هدايا لأم العريس عشان تكسبي قلب حماتك المستقبلية

ليه لازم تجيبي هدايا لأم العريس؟ فيه حديث عن الرسول (صلى الله عليه وسلم) بيقول فيه: “تهادوا تحابوا”.

فالهدية مهما كانت بسيطة هي أكتر حاجة بتحسس اللي بتتقدم له إن الطرف التاني بيحبه ومهتم وبيه.

وإلا مكنش كلف نفسه، وجاب له هدية مخصوص.

ووانت بتبدأي حياتك الزوجية الجديدة فأكتر حد يهمك انه يحس بحبك واهتمامك ويبادلك نفس المشاعر دي، بعد شريك حياتك اللي هتتجوزيه نفسه هو أمه اللي جابته للدنيا وليكي.

وكل ما علاقتك كانت قريبة وحميمة مع حماتك ده هيقوي علاقتك أكتر بعريسك.

أمه هي اللي تعبت وهي بتربيه وشيفاه قدامها بيكبر، ودلوقتي جه الوقت اللي بيختار فيه شريكة حياته.

فاثبتي لها انه اختار صح، وانك هتكوني لها بنت قبل زوجة ابن، ومش جاية عشان تاخديه منها بعد ما تعبت فيه كل السنين اللي فاتت دي.

كل ده تقدري تعبري لها بيه من خلال هدايا بسيطة.

سواء كانت في المناسبات اللي بتمر عليكم خلال فترة الخطوبة والتحضير للجواز.

واللي هي زي عيد ميلادها أو عيد الأم أو عيد جوازها هي وحماكي.

أو حتى لو هدية من غير مناسبة بتعبري لها بيها عن حبك وشكرك وامتنانك لوجودها في حياتكم.

والهدية دي مش لازم تكون غالية وتمنها يقطم وسطك ويدمر ميزانيتك.

ممكن تبقى هدايا بسيطة ورقيقة لكن بتعبر عن معاني كتير.

وفي المقال ده احنا جمعنا لك أفكار مختلفة تقدري تستخدميها وانت بتختاري الهدية اللي ممكن تجيبيها لحماتك في أي مناسبة تمر عليكم.

فتابعي معانا المقال.

طبق مجوهرات خشبي للتسريحة:

حماتك في الأول وفي الآخر ست زيك، بتحب تتزوق وتحط اكسسوارت ومجوهرات.

وزي ما انت بتكوني مهتمة بالتفاصيل دي هي كمان هتكون مهتمة بيها.

وده يخلي مجالات الاختيارات قدامك واسعة وفي نطاق اهتماماتك.

فتقدري تجيبي هدايا لأم العريس عبارة عن طبق مجوهرات صغير تحطه على التسريحة.

وده هيساعدها في إنها تقدر تجمع فيه مجوهراتها الصغيرة زي الخواتم والحلقان ومتوهش منها.

وتقدري كمان تخلي هديتك مميزة أكتر بإنك تطلبي حفر جملة مخصوص ليها زي:

“شكراً ليكي على تربية الشخص اللي اتمنيته طول عمري”.

مجوهرات واكسسوارات هدايا لأم العريس:

وكمان تقدري تقدمي لها المجوهرات أو نوعية الاكسسوارت اللي بتفضلها نفسها كهدية مختارة منك.

ومش لازم تكون هديتك من المجوهرات دايماً غالية أو تكون دهب، ممكن تبقى فضة رقيقة أو اكسسوارات من الأحجار الكريمة.

ولو محتارة في اختيار نوع المجوهرات المناسب ليها أو اللي بتفضله؛ فممكن تختاري شنطة أو محفظة للمجوهرات.

وفي الحالة دي هتقدر تاخدها معاها في أي مكان خصوصاً لو كانت بتسافر كتير.

صندوق ذكريات:

فاكرة الشكمجية؟ لو متعرفيهاش فهي عبارة عن صندوق قديم كانت الستات بتحتفظ بيه في دواليبها ويحطوا فيه كل ذكرياتهم.

سواء كان مجوهراتها الغالية أو جوابات قديمة عزيزة على قلبها أو أوراقها المهمة، يمكن بشكلها القديم مبقتش موجودة دلوقتي.

بس تقدري تحيي الموضوع ده وتخليه من هدايا لأم العريس المميزة، مش لازم تكون بشكلها القديم خصوصاً لو حماتك حد مودرن وبتحب الستايلات العصرية.

ممكن تجيبي لها صندوق شيك وتطلبي نقش جملة عاطفية جميلة ليها، زي: “النهاردة هو عريسي وبكرة هيبقى جوزي لكنه دايماً وأبداً هيفضل ابنك”.

أدوات العناية الشخصية هدايا لأم العريس:

تقدري بالهدايا دي تعرفيها إن جه الوقت اللي تهتم فيه بنفسها وتشيل من عليها هم ابنها، وتلاقي وقت تدلع فيه نفسها وتقضي وقتها بهدوء واسترخاء.

تقدري تجيبي لها في نوعية الهدايا دي كريمات العناية بالبشرة أو أدوات مكياج من اللي بتفضلها أو شنطة المكياج نفسها لو بتحتاج تاخد المكياج معاها في السفر مثلاً.

وكمان ممكن تجيبي لها شموع معطرة تتحط في الحمام وقت الاستحمام، أو ممكن تحطها في أوضة النوم عشان تنام على روايح جميلة تديها الاسترخاء اللي محتاجاه.

وممكن كمان تكون هداياكي لحماتك في النوع ده عبارة عن أرواب حمام مريحة أو بيجامات حرير شيك.

وتقدري برضه تختاري مجموعة مختلفة من الأفكار دي وتجمعيهم مع بعض في صندوق واحد وتزوقيه بطرقك المبتكرة وتقدميه هدية واحدة.

وفي النهاية نتمنى إننا نكون قدرنا نفيدك ونساعدك في اختيار هدايا لأم العريس تقدري تكسبي بيها قلبها وتبدأي حياتك الزوجية الجديدة بحب وفرح وسعادة.