هدايا لأم العروسة… اكسب قلب حماتك بيها وخليها في صفك

ليه لازم تجيب هدايا لأم العروسة في كل مناسبة بتعدي عليكم؟ المثل بيقول: لجل الورد يتسقي العليق.

وحماتك هي اللي ربت حبيبتك طول السنين اللي فاتت دي وهي أكتر حد عارفها وحافظها في الدنيا ومنبع أسرارها.

فلو عايز وردتك تفضل مزهرة ومفتحة معاك، لازم تاخد بالك كويس من عليقها اللي بيوصل كل الحب لقلبها.

في أي مشكلة أو خناقة أو حتى خلاف بسيط هيحصل بينكم في الأول هي هتجري على مامتها تشتكيلها وتاخد رأيها.

فلو عايز ست الكل تكون في صفك وتدافع عنك وتخلي عروستك تعدي أي خلاف وتسامحك في أي مشكلة تعملها معاها.

لازم تكون كسبان قلبها الأول، ومفيش حاجة أسرع من الهدايا الحلوة اللي بتتقدم بحب تخلي الواحد يفتح قلبه بسرعة للطرف التاني اللي بيقدمها.

والنصايح المعتادة في تقديم أي هدية واختيارها هي إنك تختار حاجة تكون عارف إن حماتك هتحبها.

لكن في الحالة دي هيكون مفيد برضه إنك تحط في اعتبارك تختار هدايا بتمثل علاقتك بيها وقربكم من بعض.

على اعتبار انك بقيت ابنها خلاص مش بس عريس بنتها.

وعشان كدة احنا هنا في المقال ده جبنا لك أفكار مختلفة تقدر تستخدمها في هدايا لأم العروسة.

والأفكار دي بتجمع بين اللي كل ست بتحبه وانك تعبر من خلاله عن ارتباطك واعتزازك بعلاقتك بيها.

فتابع معانا المقال.

صينية خشبية محفورة:

ودي هتبقى هدية شيك جداً تقدر تضيفها لديكور البيت سواء عند المدخل وتجمع فيها المفاتيح والرفايع اللي بتحتاجها هي وحماك كل ما يخرجوا من البيت.

لكنها بتتنتور منهم بعد ما يرجعوا ويرموها في أي حتة قريبة، ويرجعوا يدوروا عليها تاني بعد كدة.

فالصينية دي هتوفر لهم مكان منظم يحطوها فيه أول ما يوصلوا وميحتاروش عليها تاني وهم خارجين المرة الجاية.

كمان تقدر تحطها في أوضتها على التسريحة وتجمع فيها مجوهراتها اللي بتستخدمها على طول عشان تكون قدامها بسهولة ومفيش حاجة تضيع منها.

وتقدر تخلي الهدية معبرة عن مدى حبك واعتزازك بيها بإنك تحفر لها على الصينية رسالة تعبر فيها عن مشاعرك ناحيتها أو عن شكرك ليها على تربيتها لشريكة حياتك.

كتاب ذكريات عاطفية هدايا لأم العروسة:

وده كتاب تقدر تعمله بالصور اللي جمعتكم فيها مع بعض وتعبر لها في كل صورة عن مشاعر حبك واعتزازك في اللحظة دي.

أو تكتب لها ذكرى جميلة فاكرها من اليوم اللي اتصورتوا فيه، أو موقف حلو حصل بينكم.

وكمان تقدر تستعين بعروستك إنكم تضيفوا للكتاب ده صور ليها مع مامتها في مراحل طفولتها ومراهقتها.

وتعبر لها فيه عن مدى امتنانك بالجهد اللي بذلته في تربية بنتها عشان تكون الشخصية اللي هي عليها النهاردة، فتاة أحلامك اللي اتمنيتها طول عمرك.

وبكدة هيبقى اختيارك من هدايا لأم العروسة ضرب عصفورين بحجر واحد، وقدرت ترضي وتكسب قلب البنت وأمها بهدية واحدة.

هدايا لأم العروسة من المجوهرات:

زي أي ست في العالم أكيد حماتك بتحب المجوهرات، وتقدر تستغل ده بكل أريحية في اختيار هداياك.

وده مش معناه إنك لازم تجيب هدية غالية بتمن وقدره، ممكن تكتفي بأنسيال رقيق بسيط، أو حلق صغير بحبات اللؤلؤ أو عقد بالأحجار الكريمة أو مجوهرات فضية.

أو ممكن تكون حاجة استانلس مطلية بس تكون مميزة، زي إنك تجيب إسورة فيها دلايات قلوب.

وفي واحدة من الدلايات دي تقدر تنقش تاريخ خطوبتكم أو اليوم اللي اتعرفتم فيه أو يوم الفرح اللي حددتوه.

وفي دلاية تانية تنقش عليها كلمة أم العروسة، وفي دلاية تالتة تحط أساميكم انت وعروستك، وفي الرابعة اسم حماتك وحماك.

وفي نهاية المقال نتمنى إننا نكون قدمنا لك أفكار هدايا لأم العروسة تقدر تقربك من قلب حماتك وتخليك في نظرها ابن ليها مش مجرد عريس لبنتها.

ونتمنى لكم بداية حياة زوجية سعيدة مليانة حب وفرح بينكم كلكم، وألف مبروك.