أجمل مدن العالم اختاروا منها لرحلة شهر عسلكم

كل سنة بتتجدد قوائم أجمل مدن العالم وأفضلها، وده بيكون على حسب تفضيل الناس ليها كوجهات سفر وسياحة، وسهولة الحركة والتنقل فيها.

وكمان ده بيكون بناء على جودة الخدمات اللي بتتقدم فيها زي خدمات الفنادق والمطاعم والأسواق والأماكن الترفيهية والفنية.

وكمان اقتصادها العالي اللي بيوفر تجارب تسوقية وترفيهية ممتعة للزوار والسياح.

وخدمات البنية التحتية والتوسع العمراني اللي بيخفف من الشعور بالازدحام وتكدس الزوار.

فلو كنتم ناويين تقضوا شهر عسلكم برة مصر ومحتارين تروحوا فين.

فاحنا هنا جبنا لكم قايمة أجمل مدن العالم لسنة 2024.

وده عشان تقدروا تختاروا منها ايه المدينة اللي تحبوا تقضوا فيها أول أيام حياتكم الزوجية وتستمتعوا بجمالها وخدماتها؛ فتابعوا معانا.

باريس من أجمل مدن العالم:

طبعاً مش محتاجين نتكلم عن باريس وجمال باريس مدينة العشاق.

وحلم أي عروسين جداد إنهم يقضوا شهر عسلهم في باريس أكيد.

وتعتبر أيقونة القبلة الفرنسية تحت برج إيفل لحظة يتمنى كل حبيبين إنهم يعيشوها.

ومش بس كدة، إنما في باريس تقدروا تلاقوا كل اللي بتحبوه وبيجذب انتباهكم.

لو بتحبوا الفن والأدب هتلاقوا متاحف فنية كتير فيها أهم آثار العالم زي متحف اللوفر ومتحف أورساي.

واللي فيهم أشهر الأعمال الفنية لأعظم الفنانين على مر التاريخ زي ليوناردو دافنشي وفان جوخ وبابلو بيكاسو وغيرهم كتير.

وده غير الأماكن التاريخية اللي بيمتد تاريخها لآلاف السنين زي قصر فرساي وكاتدرائية نوتردام.

وكمان تقدروا تستمتعوا بالمناظر الطبيعية الرائعة على ضفاف نهر السين.

دبي:

ولو حابين تقضوا شهر عسلكم في بلد عربي لسهولة التواصل وعشان متحتاجوش تستخدموا لغة أجنبية.

وميبقاش فيه فجوة ثقافية بينكم وبين الناس اللي حواليكم.

فأكتر مكان هيوفر لكم ده وفي نفس الوقت تستمتعوا فيه بجودة الحياة والأماكن هي مدينة دبي في الإمارات.

فكل شيء في دبي مذهل بطريقة خرافية، سواء كان برج خليفة اللي بقى بيظهر في أفلام كتير سواء أجنبية أو هندية، أو أسواقها ومراكزها التجارية اللي مش بس مخصصة للشوبينج وإنما فيها مدن ترفيهية كاملة بكل المرافق سواء ألعاب أو ممارسة رياضة ترفيهية.

روما:

أما لو بتحبوا النمط الإيطالي في الحياة، وبتغريكم الروح الإيطالية المرحة، والأكل الإيطالي اللذيذ.

فأكيد لازم تروحوا روما عاصمة إيطاليا.

وده لإنها بتجمع طول الوقت بين عراقة تاريخها اللي بيمتد لآلاف السنين قبل الميلاد، وتمدنها اللي بيواكب عصور المستقبل.

فروما هي أصل الحضارة الغربية كلها، وفيها الفاتيكان مقر البابوية المسيحية للعالم كلها.

وفيها أكبر كنيسة في العالم كاتدرائية سانت بطرس، ده غير المتاحف والقصور اللي شاهدة على الحضارة الرومانية القديمة.

وتقدروا تستمتعوا بجولات حرة في شهر عسلكم في الأحياء القديمة وبين القصور التاريخية اللي شهدت على قصص حب ملوك وأمراء الرومان.

برشلونة أجمل مدن العالم في أسبانيا:

أسبانيا بلد الأندلس القديمة اللي على الرغم من كونها دلوقتي دولة أوروبية إلا إنكم وانتم بتتجولوا فيها هتحسوا بعبق التاريخ العربي في كل شبر فيها.

فلو عاوزين تسترجعوا التاريخ ده وتعيشوا أجواء أندلسية في شهر عسلكم؛ فبرشلونة هتبقى وجهة مناسبة أوي ليكم.

ده غير إنكم تقدروا تستمتعوا بشواطئها الجميلة وشوارع العاصمة الكتالونية المرصوفة بالحجارة.

كل ده خلاها تتربع على عرش قوائم أجمل مدن العالم.

المدينة البرتغالية بورتو:

وانتم في أسبانيا ممكن تحودوا شوية وتروحوا البرتغال كمان اللي فيها مدينة بورتو من أجمل مدن العالم.

وده لإن مدينتها القديمة التاريخية لوحدها من ضمن قائمة التراث العالمي لليونسكو.

غير منظر الغروب فيها اللي بيختلف عن أي مكان في العالم، وتقدروا تستمتعوا بالمنظر ده من حديقة جارديم دو مورو العالمية.

وتعبروا منها على جسر دوم لويس الأول التاريخي اللي اتبنى سنة 1886، ومن فوق الجسر ده تقدروا تشوفوا مدينة بورتو كلها.

وكمان متاح ركوب التلفريك من فوق عشان تتفرجوا بشكل أكبر على المدينة وتستمتعوا بمناظرها.

ده غير إن الجسر ده بيربط بين مدينة بورتو ومدينة فيلا نوا دغايا الساحلية اللي بتتميز بشواطئها الجميلة ومعالمها الطبيعية الرائعة.

يعني تقدروا تتفسحوا وتتفرجوا على أكتر من مدينة في زيارة واحدة.

وفي نهاية المقال نتمنى اننا نكون فدناكم بأفكار لأماكن أجمل مدن العالم تقدروا تستغلوها وانتم بتخططوا لرحلة شهر عسلكم.

ونتمنى لكم رحلة ممتعة وبداية حياة جديدة سعيدة مليانة حب وفرح وهنا.