أفكار لأرضيات المطابخ عشان تقضي أوقات أنيقة في مطبخك

ليه عملنا مقال مخصوص بعنوان أفكار لأرضيات المطابخ على الرغم من إن المطابخ عادة مبتنالش نفس الاهتمام زي بقية أوض الشقة؟

وده لإن في الغالب محدش غريب بيدخلها من الضيوف مثلاً.

ولكن بطبيعة الحال المطبخ هو أكتر مكان هتقضي فيه وقت وانت بتجهزي الأكل وبتسخنيه وتحضريه.

فأكيد هتبقي محتاجة تقضي الوقت ده في مكان جميل يفتح نفسك، ويخليكي تقدري تحضري الأكل بحب وبهجة.

وكمان يكون سهل تنضيفه لو وقع فيه حاجة.

فالتصميم الجذاب مش هو بس المهم، وإنما الأرضية زيها زي باقي مكونات المطبخ من الحيطان والخزاين وجزيرة المطبخ.

كل دول لازم يكونوا بيتحملوا احتمالات الفوضى اللي بتحصل خلال الطبخ.

عشان كدة اختيار الأرضية لازم يجمع بين أناقة المظهر والعملية.

ومن الحاجات اللي لازم تفكروا فيها وانتم بتختاروا نوع الأرضية وشكله هي نوع مساحة المطبخ ومكانه في البيت.

فالموضوع هيختلف إذا كان المطبخ مثلاً في أوضة منفصلة لوحده، ولا مطبخ مفتوح على الليفينج روم.

وفي الحالة دي هيكون في تشابك لأرضية المطبخ مع أرضية الليفينج.

أفكار لأرضيات المطابخ متناسقة مع مكوناته:

الأرضيات في النوع ده ممكن تبقى من بلاط البورسلين وكإنها أرضية شطرنج بحيث يكون من لونين كل بلاطة بلون عكس التانية.

وتقدروا تختاروا اللونين دول بإنهم يكونوا من ألوان عفش وخشب المطبخ الأساسي.

زي إنهم يكونوا أبيض وأسود، أو بني خشبي وكريمي، وميزة بلاط البورسلين إنه بيكون سهل التنضيف في حالة إنه وقع عليه أي حاجة وانت بتطبخي.

ده غير إن التصميم ده بيدي اتساع بصري للمطبخ.

أرضيات خشب طبيعي بلمسة خاصة:

المنتشر دايماً في أفكار لأرضيات المطابخ إنها بتكون أرضيات خشبية من البلوط مثلاً، وده بيدي مظهر متناسق مع بقية مكونات المطبخ اللي عادة بتكون من الخشب برضه.

لكن لو بتحبوا التجديد؛ فتقدروا على الرغم من التزامكم بالفكرة الأساسية التقليدية إلا إنكم تضيفوا عليها أفكار مطرقعة جديدة.

تقدروا مثلاً تطلبوا دهان الأرضية بتصميم هندسي بلون مختلف زي الأسود، والفكرة دي تقدروا تستخدموها في أي وقت لو حابين تجددوا مظهر الأرضية من غير ما تغيروها هي نفسها فعلياً.

ده غير إنكم تقدروا تطلبوا تصميمات أرضيات خشبية بشكل ثلاثي الأبعاد، بحيث يتم تقسيم الأرضية على تلات ألوان.

ومع تركيبها بطريقة متداخلة تبان وكإنها مكعبات على الأرض، وتعمل خداع بصري ممتع لأي حد يشوفها.

أفكار لأرضيات المطابخ باللون الأحمر:

لو مطبخكم بالتصميم المودرن أو مطبخ مفتوح على الصالة هيكون من المناسب ليه اختيار ألوان عصرية مناسبة أو متناسقة مع ألوان الليفينج.

واللون الأحمر أكتر لون يناسب أوضاع كتير غير البهجة اللي بيضيفها للمكان، وتقدروا في الحالة دي تنسقوا معاه ألوان خزن ودرف المطبخ بحيث يكون بعضها باللون الأحمر.

أرضيات بالطوب المكشوف:

على الرغم من إن أفكار لأرضيات المطابخ بالشكل ده مش متنشرة في مصر، وإنما هي بتتنفذ أكتر في أوروبا وأمريكا.

إلا إنكم بالشكل ده ممكن يبقى ليكم سبق الريادة في تنفيذه وكل الناس تقلدكم بعد كدة، والنوع ده من الأرضيات بيكون شبه تصميمات الحيطان بالطوب المكشوف وكإنها لسة متشطبتش.

وده بيدي مظهر ريفي لمطبخك، وكإنه مطبخ في مزرعة مثلاً أو بيت في قرية؛ فلو بتحبوا الأجواء دي هيبقى ده خيار مناسب جداً ليكم.

أفكار لأرضيات المطابخ متعددة الألوان:

كل ما كنتم غير تقليدين وبتحبوا الأفكار المطرقعة كل ما ناسبكم إنكم تختاروا حاجات جديدة ومختلفة لمطبخكم وفي بيتكم بشكل عام.

وهنا في الفكرة دي نقدر نقولكم إنكم تقدروا تستغلوا ألوان المطبخ كلها في الأرضيات، وطبعاً ده معناه إنكم تكونوا بعاد عن الألوان التقليدية بتاعة الخشب والأبيض والأسود.

إنما تقدروا تمزجوا ألوان مختلفة زي الأخضر بدرجاته والأصفر والبرتقاني والأزرق، وتضيفوا الألوان دي في اختياركم لبلاط متعدد الألوان في مطبخكم.

أرضيات من الرخام:

بطبيعة الحال المطبخ مليان أجزاء رخامية كتير سواء أسطح الترابيزات أو حوالين الحوض.

فهيكون من التناسق والتناسب معاه إنكم تختاروا أرضيات من الرخام المتناسق مع رخام المطبخ وبنفس الألوان.

وممكن كمان تستغلوا الفكرة دي مش بس في الأرضيات، وإنما في حيطان المطبخ كمان؛ فيبان كإنه وحدة واحدة على بعضه.

وفي النهاية نتمنى إننا نكون قدمنا لكم أفكار لأرضيات المطابخ تقدروا تستفيدوا منها وانتم بتختاروا أرضيات عشكم الجديد.

ونتمنى لكم بداية حياة زوجية سعيدة، ويكون بيتكم هو جنتكم اللي بتقضوا فيها أحلى الأوقات في يومكم.