أجدد موضات الديكور دلوقتي اتعرفوا عليها قبل ما تجهزوا عشكم الجديد

أجدد موضات الديكور دي حاجة لازم تعرفوها قبل ما تبدأوا تجهزوا عش الزوجية بتاعكم.

يمكن مش هيبقى متوفر ليكم إنكم تجددوا موضة البيت كل شوية.

بس فرصة حلوة إنكم تبدأوا حياتكم في بيتكم على أحدث موضة، وبكدة هياخد وقت طويل شوية على ما تبتدي موضته تقدم.

عشان كدة في المقال ده هنحاول نعرفكم كل جديد في موضة الديكورات دلوقتي، وايه هي ستايلات الديكورات الجديدة اللي ممكن تستخدموها في شققكم؟

كمان هنحاول نكون دليل ليكم في إنكم تعرفوا إزاي توفقوا بين الموضة دي وذوقكم الخاص وكمان طبيعة الشقة وحجمها وتفاصيلها؟

فتابعوا معانا المقال.

أجدد موضات الديكور في الألوان:

أول حاجة ممكن نعرفها عن أجدد موضات الديكور في الألوان هو إنها بتعتمد حالياً على اللون الأخضر الميوتيد.

واللون ده عبارة عن لون أخضر غامق متضاف عليه لون رمادي، وده عشان تخفف من زهوة اللون.

لكن ده ميمنعش برضه إن فيه ستايلات للديكور الحديث بتستخدم اللون الأخضر الزاهي، بس اللون ده مبيستخدمش في دهان الحوائط.

اللون الأخضر الميوتيد هو اللي بيتدهن بيه الحوائط، إنما اللون الأخضر الزاهي ممكن يبقى لون بعض قطع الأثاث زي الكنب والكراسي.

واللون الأخضر في الأساس انتشر في الديكور من بعد الكورونا والحجر الصحي.

الفترة دي خلت الناس تقضي أغلب الوقت في بيوتهم بعيد عن الطبيعة والأماكن المفتوحة، وده خلى مصممين الديكور يفكروا إنهم يعوضوا الموضوع، وينقلوا جو الطبيعة للبيوت.

وده بيدي للبيت واللي عايشين فيه أجواء سكينة وأمان وهدوء، ولنفس السبب ده برضه انتشر في الفترة الأخيرة استخدام ألوان البيجات الدافية سواء في الدهانات أو ستايلات عفش البيت.

والألوان دي متاخدة من الستايل الياباني وفلسفة الوابي سابي اليابانية.

واللي بتعتمد على إنها تدمج بين جو الطبيعة الحقيقية برة البيت والحياة جوة البيت.

وده بحيث إن الواحد ميحسش بنقلة كبيرة لما يدخل البيت وهو راجع من برة، من مكان فيه شجر وخضرة وألوان دافية لمنظر مختلف تماماً في البيت.

ومن طرق دهان الحوائط الجديدة في الفترة الحالية هي طريقة اللايم واش.

والطريقة دي بتخلي الحيطة تبان وكإنها مدهونة بدرجات مختلفة من نفس اللون أو كإنها مش متشطبة كويس.

ستايل ريترو رفيفر:

وده من أجدد موضات الديكور في ستايلات تنسيق عفش البيت، وهو ستايل مميز بالقطع الغريبة في وسط ديكور البيت.

زي مثلاً إنكم تقدروا تستخدموا كرسي أو ترابيزة أو أي قطعة أثاث شكلها أو لونها مختلف عن بقية الأوضة وسط بقية العفش.

والفكرة دي تنفع أوي لو انتم معتمدين أصلاً على ستايلات الديكور المعاصرة والمودرن أو الميني ماليست، عشان تديهم تميز في الشكل والتصميم.

لكنها متنفعش مع الستايلات الكلاسيك مثلاً.

التصميمات اليدوية:

وعلى الرغم من إن تصميمات كتير منها تعتبر حاجة كلاسيكية قديمة من بداية البشرية يعني، إلا إنها برضه من أجدد موضات الديكور في الفترة الحالية.

وده لإن التصميمات اليدوية بتتميز بمظهرها البشري اللي بيخليها تخرج بشكل مش متناسق زي تصميمات المكن اللي بتبقى مظبوطة بالملي!

التصميمات دي بتظهر العفوية البشرية الطبيعية اللي ممكن يبقى فيها أخطاء صناعة أو مقاسات مش مظبوطة بالسنتي، وده بيدي إحساس عفوي بالراحة والاسترخاء في البيت.

ستايل الميني ماليزم:

الستايل ده استايل عملي بيقوم على ان البيت ميكونش فيه إلا أقل الأشياء اللي محتاجينها فعلاً في استخدامنا اليومي الضروري.

وعلى الرغم من إنه عادة بيكون ستايل بارد إلا إنه في الفترة الأخيرة اتغير الاتجاه ده، وبقت الموضة فيه انه يتدمج معاه ألوان دافية سواء في الإضاءة أو الدهانات أو الإكسسوارات أو الديكورات المختلفة.

استخدامات الرخام في أجدد موضات الديكور:

الموضة حالياً في ديكورات الرخام هي إننا نستخدم الرخام القوي اللي فيه لونين مختلفين جامد زي الأبيض والأسود.

وأماكن استخدام الرخام بتكون عادة في قرص المطبخ أو طاولات السفرة أو القهوة أو ركنة الصالون أو أوضة الريسيبشين.

ونوع الرخام المنتشر حالياً هو الرخام الترافرتيني، وهو رخام مصنوع من حجر جيري.

مميزات نوع الرخام ده انه أقل صلابة، وده بيخليه مش بس يستخدم في الترابيزات وإنما ممكن كمان نستخدمه في الأباجورات.

وفي نهاية المقال نتمنى إننا نكون قدرنا نوفر لكم كل المعلومات اللي انتم محتاجينها عشان تعرفوا أجدد موضات الديكور اللي تقدروا تستغلوها وانتم بتجهزوا بيتكم الجديد، وألف مبروك مقدماً.