أفكار لترتيب التسريحة

لو عايزة أفكار لترتيب التسريحة، فاحنا بنقدملك شوية طرق هتساعدك في الموضوع دا. لأنها من أكتر الأماكن اللي بنستخدمها يوميًا، ودايمًا محتاجة تنظيم عشان تسهل علينا الوصول لحاجتنا وتفضل شكلها شيك وجميل.

استغلال الأدراج بشكل منظم

منظمات الأدراج: الأدراج في التسريحة ممكن تبقى مكان لكركبة كبيرة، لكن الحل سهل! استخدمي منظمات الأدراج اللي بتتكون من فواصل عشان تحطي فيها الميكب والمجوهرات بشكل مرتب. ده هيخليكي تلاقي حاجتك بسرعة من غير ما تضيع وقت في البحث.

فواصل أكريليك: الفواصل الأكريليك ممتازة في تقسيم الأدراج للأدوات المختلفة. ممكن تحطي فيها الفرش، الأقلام، والأدوات الصغيرة زي توك الشعر أو الدبابيس.

استخدام أطباق وصواني صغيرة

أطباق مجوهرات: ممكن تستخدمي أطباق صغيرة أو صواني جميلة عشان ترتبي المجوهرات أو الحاجات الصغيرة اللي بتستخدميها يوميًا زي الخواتم والسلاسل. ده هيخلي التسريحة شكلها شيك ومريح للعين، وكمان هيحافظ على حاجتك من الضياع.

الصواني الزجاجية أو المرايات: استخدمي صواني زجاجية أو اللي بتتعمل بالمرايات علشان تحطي عليها البرفانات أو كريمات البشرة. الصواني دي مش بس بتنظم الحاجات لكنها كمان بتضيف لمسة فاخرة للتسريحة.

حافظي على مستحضرات التجميل مرتبة

أدوات الميكب في أكواب: حطي الفرش وأقلام الميكب في أكواب أو حافظات مخصصة، وتقدري كمان تستخدمي كاسات شيك أو حافظات زجاجية، علشان تساعدك في ترتيب التسريحة.

منظمات ميكب عمودية: استخدمي منظمات ميكب عمودية أو منظمات أدراج خاصة بالميكب، عشان يكون كل منتج في مكانه.

ترتيب البرفانات بطريقة فنية

عرض البرفانات بطريقة جمالية:  لو عندك مجموعة عطور، ممكن ترتبيها بشكل جمالي على رف صغير أو في صينية شيك. استخدمي رفوف زجاجية أو صواني فضة عشان تضيفي لمسة فنية لمكان العطور.

الأرفف العائمة: ممكن تضيفي رفوف عائمة فوق التسريحة وتعرضي عليها عطورك أو البرفانات اللي بتحبيها. وده هيخليها في متناول إيدك وكمان هتضيف ديكور حلو للمكان.

استغلال المساحات العمودية

علاقات للحلقان والسلاسل: استخدمي علاقات علشان تعلقي عليها الحلقان والسلاسل على الحيطة أو على جنب التسريحة. ده هيخلي مجوهراتك في مكان واضح وسهل الوصول ليه من غير ما تتشابك.

لوحة مغناطيسية: تعتبر طريقة تنظيم مبتكرة، لتعليق الدبابيس أو الإكسسوارات المعدنية. ده هيخلي التسريحة مرتبة وفي نفس الوقت هتضيف لمسة شيك.

أرفف جانبية للتسريحة

لو المساحة على التسريحة صغيرة، ممكن تضيفي أرفف جانبية أو رف حائط صغير جنب التسريحة. الرف ده تقدري تحطي عليه أدوات التجميل أو الإكسسوارات اللي مش بتستخدميها كتير. ودي فكرة وطريقة ممتازة لترتيب التسريحة.

التسريحة المدمجة مع المرآة

لو بتخططي إنك تشتري تسريحة جديدة، حاولي تشتري تسريحة بمرآة مدمجة ومساحة تخزين كافية. التسريحات اللي فيها أدراج كثيرة ومساحة تخزين هتساعدك على ترتيب كل حاجة بشكل منظم ومرتب.

تنسيق أدوات الشعر

الأدوات الخاصة بالشعر زي الفرش وأدوات الفرد أو التجعيد ممكن تتخزن في حافظات مخصصة أو حتى في سلال صغيرة جنب التسريحة عشان تفضلي متذكرة مكانها.

ولو بتستخدمي مجفف شعر بشكل يومي، ممكن تستخدمي حامل خاص بالمجفف وتثبتيه جنب التسريحة عشان يكون دايمًا في متناول إيدك.

احتفظي بالحاجات الأساسية في متناول ايدك

خلي عندك مساحة خاصة للحاجات اللي بتستخدميها كل يوم زي البرفان اللي بتفضليه أو الكحل والروج اللي بتستخدميهم على طول. تقدري تحطيهم في صينية صغيرة فوق التسريحة.

حافظي على نظافة التسريحة باستمرار

حاولى دايمًا تحافظي على تسريحتك نظيفة ومفيهاش كراكيب. وكل فترة حاولي تشوفي إيه اللي مش بتستخدميه وتشيليه أو ترتبيه في مكان تاني عشان المساحة تفضل منظمة.

اقرأ أيضًا: أفكار لترتيب المطبخ للعروسة الجديدة