أرخص أماكن شهر العسل خارج مصر

بتفكروا تقضوا شهر العسل خارج مصر بميزانية محدودة؟ يبقى أكيد محتاجين تعرفوا أرخص أماكن شهر عسل خارج مصر بتوفر أماكن إقامة حلوة وخدمات مناسبة للعرسان.

هنا دليلكم للخروج في شهر عسل مميز بميزانية مناسبة وأماكن متنوعة في كل أنحاء العالم. هنوضح أماكن في أوروبا وأسيا وأفريقيا عشان تختاروا الوجهة الأفضل بالنسبالكم.

 إزاي تختاروا أرخص أماكن شهر العسل ؟

الأول هتحتاجوا تعرفوا إزاي تختاروا المكان المناسب ودا هيكون بناءً على أكثر من عامل:

أولًا: موسم السفر

يُفضل معاد شهر العسل يكون بعيد عن الموسم السياحي. يعني مش في نص الصيف مثلاً. ممكن تسافروا آخر الصيف، أو أول الخريف، أو حتى بداية الشتا لو المكان مش بارد. دا هيوفر عليكم في سعر الطيران، وبرضو سعر الإقامة في الفندق.

ثانيًا: البحث والمقارنة

حاولوا تعملوا بحث مكثف عن أرخص أماكن شهر العسل خارج مصر. خاصة ترشيحات المواقع، وتتعمقوا في البحث عن الباقات للعرسان ودي ممكن تشمل الإقامة والوجبات والجولات السياحية. وخلوا بالكم من تقييمات البلوجرز واليوتيوبرز لإن مش كلها حقيقية ولا موثوقة 100%.

ثالثًا: الميزانية

صعب تلاقوا دولة عملتها أقل من العملة المصرية ودا لو متاح هيخليكم تحسوا إنكم مش بتصرفوا كتير. لكن بما إن العملة المصرية حاليًا مضطربة فممكن تحددوا الميزانية بالدولار. بحيث تشوفوا هتحتاجوا في كل بلد تصرفوا في المتوسط كام دولار. وبناءً عليه هتقدروا تحددوا الوجهة دي بالنسبالكم من أرخص أماكن شهر العسل خارج مصر ولا هتبقى برضوا مرتفعة عليكم.

أرخص وجهات شهر العسل في أوروبا

هناخد بعض الترشيحات عن أماكن رخيصة في أوروبا. مش معنى إنكم هتسافروا أوروبا فالميزانية هتكون عالية. بالعكس في أماكن كتير ممكن تكلفة الإقامة فيها تكون أقل من أماكن ساحلية في مصر.

1– جزيرة مالطا: من الأماكن اللي فيها شواطئ جميلة وأماكن تاريخية كتيرة. فتقدروا تستمتعوا بالسواحل وزيارة الأماكن السياحية وكمان الأطعمة فيها مميزة.

2- جزيرة كريت: ودي جزيرة يونانية مشهورة جدًا وبالمناسبة متقلش جمالًا عن جزيرة سانتوريني وميكونوس المشهورين جدًا في اليونان. والميزة في كريت إن فيها شواطئ حلوة وأماكن إقامة لطيفة والأسعار أقل من النصف لو هنقارنها على سبيل المثال بباقي الجزر اليونانية المشهورة.

3- أمالفي: واحدة من بين المدن الإيطالية الجميلة جدًا، ورغم إن فيها أماكن غالية إلا إن فيها أماكن رخيصة جدًا. وهي بلدات صغيرة شوية لكن فيها مناظر طبيعية ساحرة وشواطئ ناعمة، زي مايوري ومينوري.

4– أنطاليا: طبعًا مفيش عرسان في مصر مش نفسهم يقضوا شهر العسل في تركيا. ووضحنا قبل كدا أفضل فنادق شهر عسل في إسطنبول. ولكن لو زيارتكم لتركيا في الصيف فأكيد الأفضل أنطاليا، والمعروفة بشواطئها الجميلة. وفيها أماكن أثرية كتير هتنبسطوا بزيارتها تعرفوا تاريخها أو على الأقل تاخدوا فيها صور للذكرى.

