أخطاء يوم الفرح.. تجنبيها في 12 خطوة!

أي عروسة حصل معاها كواليس كتير وقت الفرح.. سواء أخطاء يوم الفرح أو حاجات عملتها مندمتش عليها، وممكن تنصح بيها صحابها بعد كدة.

في المقال دة حنركز معاكم في أخطاء يوم الفرح من قصص واقعية اتحكت لينا من كذا عروسة جديدة.

1- تعملي ايه لو جالك الدورة يوم فرحك؟

عرايس كتير اتعرضوا للموقف دة رغم تخطيطهم كويس أن يوم الفرح بعيد تماما عن مواعيد الدورة الشهرية، ولكن التوتر ولغبطة الهرمونات بيكونوا السبب.

والحل أنك تهدي ومتتوتريش لأن دي طبيعة جسمك في الفترة دي.

والنصيحة هنا أنك لو عايزة تظبطي مواعيد الدورة لازم تتابعي مع طبيبة نسا علشان تديكي أدوية لفترة محددة وبجرعات معينة.

2- تاخدي طقم واحد من الملابس الداخلية!

الأفضل أنك تاخدي طقمين على الأقل علشان لو فيه مشكلة حصلت على سبيل المثال: أن الهدوم فيها أي افرازات أو عرقتي خصوصا في فصل الصيف، وبالتالي حتكوني مأمنة نفسك.

3- متعلقات فستان الفرح

نصيحة قالها كتير من العرايس اللي اتكلمنا معاهم أنك لازم تاخدي زيادة من كل حاجة متعلقة بلبس الفرح على سبيل المثال: رباط الفستان، ولو عروسة محجبة تاخدي باندانا قصيرة وطويلة ودبابيس طرحة، وخللي معاكي إبرة وخيط احتياطي.

4- لازم تلبسي شوز بكعب.. من أكبر أخطاء يوم الفرح!

ودي من أشهر أخطاء يوم الفرح لأن عرايس كتير بتحب شكلها يكون مثالي بس دة على حساب تعبها وكلام الناس، وبنات كتير بتفضل تلبس كوتشي يوم الفرح علشان متتعبش، ودة كان أكتر قرار صح عملوه.

5- حضور كل الصحاب قبل الفرح.. أشهر أخطاء يوم الفرح!

العروسة دايما بتكون قلقانة أن صحابها ممكن يزعلوا أنهم محضروش معاها اليوم من أوله، ودة سبب كافي للتوتر لأنك حتسمعي آراء كتير تسببلك قلق، ودة من أشهر أخطاء يوم الفرح!

والحل هو أن يكون معاكي شخص أو شخصين زي أختك مثلا، ولازم اللي حواليكي يقدر قرارك دة!

6- قلة الأكل.. من أخطاء يوم الفرح الصحية!

العرايس دايما بتفضّل أنها متاكلش أي حاجة طول اليوم حتى وجبة الإفطار؛ ودة لأنهم بيحسوا أنهم ممكن يتعبوا ومعدتهم توجعهم.

ونصيحتنا ليكي لازم تاكلي حتى لو حاجة بسيطة على سبيل المثال: الزبادي أو خضراوات وفواكه.

7- تنسي شرب الماء على مدار اليوم!

جسمنا محتاج الماء يوميا حوالي 2 لتر، وفي بنات كتير من زحمة اليوم بينسوا يشربوا ماية. خليكي مجهزة زجاجة ماء من البيت وخديها معاكي في المكان اللي بتجهزي فيه وخليها أودامك طول الوقت.

8- تنظيف البشرة قبل الفرح.. خطأ متكرر!

تنظيف البشرة مهم جدا ليكي لأنه بيدي نضارة فورية، ولكن فيه عرايس بيفضلوا عمله قبل الفرح بيوم أو يومين، ودة بيسبب مشاكل خصوصا لو بشرتك حساسة زي ظهور الحبوب.

والأفضل هو عمل تنظيف البشرة قبل الفرح بأسبوع أو 10 أيام علشان لو حصل أي التهابات يكون فيه وقت كافي لعلاجها.

9- الباديكير.. كابوس في معظم الأحيان!

من كلام عرايس اتكلمنا معاهم كان فيه شكاوي من جلسة الباديكير؛ لأنها سببت ليهم التهابات وكدمات في الأصابع بتوصل لدرجة أنهم مش قادرين يحركوها.

والحل لو بشرتك حساسة بلاش تعملي خطوة الباديكير في البيوتي سنتر، واعتني كويس بالأظافر بوصفات طبيعية في البيت.

10- جيل الأظافر شكله حلو.. ولكن!

بنات كتيرة بيحبوا يحطوا جيل الأظافر علشان يثبت المانيكير، ولكن زي ما شكله حلو بيدمر الأظافر وبيأثر عليها بشكل كبير، فالأفضل تستخدمي المانيكير فقط. 

11- إزالة الشعر.. من أخطاء يوم الفرح المتكررة!

فيه بنات كتير بيعتقدوا أن إزالة الشعر من الجسم قبل الفرح بيوم حيخليها مرتاحة مدة طويلة، ودة من أخطاء يوم الفرح المتكررة أيضا؛ لأن الاستعجال في إزالة الشعر ممكن يسبب التهابات!

وببساطة أنتي ممكن تعملي الخطوة دي قبل الفرح بعدة أيام ولو لاقيتي أن فيه شعر ظهر ممكن تعملي شيفينج واستخدمي جيل الصبار أو فوم الحلاقة حيساعد على تقليل الالتهابات.

12- التوتر طول اليوم!

 من أكتر غلطات يوم الفرح المنتشرة، لأن اليوم بيكون مضغوط وفيه أحداث كتير، وفي الحالة دي حاولوا أنكم تشربوا حاجات تهديكم على سبيل المثال: النعناع، والينسون، والبابونج.

اقرأ أيضا: ازاي تهتمي بتغذية صحية أثناء التجهيز للفرح؟