أفضل أفكار حفلات الخطوبة في البيت

حفلة الخطوبة لحظة جميلة ومميزة في حياة أي اتنين بيحبوا بعض. وبيقرروا يعلنوا ارتباطهم وسط أهلهم وأصحابهم والناس الغاليين عليهم. وناس كتير مؤخرًا بقت تميل لفكرة إنهم يعملوا حفلة الخطوبة في البيت. بدل القاعات أو الأماكن المخصصة للحفلات، ودا بيكون علشان الخصوصية، أو لأنهم عاوزين فرحة البساطة، أو لأسباب توفير التكلفة مثلاً. بس رغم إن الحفلة في البيت. إلا إنك تقدري تخلّيها شيك وكمان أنيقة، وتفضل في الذاكرة طول العمر. علشان كده في المقال ده، جمعنالك أفضل أفكار حفلات الخطوبة في البيت، عشان تخلي يومك حلو وساحر من غير ما تصرفي كتير أو تتوتري

أي هي أفضل أفكار حفلات الخطوبة في البيت؟

كتير من المقبلين على مرحلة الخطوبة بيخافوا من حفلات البيت. لأنهم فاكرين أنها هتكون بسيطة ومحرجة. وإن مسؤولية اليوم كله هتقع عليهم. لكن الحقيقة أن خطوبات البيت من أفضل الخطوبات. وبتكون كل لحظة فيها جميلة ومميزة ومثالية، وفي الفقرات الجاية هنساعدكم بأفضل أفكار حفلات الخطوبة في البيت. عشان نضمن ليكم يوم ناجح ومميز.

1-اختيار الديكور المناسب للبيت

أول حاجة لازم تهتمي بيها هي شكل المكان اللي هتعملي فيه الحفلة. ودا لأنه المؤثر الأكبر على جمال وشياكة الحفلة. فممكن تختاري ركن في الصالة أو في جنينة البيت لو متاحة، وتزينيه بستارة سادة أو فيها لمعة بسيطة. وتعلقي عليها بوستر عليه اسمك واسم خطيبك، أو مثلاً حرفين من أول حرف في اسمكم. وكمان ممكن تضيفي إضاءة بسيطة زي الفيري لايتس ومعاها شموع معطرة، وهتبقى القعدة رايقة وشيك جدًا. ولو حابة تزودي فممكن نستخدم البالونات الهليوم بألوان ناعمة زي الروز والذهبي أو الأبيض؛ ودا لأنها بتدي شكل جميل ومبهج للمكان.

كوشة في البيت | أفكار وديكورات ونصائح.

2-ثيم الحفلة واختيار الألوان

من أفضل أفكار حفلات الخطوبة في البيت إنك تختاري “ثيم” للحفلة. يعني يكون فيه لون أو طابع معين ماشي في كل تفاصيل اليوم. فمثلاً ممكن تختاري ثيم وردي أو ملكي (ذهبي وأبيض). أو تختاري ثيم ريفي (Rustic) وتنسقي مع أصحابك وقرايبك، وخلّي الديكور واللبس والتفاصيل الصغيرة كلها ماشية مع الثيم ده. الموضوع ده بيخلي الحفلة شكلها متناسق وراقي جدًا، وبيخلي الصور تطلع تحفة. وكمان التحضيرات والشكل بيكون مبهج. وهتخلي يوم الخطوبة ذكرى مبتتنسيش.

3-كوشة بسيطة بس شيك

حتى لو الخطوبة في البيت، وجود كوشة بسيطة هيخليكي تحسي بأجواء الحفلة أكتر. عشان كدا ممكن تعملي ركن تصوير وتزينيه بورود صناعية أو طبيعية. مع كرسيين شيك أو كنبة صغيرة، وتحطي وراهم ستارة سادة أو وردي. والحاجات دي سهل نوفرها لأن فيه محلات بتأجر ديكورات بسيطة خاصة لحفلات البيت بأسعار معقولة. ولازم نكون عارفين أن الفكرة مش في التكلفة، الفكرة في التنسيق والذوق وأن التجهيزات معمولة بحب.

