قائمة تجهيزات العروسة قبل الفرح

من أول الخطوبة لحد الفرح تجهيزات العروسة مش بتخلص، عشان كدا هنقولك على قائمة تجهيزات العروسة قبل الفرح واللي هتساعدك تكوني مرتبة كل أمورك عشان مفيش حاجة تبقى ناقصة وتضيع عليكي فرحتك. كل التفاصيل بداية من اختيار الفستان والعناية بالبشرة والشعر وتجهيزات الفرش والشقة هنرتبهالك.

قائمة تجهيزات العروسة الخاصة بالشقة

من أكثر التفاصيل اللي العروسة بتركز فيها بداية من الخطوبة هي تجهيزات الشقة. وإن كل ركن فيها يكون زي ما بتحلم بيه عشان ترتاح فيها. عشان كدا هنقولك ترتبي قائمة تجهيزات الشقة إزاي.

أولًا: أثاث الشقة

فعليًا بيكون الأثاث على العريس لكن طبعًا ليكي دور في اختيار الألوان والتصاميم. فحددي إنتي هتجيبي أيه الأول، يعني لو غرفة نوم، غرفة معيشة، غرفة استقبال، غرفة أطفال، سواء تحديد التصميم أو اللون أو الخامة. حددي كل الأمور دي بالاتفاق مع العريس وسجليها في قائمة تجهيزات العروسة الخاصة بالشقة.

ثانيًا: الأجهزة الكهربائية

في نفس قائمة تجهيزات الشقة هتكتبي الأجهزة الكهربائية اللي المفروض هتحتاجيها.

زي الثلاجة، الغسالة، البوتاجاز، الميكروويف، الخلاط، الكبة، والمكواة.

ثالثًا: أدوات المطبخ

ودي قائمة طويلة جدًا، وتعتبر من أطول حاجة في قائمة تجهيزات العروسة قبل الفرح. تركزي فيها على كل احتياجاتك، نقطة بنقطة، مثلًا تبدأي بأدوات السفرة، وأطقم التقديم، وبلاستيك المطبخ والحمام، وأطقم الحلل، وأطقم الكاسات، وكل نقطة تحددي فيها محتاجة كام قطعة.

رابعًا: ديكورات الشقة

ودي تشمل كل الحاجات اللي بتغير في شكل الشقة وتحسن مظهرها من ستائر، سجاد، لوحات على الحائط، نجف، فازات، شموع.

قائمة تجهيزات العروسة الخاصة بالملابس

تاني حاجة من تجهيزات العروسة اللي بتاخد وقت طويل وبتبدأ تشتري فيها من بعد الخطوبة لحد آخر يوم قبل الفرح هي الملابس، وعشان متنسيش حاجة هنرتبها حسب كل قسم:

1. ملابس الخروج: حددي محتاجة كم طقم كاجوال للخروج صيفي وشتوي. وكم طاقم كلاسيك للمناسبات أو الشغل برضو صيفي وشتوي. وحددي الألوان الأساسية أو الألوان اللي محتاجة تجيبي منها قطعة واحدة على الأقل.
2. الملابس اليومية: ودي ملابس البيت الصيفية والشتوية، تحددي برضو محتاجة كم قطعة، سواء بيجامات، أو فساتين حسب اللي بترتاحي في لبسه.
3. الملابس الداخلية: ودي تشمل كل الداخلي من قطنيات، وكمان اللانجيري. وإنتي بتحددي محتاجة كم قطعة شوفي هتشتري منين عشان متحتاريش. يعني مثلًا هتشتري من مكان جملة، أو هتشتري أون لاين.
4. الأحذية والشنط: غالبًا دي هتكون آخر حاجة تشتريها، لإنها هتتحدد بناءً على ملابس الخروج. لكن كمان دي هتكون فيها شباشب وشوزات لطيفة للشقة.

قائمة تجهيزات العروسة الخاصة بفستان الفرح

لحظة اختيار فستان الفرح غالبًا بتكون من أصعب اللحظات على العروسة، عشان كدا هنوضح في قائمة تجهيزات العروسة كل التفاصيل اللي هتحتاجي تركزي فيها يوم اختيار فستانك:

• اختيار الفستان: ابدأي بدري اتفرجي على موديلات مختلفة أون لاين، لحد ما تلاقي الموديل المناسب ليكي. وروحي محلات فساتين بتوفر الموديلات دي بحيث يكون قدامك اختيارات كتير وكلها مناسبة ليكي.
• اكسسوارات الفستان: زي التاج أو الهيد بيس، وطرحة الفستان، والجزمة، والاكسسوارات اللي هتلبسيها مع الفستان.
• بروفات قبل الفرح: هتحتاجي تروحي تقيسي الفستان قبل الفرح وتتأكدي إنه مظبوط عليكي أو لو محتاج تعديل يتظبط. 

قائمة تجهيزات العروسة الخاصة بالعناية بالبشرة والشعر

مرحلة العناية بالبشرة والشعر بتبدأ بدري من قبل الخطوبة أصلًا. لكن بما إن وصلنا لمرحلة الفرح هنهتم بيهم بشكل مكثف:

• العناية بالبشرة: ودي تشمل جلسات التنظيف، والترطيب المستمر، والماسكات الطبيعية.
• العناية بالشعر: باستخدام زيوت طبيعية، وجلسات تقوية الشعر، وترطيب مستمر، وتعطير عشان يحافظ على ريحته لطيفة ومنعشة.
• العناية بالجسم: ودا يشمل جلسات تنظيف عميق للجسم أو حمام مغربي مكثف. وبرضو يدخل فيها العناية بالأظافر سواء بنفسك لو شاطرة في الاهتمام بيها، أو صالون تجميل متخصص في العناية بالأظافر.

وأخيرًا من أهم نقاط في قائمة تجهيزات العروسة قبل الفرح إنك تهتمي بحالتك النفسية بالأساس. تحاولي تكون أعصابك هادية، وتنظمي وقت نومك وعدد ساعات نوم كافية، عشان يوم فرح تبقي أجمل عروسة.

اقرأ أيضًا: فلل للأفراح في القاهرة إزاي تختارو الأنسب ليكم.
اقرأ أيضًا: رفايع في جهاز العروسة لا غنى عنها.