أفكار مختلفة لفوتوسيشن الفرح

كتير بنفكر في أفكار مختلفة لفوتوسيشن الفرح تكون مميزة عن كل اللي اتعمل قبل كدة وبنحس إن مفيش جديد.

زمان كان الموضوع بسيط، كان العريس والعروسة بيروحوا للمصوراتي في الاستوديو بتاعه مع كام واحد من قرايبهم.

وكان المصوراتي بياخد كام صورة للعريس والعروسة مع بعض في وضعيات تقليدية عادية، وكام صورة تانيين مع الأهل والقرايب والصحاب.

وبعد كدة المصوراتي يظبط شوية خلفيات ويعمل شوية حركات في الصور، طبعاً لو حد منا شافها دلوقتي هيتريق عليها.

وكان ده مفهوم الفوتوسيشن زمان، لكن دلوقتي الأمور اختلفت، ومعدش حد بيروح الأستوديو للمصوراتي.

المصور الفوتوغرافي واللي بيكون أصلاً متخصص في تصوير الأفراح مش أي مصوراتي والسلام، هو اللي بيخرج مع العروسة والعريس ويختاروا أماكن مختلفة للتصوير فيها.

برضه مع ذلك بقى منتشر بشكل كبير إن أغلب فوتوسيشن الأفراح بتكون في أماكن مفتوحة.

لكنها برضه بقت متشابهة، نفس اللقطات ونفس الأفكار ونفس الوضعيات.

ولإننا عارفين إنكم بتحاولوا تكونوا مميزين في يومكم الخاص، وتكونوا مختلفين عن أي عروسين سبقوكم.

وعشان صور فرحكم تطلع مميزة عن أي صور تانية، وأي حد يشوفها ينبهر بيها.

احنا جبنا لكم في المقال ده شوية أفكار مختلفة لفوتوسيشن الفرح ممكن تستعينوا بيها وتنفذوها؛ فتابعوا معانا.

التصوير في المتاحف:

لو كنتم من محبي التاريخ والأماكن الأثرية؛ فالفكرة دي هتكون مناسبة ليكم ومتطابقة مع هواياتكم.

وممكن كمان تختاروا نوعية المتحف اللي بيتماشى مع ميولكم، يعني سواء كان متحف أثري وتاريخي أو متحف طبيعي للحيوانات أو الكائنات البحرية.

التصوير في الملاهي:

لو حابين تظهروا روح الطفولة عندكم ممكن تستغلوا النقطة دي وتنفذوا أفكار مختلفة لفوتوسيشن الفرح في الملاهي أو منطقة الألعاب في أي نادي.

اختاروا ألعاب مرحة اتصوروا فيها، سواء وانتم بتلعبوا فيها فعلاً أو بإنكم تكونوا واقفين وسطها.

كمان من مميزات الأماكن دي إن بيكون فيها أضواء كتير، وده مع مصور شاطر يقدر يبرزها في الخلفية هيديكم لقطات قمة في الروعة.

أفكار مختلفة لفوتوسيشن الفرح في مكان شغلكم:

لو اتعرفتم على بعض في الشغل، أو بتشتغلوا في مكان واحد، ممكن تستغلوا النقطة دي وتبرزوها في صور فرحكم.

روحوا مكان شغلكم وخدوا صور فيه بتعبر عن اللحظات اللي قضيتوها مع بعض، لكن المرة دي وانتم بفستان وبدلة الفرح اللي بتقول إن اللحظات دي اتتوجت أخيراً بأسعد لحظة فيهم.

استغلوا هواياتكم في صور فرحكم:

عندكم هوايات مشتركة؟ أو حتى هوايات متعارضة؟ كل ده تقدروا تبروزوه في أفكار مختلفة لفوتوسيشن الفرح.

مثلاً لو بتحبوا القراية ممكن تتصوروا لقطات وانتم ماسكين نوعية الكتب اللي بتحبوها وبتقروا فيها.

أو لو بتحبوا رياضة معينة فممكن تاخدوا لقطات ليكم مع أدوات الرياضة دي أو كإنكم بتلعبوها مع بعض.

ولو كل واحد فيكم ليه هواية مختلفة عن التاني فممكن تشوفوا ايه الحاجة اللي ممكن تجمع الهوايات دي مع بعض وتبرزوا ده في الصورة.

واستخدموا ده كدليل على انكم رغم اختلافكم إلا إنكم بتكملوا بعض.

أول مكان اتقابلتم فيه:

فاكرين أول مكان اتقابلتم فيه؟ ممكن تكونوا اتقابلتم في الجامعة مثلاً أو في سوبر ماركت أو في الشارع أو في خروجة في مكان ما مع ناس صحابكم.

استغلوا المكان ده وارجعوا له تاني وخدوا صور فيه مع بعض وانتم النهاردة عريس وعروسة بعد ما كنتم مجرد غريبين بيتقابلوا لأول مرة.

أفكار مختلفة لفوتوسيشن الفرح مع ناس ميقدروش يحضروا الفرح:

ممكن يكون حد من قرايبكم أو أصدقائكم المقربين معندهمش الإمكانية لحضور فرحكم بسبب ظروفهم الصحية مثلاً أو أي سبب قهري شبه ده.

تقدروا تفاجئوهم وتروحوا لهم في مكانهم وانتم بفستان وبدلة الفرح وتتصوروا معاهم وكإنهم حضروا فرحكم وشاركوكم فرحتكم.

كمان لو عندكم حد اتوفاه الله خصوصاً لو أب أو أم أو أخ العريس أو العروسة، أكيد كان نفسكم إنهم يكونوا موجودين عشان يحضروا فرحكم.

فممكن تاخدوا صور مع صورهم أو تعملوا لهم ماكيتات بالحجم الطبيعي وتتصوروا معاهم وكإنهم موجودين معاكم بالفعل.

وفي نهاية المقال نتمنى إننا نكون قدمنا لكم أفكار مختلفة لفوتوسيشن الفرح تقدر تفيدكم بالفعل وانتم بتختاروا الأفكار اللي هتنفذوها في صوركم.