أفكار دعوات الفرح المبتكرة بأشكال غير تقليدية

أفكار دعوات الفرح عادة بتكون متشابهة ومفيهاش مساحة كبيرة إنكم تقدروا تقدموا فيها ابتكارات مختلفة تميز فرحكم.

لكن الغرض أصلاً من الدعوة للفرح إنها تكون معبرة عن شخصية العروسين وأفكارهم وتقدم لمحة عن طبيعة حفل الزفاف للضيوف.

عشان كدة وانتم بتختاروا تصميم الدعوة لازم تركزوا على الحاجات اللي بتحبوها وتفضيلاتكم اللي بتعبر عن شخصيتكم.

واختاروا ما بين كل الأفكار المجنونة اللي ممكن تيجي على بالكم.

وفي المقال ده حاولنا نجمع لكم أكتر الأفكار المطرقعة اللي تقدروا تستخدموها في دعوة فرحكم وتعبروا بيها عن حبكم وسعادتكم.

فتابعوا معانا المقال.

أفكار دعوات الفرح على شكل التذكرة:

الدعوة في الفكرة دي بتكون متصممة على شكل تذاكر الحفلات الموسيقية أو عروض السينما ودخول المتاحف.

وده بحيث إنها تكون عبارة عن مستطيل طويل، وفيها جزء بيتقطع زي التذكرة.

فيقدروا الضيوف يستخدموه في كتابة أمنياتهم للعروسين بدل الويدينج بوك.

لإن المكان ده بيكون زي كعب التذكرة كدة، ومتاح فيه مساحة لكتابة اسم الضيف وعنوانه ورسالته للعروسين.

فضيوفكم يقدروا يملوها ويكتبوا رسالتهم براحتهم في البيت ويجيبوها معاهم يوم الفرح.

وتقدروا تختاروا تصميمات مختلفة في النوع ده من أفكار دعوات الفرح.

تصميمات مختلفة للدعوة التذكرة:

فممكن مثلاً تختاروا تصميم على شكل كتاب تعاويذ سحرية، وده مناسب ليكم لو بتحبوا أفلام السحر والخيال.

ولو مختارين تيمة فرحكم وديكوراته إنها تكون بالشكل ده؛ فتبقى الدعوة وكأنها تذكرة فيلم فانتازيا بتقدموه لضيوفكم.

أما لو كنتم من محبي الموسيقى وحفلاتها سواء حفلات الديسكو المثيرة.

أو حفلات الموسيقى الفخمة اللي في المسارح الكبيرة زي الأوبرا.

فتقدروا تختاروا تصميم دعوتكم على شكل تذكرة النوع ده من الحفلات، وأياً كان نوعها فهي هتشترك كلها دايماً في ألوانها المبهجة.

وبكدة هتكون دعوتكم لضيوفكم بتعبر لهم عن إن فرحكم هيكون بداية حفلة مثيرة وممتعة يتمنوا يستمتعوا بوقتهم فيها.

ولو شغفكم في السفر والرحلات حول العالم؛ فتقدروا تصمموا دعوة فرحكم على شكل تذكرة سفر سواء تذكرة قطر أو باخرة أو تذكرة طيران.

وممكن يبقى عليها تصميم للكرة الأرضية أو خريطة للعالم أو مكان معين نفسكم تزوروه، وتكتشفوه مع بعض.

خصوصاً لو هتقتبسوا من أجواء المكان ده تيمة فرحكم، ويبقى كإن الدعوة كانت تذكرة سفر لضيوفكم يزوروا بيها المكان ده.

ولو اخترتوا تصميم الدعوة على شكل تذكرة قطر؛ فممكن تضيفوا تصميم عليها لقطر بيمشي في سكته من غير ما تححدوا له وجهة معينة.

وده يكون معناه انكم عايزين تستمروا في طريقكم الجديد مع بعض للأبد أياً كانت الوجهة اللي هتوصلولها المهم انكم مع بعض دايماً.

أما لو كنتم من محبي الألعاب الإلكترونية وعوالم الكمبيوتر والتكنولوجيا؛ فتقدروا تختاروا شكل دعوة فرحكم بتصميم لتذاكر الفعاليات المهتمة بالمواضيع دي.

ويكون تصميم الدعوة أو التذكرة مرسوم بفن البكسل، وتقدروا تحطوا فيه تصميم لشكل عريس وعروسة مع بعض بالطريق دي.

وده سواء كان تصميم كارتوني متخيل أو مقتبس من صورة ليكم بالفعل، ففي النهاية حياتكم المشتركة بتبدأ من اللحظة اللي ضيوفكم بيستلموا فيها الدعوة.

دعوة فرح على شكل بوك مارك:

ولو كنتم من محبي القراية والكتب؛ فتقدروا تعبروا عن ده بكل سهولة في أفكار دعوات الفرح اللي هتبعتوها لضيوفكم.

وده بإنكم تختاروا تصميم بسيط صغير لدعوة فرحكم على شكل بوك مارك، وبكدة هتعبروا عن شغفكم.

وفي نفس الوقت الدعوة هتكون حاجة مميزة للمعازيم يقدروا يستخدموها بعد كدة مع كتبهم المفضلة.

ومن أكتر الحاجات اللي بتميز التصميم ده إنه بسيط وسهل وخفيف وده بيخليكه كمان اقتصادي وموفر مش هيكلفكم كتير.

وهو من التصميمات اللي لسة منتشرتش بشكل كبير؛ فده هيخليكم مميزين عن أي حد تاني غيركم.

وتقدروا تنفذوا التصميم ده بأشكال وألوان مختلفة على ذوقكم، وتكتبوا على ناحية منه جملة مميزة في الدعوة للجواز، وممكن تبقى اقتباس مفضل ليكم من عمل أدبي بتحبوه.

وفي الناحية التانية تكتبوا أساميكم وتفاصيل الحفلة ومكانها ووقتها وأي ملاحظات عايزين معازيمكم يراعوها وهم جايين.

أفكار دعوات الفرح المسلية:

خلوا اللحظة اللي معازيمكم بيستلموا فيها دعوة فرحكم مليانة بهجة ومرح متتنسيش أبداً، وتقدروا تنفذوا ده بإنكم تخلوا الدعوة نفسها عبارة عن لعبة ممتعة.

ممكن تختاروا تصميم الدعوة إنها تكون على شكل بازل من الخشب، وعليها تصميم كارتوني أو صورة ليكم مع بعض مع تاريخ ومكان الحفلة.

وابعتوها لضيوفكم وهي متفككة، وعشان يعرفوا محتوى الدعوة لازم يركبوها بنفسهم، وبكدة هيقضوا وقت مسلي مينسهوش أبداً مع أفكار دعوات الفرح اللي بعتوهالهم.

وفي النهاية نتمنى إننا نكون قدمنا لكم أفكار دعوات الفرح اللي تقدروا تختاروا منها اللي يناسبكم ويعبر عن شخصيتكم ويضيف المرح والبهجة على فرحكم.

ونتمنى لكم فرح سعيد وبداية حياة زوجية مليانة حب ومودة وسعادة وفرح تدوم للأبد.