كيفية التحكم بميزانية الزواج لتجنب الديون

الجواز مرحلة من أهم مراحل حياتنا. ولحظات ما بيحصل بتكون أهم لحظة، وأكتر لحظة بنفتكرها طول العمر. عشان كدا كلنا بنهتم بتجهيز الفرح، والتخطيط لكل تفصيلة فيه، وبنحاول أن يكون الفرح محصلش شبهه، لكن أحياناً بتكون نتيجة الرغبات دي كارثية، ودا لأنها بتوقعنا في فخ الديون، عشان نقدر ندفع تكاليف التجهيزات المبالغ فيها، عشان كدا لازم نعرف أن التحكم بميزانية الزواج مش قرار بسيط، بلعكس قرار مهم جداً، وليه نتائج إيجابية كتير، وفي المقال ده هنقدم ليكم نصائح عن ميزانية الزواج، وهنساعدكم تتحكموا فيها.

التحكم بميزانية الزواج بطرق مختلفة

للأسف معظمنا بيمشي بمبدأ أنها ليلة العمر. عشان كدا لازم تكون مثالية، وبنربط المثالية بحجم الميزانية، وبنفتكر أن طالما ميزانية الفرح كبيرة هيكون فرح مثالي والعكس صحيح. رغم أن الفرحة واللحظات السعيدة عمرها ما كانت مرتبطة بالفلوس وحجم الرفاهية المتوفر، عشان كدا هنساعدكم بأكتر من طريقة عشان نتمكن من التحكم في ميزانية الزواج.

دور العريس في التخطيط للفرح

1-تحديد الأولويات والاتفاق عليها

معظمنا قبل الزواج بيحاول يكون مثالي في عين الطرف التاني. وهنا بيقرر أنه يوافق على كل طلب، ويحقق كل رغبة أو حلم. حتى لو ده كان على حساب أنه يكون مديون ومضغوط، وهنا بتيجي ضرورة تحديد الأولويات والاتفاق عليها، ودا بيحصل لما بنتفق على أهم التجهيزات واللاوازم الأساسية، وبعد كدا نقرر إيه من الرفاهيات ممكن نضيفه حسب الميزانية، والصراحة هنا مطلوبة من الزوج، والتقدير والفهم مطلوب من الزوجة، وإلا ممكن الحياة الزوجية تنتهي بسبب الديون.

2-وضع ميزانية محددة

قبل ما نقرر أننا ندفع لأي بند خاص بتجهيزات الفرح أو رفاهياته لازم نحط ميزانية لكل بند، وإلا ممكن نكتشف مثلاً أن ميزانية الفرح كلها خلصت مقابل حجز القاعة، وهنا مفيش مفر من الديون، أو تحصل مشاكل بين الطرفين، وأهم نصائح تحديد الميزانية هي:

• كتابة كل بنود التجهيزات ( القاعة – الفستان – تجهيزات العروسة – المصور – الأكل – الهدايا – تكاليف تحركات الزفاف – …)
• نحدد مبلغ معين لكل بند حسب الميزانية، ونتفق مع الطرف التاني على محاولة الإلتزام بيه.
• بلاش نبالغ أوي في التجهيزات والرفاهيات. لأن دا يوم هنفرح فيه ويعدي، فبلاش نضطر نسدد تكلفته فترة طويلة بعد الجواز.
• نحاول أن ميزانية الزواج متعديش ٨٠٪ من ميزانيتنا؛ لأن وارد تحصل ظروف ونضطر ندفع تاني، وبكدا نكون عملنا حسابنا ونبعد عن الديون.

تجهيزات العروسة للفرح

3-البحث ومقارنة البدائل

البحث عن البدائل والمقارنة بينها من أهم طرق التحكم بميزانية الزواج. وللأسف أغلبنا بيدور على القاعة الخمس نجوم، والمصور المشهور الكبير، والطباخ المحترف ومصمم الأزياء الخاص بالمشاهير، وغالباً الدافع هنا بيكون المثالية والتفاخر. لكن دي كلها سلوكيات كارثية؛ لأن مش المهم أن المصور يكون مشهور المهم أنه فاهم يعني إيه ياخد صور حلوة، ومش مهم يكون الطباخ مشهور ومحترف المهم يكون أكله حلو، وفستان الفرح مش شرط ندفع تمنه بالدولار عشان نقتنع أنه حلو، لازم نعرف أن في بدائل كتير بتوفر نفس الجودة لكن بسعر اقل، وبكدا نقدر نتجنب الديون.

4-عدم التساهل في الاقتراض والتركيز على جودة الحياة الزوجية

آخر وأهم نصيحة. هي أننا منتساهلش في الاقتراض. لأن بمجرد ما نستلف أول مرة هنتفاجئ بجبل من الديون. ومرة هتجيب التانية ودا هندفع تمنه بعد الجواز، عشان كدا ياريت نحاول نركز على ما بعد الفرح مش الفرح نفسه. لأن صدقوني لو بدأنا الحياة الزوجية بضغط الديون الوضع مش هيكون لطيف، وهتحصل مشاكل كتير بين الزوجين، وطبعاً محدش هيتدخل لحلها؛ لأن محدش أجبرهم على المبالغة في التكاليف واللجوء للديون.

أفكار لمواجهة صعوبات الزواج في مصر بعد غلاء الأسعار؟

نتيجة التحكم بميزانية الزواج أو عدمه

بسبب الثقافة وعادات المجتمع الغلط بنخلط بين تخطيط الميزانية وبين البخل. ومش بنقدر نفرق بين البخيل والحريص، عشان كدا نحاول منقعش في فخ البخل، إحنا هدفنا من النصايح دي هو تجنب الديون مش تجنب الإنفاق، ولازم نعرف أن وارد تحصل خلافات، لكن خلافات ممكن نحلها، أحسن من حياة بتخنقها الديون والضغوط بعد الجواز، ولازم نعرف أن أثر الديون بعد الجواز صعب، وهو:

• ضغط التفكير: بعد ما تنتهي الأيام الأولى من الجواز. هيبدأ ضغط التفكير في الديون يظهر، ووقتها الندم مش هينفع. عشان كدا لازم نخطط.
• التأثير العاطفي: أول الجواز هو أنسب فترة للاستمتاع والحب. ودا مستحيل يحصل لو في ديون والتزامات متراكمة علينا ومضطرين نتعامل معاها.
• الخلافات: أي ضغط بنتعرض ليه بيخلينا مش قادرين نتحمل، وهنا مع أي تصرف بسيط هيحصل خلاف بين الزوجين.
• تأجيل الخطط: الوعود والأحلام والخطط صعب يكون ليها مكان في حياتنا طالما الديون موجودة، وهنا هنقرر نتنازل عنها، أو نأجلها لحد ما يكون الوقت مش مناسب أنها تتحقق، فبلاش ندمر حياتنا.