتبط بموسم معين.

والمميز فيه إنكم تقدروا تستخدموه في كل وأي تيمة تحبوها لفرحكم، سواء كانت الأفراح الرسمية التقليدية أو الأفراح الأوبن اير البسيطة الفريندلي.

وتقدروا تستخدموه لوحده أو تضيفوا معاه لون تاني مميز زي الوردي أو الأصفر، أو لون برتقاني في الربيع يضيف عليه حيوية أكتر.

وممكن تضيفوه في تفاصيل كتيرة من تفاصيل اليوم زي شرايط بوكيهات الورد سواء بوكيه العروسة الأساسي أو البوكيهات اللي ممكن تستخدموها في تزيين المكان.

أو حتى يدخل في ألوان الورد نفسه اللي هتستخدموه، وممكن العروسة ووصيفاتها يختاروه في لون جزمهم، أو في مكياجهم ولو حتى بلمسة ايشادو.

ألوان ديكورات الفرح المعدنية:

من أكتر الألوان اللي تقدر تدي مظهر احتفالي لأي مكان هي الألوان المعدنية زي الفضي والدهبي والأسود والعاجي.

فايه اللي ممكن يديكم إحساس الاحتفال أكتر من إنكم تحاوطوا نفسكم بديكورات بألوان بتلمع وبتبرق؟!

والألوان دي هتكون مناسبة جداً لو فرحكم بيوافق فترة أعياد رأس السنة، وكمان مناسبة حتى لو عايزين أجواء رسمية لفرحكم.

الألوان الترابية:

أما لو ذوقكم إنكم بتحبوا ألوانكم تكون فوضوية وتديكم المظهر البوهيمي الغربي؛ فتقدروا تختاروا ألوان ديكورات الفرح من الألوان الترابية.

ودي زي الأخضر أو البني مع إضافة ألوان تانية مميزة ليها زي البنفسجي والنبيتي، وفي الحالة دي فبوكيه الورد المناسب للعروسة بيكون بوكيه أغلبه نباتات خضرا مع زهور بيضا صغيرة أقرب لإنها تكون مش متشافة.

وفي النهاية نتمنى إننا نكون ساعدناكم في تحديد ألوان ديكورات الفرح المناسبة ليكم وقدرنا نقلل من حيرتكم في الجانب ده.

ونتمنى لكم فرح سعيد مليان بالألوان المبهجة واللحظات الجميلة، ويكون أحلى بداية لحياتكم الجديدة مع بعض.