4-بوفيه خفيف ولذيذ

البوفيه من أفضل أفكار حفلات الخطوبة في البيت وكمان شئ أساسي، لكن يفضل إن البوفيه يكون بسيط وخفيف، وإلا هيسبب توتر كبير ليكم. ولازم نعرف أن الأهم من التكلفة أنه يكون منسق شكله حلو. فمثلاً اعملي ركن للأكل فيه ساندويتشات صغيرة، معجنات، فطاير، وميني بيتزا. وكمان ممكن تحطي ركن للحلويات فيه كاب كيك، براونيز، وبسكويت مزين بألوان الخطوبة. وتقدري كمان تعملي كيكة صغيرة مزينة بأسمائكم أو بتصميم بسيط يناسب الحفلة. وبكدا نكون وفرنا جزء أساسي من اليوم بهدوء وراحة.

فساتين سهرة لضيوف الخطوبة أفكار تساعدك في اختيار اللي يناسبك

5-الموسيقى وتشغيل الأغاني

الموسيقى من أهم تجهيزات الخطوبة. فحاولي أنك تختاري بلاي ليست فيها أغاني رومانسية ومرحة في نفس الوقت. وبلاش نعتمد على فكرة التشغيل العشوائي. ومهم تكون الأغاني متنوعة علشان تمشي مع أجواء الخطوبة. فمثلاً ممكن تبدأي بأغاني هادية وقت الاستقبال، وبعدين تشغلي أغاني فيها بهجة وقت تبادل الدبل أو وقت الصور. ولو حد من صحابك بيعرف يعزف أو يغني ممكن يعمل فقرة لايف بسيطة وسط اليوم، وده هيكون شيء مميز جدًا وهيكون فيه تفاعل وسعادة كبيرة أوي.

6-فقرات تفاعلية مع الضيوف

لو عايزة الحفلة تكون ممتعة ومش تقليدية، اعملي شوية فقرات تفاعلية فنص الخطوبة. زي إنك تعملي كروت فيها أسئلة لطيفة عن العريس والعروسة والضيوف يجاوبوا عليها. أو تعملي فقرة “قولنا رأيك فينا” والناس تكتبلكم نصائح للزواج أو يتصوروا معاكم ويمضوا في ألبوم الذكريات. دي تفاصيل بسيطة لكن هتفرق جدًا في الجو العام. وكمان هتساعد الضيوف من أهلك وأهل العريس أنهم يندمجوا اكتر مع بعض.

ضيوف الخطوبة

7-لبس الخطوبة في البيت

لبس الخطوبة سبب خوف عرايس كتير. رغم أن اختياره بيتم بكل بساطة، والأفضل أنك تختاري فستان خطوبة يكون بسيط وأنيق في نفس الوقت. ولو الحفلة في النهار اختاري ألوان فاتحة وماتيريال خفيفة، ولو بالليل ممكن تعتمدي على ستايل فيه لمعة بسيطة. وطبعا لازم خطيبك كمان يختار لبس مناسب ومتناسق معاكي. ومفيش داعي للتكلفة والتجهيزات الكتير، الأهم إنكوا تبقوا مرتاحين وشكلكم شيك في الصور.

8-التصوير وتوثيق اللحظة

مهما كانت الحفلة بسيطة، التصوير جزء مهم جدًا. تقدري تجيبي مصور محترف لو الميزانية تسمح. أو تجهزي ركن تصوير فيه موبايل على حامل وإضاءة جيدة وتخلي صحابك يصوروا. وممكن كمان تطبعي الصور في ألبوم أو تعملي منهم فيديو صغير باللحظات الحلوة. علشان اللحظات دي مش بتتكرر. وضروري أننا نرتب فكرة التصوير والمسؤول عنه عشان هنندم لو فاتنا فرصة توثيق اللحظات الحلوة دي.