أرخص أماكن شهر العسل في جنوب شرق آسيا

طبعًا الموضة الشائعة في شهر العسل خارج مصر بدأت مع موجة دول جنوب شرق آسيا. أو نقدر نقول تحديدًا الإتجاه لشهر العسل على الجُزر، عشان كدا هنوضح أماكن مناسبة للميزانيات المحدودة.

1– جزيرة بالي: لا يخفى على أحد إن جزيرة بالي من أجمل الجزر في إندونيسيا. ولا تختلف كثيرًا عن جزر المالديف. وبتقدم مستوى مميز من الخدمات بسعر مناسب جدًا للميزانيات المحدودة. هتختاروا فقط مكان إقامة بالسعر اللي يناسبكم أما باقي الخدمات فأسعارها منطقية جدًا.

2- جزيرة بوكيت: ابحثوا كدا عن سواحل بوكيت في تايلاند وانتم هتتفاجئوا من جمالها. فيها أماكن إقامة مميزة جدًا وأسعارها كمان مناسبة. وفيها أنشطة كتير تقدروا تستمتعوا بيها زي الغطس وركوب الأمواج.

3– لانكاوي: من مدن ماليزيا الرائعة، وهي أرخبيل أو مجموعة من الجزر مش بس جزيرة واحدة. يعني تقدروا تختاروا مكان الإقامة بسهولة لإن في خيارات كتير للميزانيات المتوسطة أو حتى المنخفضة. وطبعًا هتلاقوا شواطئ نقية جدًا ومناظر طبيعية كتير، وتقدروا تستمتعوا بالرحلات البحرية وسعرها برضو معقول.

أرخص أماكن شهر العسل في إفريقيا

طب بما إنكم في مصر ليه هتقضوا شهر العسل في إفريقيا أصلًا؟ من باب التغيير أو حب تجربة أماكن جديدة، مش بس كدا دا في أماكن في إفريقيا متتخيلوش إنها موجودة أصلًا. ولكن هنكتفي بذكر أرخص أماكن شهر العسل خارج مصر عشان تناسب ميزانيتكم.

1– زنجبار: ودي جزيرة كدا مش معقولة في تنزانيا، بتطل على المحيط الهندي. شواطئها لطيفة جدًا والإقامة فيها مش غالية. وفيها أماكن للجولات السياحية زي البلدة الحجرية، أو تخرجوا في رحلات بحرية على مركب شراعي.

2– كيب تاون: سمعتوا عنها قبل كدا؟ طب لو أول مرة تسمعوا فهي من أجمل المدن في دولة جنوب إفريقيا. وحاليًا بقت من أشهر المدن السياحية في العالم ورغم كدا أسعارها مش مبالغ فيها. خاصة لو روحتوا أماكن زي باي وكليفتون فأسعارها مناسبة أوي وبتوفر تجربة سياحية متكاملة. كمان أسعار الأكل والخدمات أو حتى الجولات السياحية مناسبة جدًا.

3– طنجة: لو مش عايزين بلد أجنبي هيكون مناسب جدًا تسافروا طنجة بالمغرب. مش بس عشان من أرخص أماكن شهر العسل خارج مصر كمان عشان هي مدينة غنية جدًا بالأماكن الأثرية ومزيج مذهل من الثقافة المغربية والأوروبية. وطبعًا فيها شواطئ رائعة وأماكن إقامة بأسعار مناسبة.

4– الحمامات: ودي مدينة تونسية ساحلية جميلة جدًا. فيها تنوع جميل في أماكن الإقامة وبأسعار مناسبة. وتقدروا فيها تزوروا المدينة القديمة والشواطئ الرملية.

وطبعًا مش محتاجين نأكد عليكم إن الاستمتاع مش ضروري يكون مُكلف. بل بالعكس ممكن تقضوا أجمل وقت في أرخص أماكن شهر عسل خارج مصر بدون تكلفة كبيرة.

اقرأ أيضًا: تجهيزات شهر العسل للعروسة.

اقرأ أيضًا: تجهيزات شهر العسل للعريس.