مقاس فستان العروسة إزاي تتأكدي انه هيكون مناسب ليكي طول اليوم؟
مقاس فستان العروسة أكيد أكتر حاجة ممكن تهمها في يومها المميز، وأكيد بدأتي تجربي فساتين الأفراح عشان تختاري منها الفستان اللي يناسبك.
وطبعاً أول سؤال ممكن يجي على بالك في اللحظة دي إذا كان مقاسه مناسب ليكي أو لا؟
وعلى الرغم من إن الموضوع ممكن يبان بسيط وسهل انك تحكمي عليه وانت بتقيسيه.
إلا إنه في الحقيقة فيه تفاصيل كتير بتحدد الموضوع ده.
وللأسف هي صعب أي حد ياخد باله منها بسهولة لكنها بتأثر على المظهر النهائي والشكل العام للعروسة في يوم فرحها.
وعشان كدة في المقال ده احنا جمعنا لك نصايح مفصلة لكل جزء من الفستان عشان تقدري تتأكدي من مقاسه كويس.
والمقال ده تقدري تعتبريه دليل مهم لأي عروسة بتخطط انها تروح تجرب فستانها الجديد ليومها المميز.
فتابعي معانا المقال.
مقاس فستان العروسة عند منطقة الصدر:
منطقة الصدر هي أهم منطقة في جسم عروستنا وبالتالي في فستانها؛ لإن هي أكتر منطقة بتكون باينة في الصور.
وكذلك لما بتقعدي في الكوشة؛ فلو فستانك هيكون من غير رقبة لازم تتأكدي إن صدرك هيكون باين من الجنب لما تبصي لتحت، وده عشان ميصعبش عليكي الحركة خلال اليوم.
وفي حالة إن الفستان من غير كمام اتأكدي إن مفيش قماش زايد عامل وسع من عند لحد فتحة الدراع.
لإن في حالة وجود ترهل في القماش في المنطقة دي ممكن يظهر صدرك من فتحة الدراع، أو لو فيه حمالات فممكن تتزحلق على الجزء العلوي من دراعك.
أما في حالة إنك اختارتي الفستان يكون بياقة عند منطقة الصدر؛ فلازم تكوني متأكدة إنها مناسبة لكتافك.
فلو كانت ضيقة هتجعد منك ومش هتقدري تحركي دراعتك براحتك، ولو واسعة هتقع منك وتكشف صدرك.
منطقة الإبطين والظهر:
الجزء اللي بعد كدة من جسمك هي منطقة الإبطين، فلو مكنش مقاس فستان العروسة مناسب هيترهل عند الإبطين.
أما بالنسبة للضهر؛ فلو الفستان ضيق جداً هتتراكم الدهون من ضهرك أو صدرك عليه، صحيح إنك عادة هتحاولي تقللي وزنك قبل الفرح بس متعتمديش على كدة بس.
وإنما حاولي تختاري المقاس المناسب ليكي عشان تقدري تلبسيه وتتحركي فيه براحتك.
وإذا كان فستانك بفتحات واسعة على الجانبين؛ فاتأكدي أن لحم جسمك مبيتسربش من الفتحات دي ويظهر كإنه ترهل على الجناب.
كمان حاولي تتأكدي إن مفيش أي ارتخاء في قماش الضهر، وده بإنك تجربي توطي لقدام وتمشي وانت فاردة ضهرك عشان تضمني راحتك في الحركة فيه.
ولو اخترتي فستانك يكون برباط في الضهر؛ فاتأكدي إن مسند الضهر من جوة ناحية الخيوط في مكانه الصحيح.
وكمان خدي بالك إن خيوط الرباط هتتمدد شوية وانت لابسة الفستان وبتتحركي فيه، عشان كدة من الأفضل إنك تربطيها جامد كويس في البداية حتى لو حسيتي بخنقة منها.
مقاس فستان العروسة عند الخصر والوركين:
الموضوع بسيط جداً في المنطقة دي، أهم حاجة إنها تظهر بشكل يبان نحيف وجميل.
فلو الفستان بان في المنطقة دي واسع جداً ومتهدل أو ضيق جداً ومجعد في الحالتين مش هيكون المظهر النهائي جميل.
وفي النهاية اتأكدي إن طول الفستان هيناسبك وانت بتمشي وتتحركي بيه، فلو كانت تنورة الفستان طويلة جداً هتكعبلك وتتبهدل منك وانت ماشية.
صحيح إنك ممكن تغطي الموضوع بإنك تلبسي جزمة بكعب عالي بس الكعب العالي ممكن ميخلكيش تقدري تستمتعي بالحركة والرقص طول الفرح.
فاتأكدي من الأول من طول الفستان عشان تقدري تختاري جزمة مريحة تقدري تتحركي فيها براحتك.
نصايح لتجربة الفستان والتأكد منه:
كتير من العرايس مبيعرفوش يتحركوا في فرحهم عشان مش متعودين على الفستان وده بيخليهم متوترين طول الوقت.
لكن السر الحقيقي اللي يخليكي مرتاحة في مقاس فستان العروسة ويحافظ على جمال مظهرك فيه هو إنك تحافظي على وضعية مريحة في وقوفك وحركتك.
كمان إنك تميلي براسك شوية وانت واقفة ده يديكي مظهر أرفع، لكن من غير ما ترجعي كتافك لورا كتير؛ لإن ده هيخلي وشك يبان أكبر.
وفي النهاية نتمنى إننا نكون قدمنا لك نصايح مفيدة تقدري تستغليها وانت بتدوري على مقاس فستان العروسة المناسب ليكي في يومك المميز.
ونتمنى إنك تظهري بأحلى صورة في فرحك اللي يفضل ذكرى مميزة لبداية أحلى أيام حياتك مع شريكك فيها.
هل محتوى المقال دة كان مفيد بالنسبة لك؟
نعم، مفيد!لا!
