أجدد تصميمات جزيرة المطبخ في 2025

أجدد تصميمات جزيرة المطبخ بتوفر لك منظر جمالي لمطبخك عشان تقدري تقضي فيه وقت ممتع وانت بتطبخي.

ويبهجك وانت بتقومي بالأعمال المنزلية المعتادة فيه وميكونش وقت كئيب بتتمني لو يخلص بسرعة وتخلصي منه.

والجزيرة اللي نقصدها هنا لو متعرفيهاش فهي منطقة الترابيزة اللي بتكون في وسط مطبخك.

وبتستخدميها عادة في تحضير الأكل، وأحياناً بيكون فيها حنفية المطبخ أو البوتجاز على حسب تصميم مطبخك.

وأوقات كتير أصحاب البيت بيتجمعوا عندها وياكلوا وجبة خفيفة عليها في نص اليوم.

وبكدة يشاركوكي الوقت بدل ما تحسي إنك منعزلة لوحدك طول اليوم في مطبخك.

وعلى الرغم من إن الناس عادة بتركز أكتر مع الإضاءة وألوان الحيطان والبلاط وهم بيصمموا المطابخ.

إلا إن بشوية ابداع نقدر نحول الجزيرة دي إنها تبقى هي نجمة المنطقة اللي كل الأنظار بتتلفت لها.

خصوصاً إن هي اللي بتتجمع عندها الأسرة خلال اليوم، وده معناه إنها مش مجرد شيء في مطبخك بتستغليه وخلاص.

إنما هي منظر جمالي من المفترض إنه بيجذب الكل، وفي طرق كتير تخليكم تقدروا تجذبوا النظر لتصميمها.

فحتى لو ميزانيتكم بسيطة تقدروا تستخدموا ترابيزة أنتيك قديمة مثلاً، وبالتالي ساعتها هتبقى هي نفسها عنصر جذب.

خصوصاً لو معتمدين على الاستايل الكلاسيكي في ديكوراتكم عموماً، وكمان تقدروا تبلطوها برخام أو بلاط بأشكال وألوان جذابة.

أو تدهونها هي نفسها بلون من ألوان الموضة الرايجة.

وعشان نسهل عليكم الموضوع حاولنا نقدم لكم هنا أفكار مختلفة في أجدد تصميمات جزيرة المطبخ في 2025.

وكل اللي عليكم إنكم تختاروا منها اللي يناسب ذوقكم وديكور بيتكم ويكون في حدود ميزانيتكم؛ فتابعوا معانا المقال.

استخدام الرخام فيها:

لو تصميم مطبخكم أرضياته خشبية من اللون الداكن وحوايطه رخام.

فهيكون من المناسب جداً إنكم تختاروا للجزيرة إنها تكون قاعدتها بلون داكن مشابه للأرضيات، في حين إنها من فوق تكون برخام مشابه لرخام الحيطان.

أو تكون بلون محايد زي الأبيض العاجي، وده هيدي للمطبخ أجواء دافية تحبب كل الأسرة في تواجدهم فيه.

أو ممكن تبقى الجزيرة كلها من الرخام، واللي تقدروا تنسقوه مع لون دواليب المطبخ؛ فلو كانت بلون الخشب الفاتح مثلاً.

ده يخليكم تقدروا تختاروا الرخام يكون بدرجات البيج والبني المشابهة للون الخشب.

وتقدروا تزخرفوا حواف الرخام عشان يدي مظهر جمالي أحلى.

أفكار مطرقعة في أجدد تصميمات جزيرة المطبخ:

لو بتحبوا الأفكار المطرقعة والمختلفة، وعايزين تنفذوا ده في مطبخكم؛ فتقدروا مثلاً تختاروا أرضيته تكون باللون الأخضر اللامع.

وعشان توازنوا الأمور بعد كدة هتبقى الدواليب المحيطة باللون الكريمي في حين الجزيرة هيكون من الأفضل ليها إنها تكون خشب بلون أسود غامق.

ولو مطبخكم تقليدي من النوع القديم؛ فممكن تستخدموا في تصميم قاعدة الجزيرة بدل ما تكون خشب أو رخام عادي تقدروا تخلوها من البلاط الملون.

صحيح التبطين من جوه هيكون خشب، بس تقدروا تركبوا عليه من بره بلاط بأشكال هندسية ملونة مختلفة تضيف أجواء حيوية لمطبخكم.

وحتى لو تصميم الجزيرة نفسها كان عادي؛ فتقدروا تضيفوا ليه الطرقعة اللي تحبوها حواليه زي إنكم تعملوا رف لتعليق المواعين فوقه.

خصوصاً لو كانت جزيرتكم من النوع اللي فيها حنفية المطبخ، ويكون الرف ده بتصميم مختلف زي إنها يكون على شكل خطافات.

استخدامات الخشب المختلفة:

على الرغم من إننا نقدر ندخل الخشب في كتير من أجدد تصميمات جزيرة المطبخ إلا إن المميز هو محاولات استخدامه بطرق مختلفة.

يعني مثلاً نقدر نستخدمه بشكله الطبيعي التقليدي من غير ما يكون مدهون، بحيث يدي منظر طبيعي للمطبخ.

ومنظر حبيبات الخشب الطبيعي هيضيف مظهر جمالي رائع في قاعدة الجزيرة، وهيكون من المناسب معاه إن سطحها يكون من الرخام بحواف مستديرة.

وكمان نقدر نستخدم أنواع مختلفة من الخشب تضيف عمق ورقي للمظهر العام خصوصاً لو مطبخكم حجمه كبير.

وده زي مثلاً خشب شجر الجوز اللي ممكن نستخدم معاه على السطح ألواح من الحجر الأخضر أو البرونز بدل الرخام.

ولو بيتكم فيلا واسعة ومطبخكم هيكون له مكان كبير وفخم فيها؛ فتقدروا تستخدموا خشب البلوط الفاخر في قاعدة الجزيرة مع رخام من الكوارتز.

أجدد تصميمات جزيرة المطبخ من مكونات قديمة:

حتى لو ميزانيتكم قليلة ده مش معناه إنكم تضطروا تستغنوا عن منطقة الجزيرة في مطبخكم.

في الحقيقة تقدروا تعيدوا تدوير استخدام حاجات قديمة ممكن كانت مركونة عندكم أو في بيت أهاليكم وتصمموا منها جزيرتكم الخاصة.

زي مثلاً لو عندكم مكتب خشب قديم تقدروا تدهنوه بلون أو طريقة مناسبة مع ديكور مطبخكم، وتركبوا عليه سطح رخام.

وبكدة بقى عندكم أجدد تصميمات جزيرة المطبخ الفريدة من نوعها ومتصممة مخصوص علشانكم ومش موجودة في أي مكان تاني في الدنيا.

وفي النهاية نتمنى إننا نكون فدناكم وقدرنا نقدم لكم أفكار مختلفة في أجدد تصميمات جزيرة المطبخ تساعدكم تختاروا التصميم اللي يناسبكم ويكون في حدود ميزانيتكم.

ونتمنى لكم بداية حياة زوجية سعيدة، وإنكم تقضوا أحلى الأوقات في عشكم الجديد، وتعملوا ذكرى حلوة في كل ركن فيه.