أفكار تصوير فوتوسيشن غير تقليدية في مصر

لو بتحضّري لفوتوسيشن سواء قبل الخطوبة. أو حتى فوتوسيشن قبل الفرح، أو فوتوسيشن بعد الجواز، فأكيد بيكون نفسك أن الصور تبقى مش تقليدية. وأنها تكون مليانة إحساس. وفيها تفاصيل تفضل معاكِي العمر كله. بس الحقيقة إن معظم الناس بتختار نفس الأماكن ونفس الأفكار، وده بيخلي الصور شبه بعض. ومش بنحس أننا فرحانين بيها. علشان كده جبنالك في المقال ده أفكار مجنونة وكمان جديدة ومليانة طاقة تخلي فوتوسيشنك مش بس صور دي تبقى ذكريات عايشة وحقيقية. فركزي معانا وأحنا هنعرفك أفكار تصوير فوتوسيشن مختلفة وجديدة.

أفكار تصوير فوتوسيشن مختلفة وجميلة أوي

في أفكار تصوير فوتوسيشن كتير. لكن في الفترة الأخيرة معظمها بقى تقليدي ومكرر، ودا خلى عدد كبير من العرسان أو المخطوبين مش متحفزين للأفكار دي. عشان كدا وفرنالكم أفكار تصوير فوتوسيشن جديدة ومش تقليدية خالص. تقدروا تختاروا منها المناسب ليكم. والميزة في الأفكار دي أنها موفرة. وكمان تنفيذها هيكون سهل جداً في أي مكان قريب ليكم.

فوتوسيشن الفرح

1-فوتوسيشن في القطر أو محطة القطر

لو أنتي بتحبي الطريقة الكلاسيك. وكمان في نفس الوقت عايزة صور مختلفة، فمحطة القطر القديمة زي محطة مصر في وسط البلد أو محطة الأقصر مثلًا هتديكي طابع درامي وسينمائي مميز ومختلف جداً. والصور مع الخلفية المعدنية للقطارات أو وانتي واقفة قدام عربية القطر، أو حتى وانتي بتبصي من الشباك هتطلع تحفة. وكمان ممكن تلبسي لبس vintage أو فستان بسيط وكاب، وخطيبك يلبس حاجة كلاسيك، وساعتها الصور هتحكي قصة مش مجرد لحظات. وهتكون بشكل مختلف ومبهج جداً.

2-صور وسط المراكب في النيل أو الفلوكة

مينفعش نكون بنتكلم عن أفكار تصوير فوتوسيشن وننسى فكرة المراكب. وطبعاً كلنا عارفين أن مفيش أجمل من النيل وقت الغروب، خصوصًا لو خدتوا مركب أو فلوكة وزينتوها بشوية ورد أو فوانيس بسيطة. وهنا الصور على سطح المياه مع انعكاس الشمس والهدوء اللي حواليكم هيخلي اللحظة ساحرة. ويفضل هنا نختار لبس بسيط، مع ضحكة حقيقية من غير تصنع، وبكدا تظهر الصور كأنها لوحة فنية.

3-فوتوسيشن في شارع المعز والحسين

لو بتحبي التفاصيل الإسلامية. أو فكرة الأبواب القديمة والجو التاريخي فمكانك هو شارع المعز. مع لبس تقليدي أو فستان ناعم معاه منديل دانتيل خفيف، وخطيبك ممكن يلبس جلابية شيك أو بدلة كلاسيك. هنا الصور وسط القباب والأقواس والمحلات القديمة بتدي طابع تاريخي مختلف جدًا، وبتنفع سواء للخطوبة أو أول فوتوسيشن بعد الجواز. وهتبقى فكرة مختلفة وممتعة جداً.

أفكار مختلفة لفوتوسيشن الفرح

4-فوتوسيشن في مكان ريفي

لما بنتكلم عن أفكار تصوير فوتوسيشن ريفي إحنا هنا بنتكلم عن واحدة من أجدد الأفكار. وكمان تنفيذها سهل لأن في مناطق زي الفيوم أو الريف القريب من القاهرة ممكن تعملي جلسة تصوير في مزرعة أو في وسط الزرع الأخضر. وكمان الصور مع الحيوانات (زي الحمار، أو الخيول، أو الطيور) بتطلع لذيذة أوي، وبتدي روح تلقائية. ولو بتحبي الستايل الريفي ممكن تلبسي فستان أبيض بسيط وخطيبك يلبس قميص كاروهات وتمشوا في الأرض الطينية وتمسكوا إيدين بعض هتحسي إنك في فيلم أوروبي. والصور هتكون مختلفة أوي.

5-فوتوسيشن ليلي وسط أضواء المدينة

أغلبنا بيربط الصور بوقت النهار. لكن مش لازم دايمًا الشمس تبقى حاضرة في الفوتوسيشن. عشان كدا جربي تصوروا بالليل وسط الإضاءة اللي في وسط البلد، أو عند كوبري قصر النيل، أو حتى في الشوارع الهادية في الزمالك. لأن الصور مع العربيات والأنوار بتبقى رومانسية ومليانة حِس مختلف. وممكن تضيفي شوية إضاءة يدوية زي شموع أو لمبات LED صغيرة. هتدي للصور لمسة سحر مختلفة ولطيفة.

6-فوتوسيشن على البحر بس بلمسة مختلفة

ناس كتير بتصور على البحر، بس فكّري تعمليها على الطراز البوهيمي. حضّري ركن صغير على الشط فيه مفروشات من الخيش مع شمسية قش وسلة فاكهة، والبسي فستان أبيض فلوّي أو تونيك بألوان محايدة. والفكرة هنا إن الصور تبقى كأنكوا في جزيرة خاصة، مش مجرد نزهة على الشط. وتقدروا تعملوا كدا في مطروح وسيدي عبد الرحمن وشواطئ الإسكندرية فيهم شواطئ هادية بتخدم الفكرة دي أوي.

الفوتوسيشن

7-فوتوسيشن على السلم القديم أو سطوح البنايات

لو ساكنين في بيت عيلة أو عندكم عمارة قديمة، استغلي السلم بتاعها أو السطح أو البلكونة القديمة، الغسيل المعلق أو الطوب المكشوف كلها بتدي صور حقيقية ومليانة دفء. وهنا البسي لبس مريح زي ترينج كاجوال أو فستان بيتي، واعملي كوباية شاي تنفع ديكور مثلاً. وهنا الصور هتبقى أنتي مش تمثيل.

8-فوتوسيشن وسط حاجتكوا الشخصية

أجمل الصور هي اللي بتحكي عنكم. اعملي فوتوسيشن في الأوضة اللي بتجهزوها، أو وانتم بتعلّقوا صور أو بتفتحوا هدايا. الصور دي بتبقى عفوية وبتعبّر عن التعلق والحب اللي بتحطوه في علاقتكم. وتقدري كمان تعملي جلسة تصوير أثناء الطبخ سوا، أو وانتي بتعلقي بدلتك أو فستانك في الدولاب دي لحظات بجد وتوثيقها هيكون لذيذ ومبهج.