فرقة ولا دي جيه تختار أنهي في فرحك؟

فرقة ولا دي جيه ده سؤال ممكن يتردد في دماغك وانت بتقرر نوع الموسيقى اللي هتختارها في فرحك.

عموماً الموسيقى هي اللي هتحدد أجواء يومك المميز.

وعشان كدة بيكمن السر في إنك تلاقي نوع الترفيه اللي يناسب احتياجاتك وذوقك ورغباتك وكمان يتوافق مع ميزانيتك.

أول خطوة ممكن تعملها في الموضوع ده إنك تقعد مع عروستك أو أهلها وأهلك خصوصاً لو هيشاركوا في ميزانية الفرح.

وتقدروا تعملوا مناقشة صريحة بينكم عن اختياراتكم وذوقكم لنوع الموسيقى اللي حابين انها تتعزف في الفرح.

والمناقشة دي هتساعدكم في تحديد ما إذا كانت الفرقة الموسيقية ولا الدي جيه هو الأنسب ليكم في فرحكم.

وفي المقال ده احنا هنحاول نوضح لكم أهم الجوانب اللي المفروض تناقشوها وانتم بتحددوا خياراتكم.

فتابعوا معانا المقال.

تحديد الميزانية هيساعدكم في انكم تختاروا فرقة ولا دي جيه:

غالباً بتكون الفرقة الموسيقية تكلفتها أعلى من الدي جيه.

وده لإن بطبيعة الحال عدد الأشخاص في الفرقة بيكون أكبر والمعدات اللي بيستخدموها بتكون أكتر.

وعشان كدة لازم تراجع ميزانيتك كويس، وتشوف إيه المبلغ اللي تقدر تصرفه على بند الموسيقى بس لوحده.

ولو كانت ميزانيتك متسمحش بإنك تأجر الفرقة الموسيقية طول الفرح، وفي نفس الوقت حابب جداً فكرة إن الفرقة تعزف في فرحك.

فتقدر تتحايل على الموضوع بإنك تجيب الفرقة في فقرة واحدة وبقية الفرح يكون معتمد على الدي جيه عادي.

زي إن الفرقة تيجي تعزف في فقرة دخولكم القاعة أو الرقصة الأولى بينكم، أو تعزف في فترة استراحة الأكل في وسط الفرح بس.

نوع أجواء الفرح هيحدد إختياراتك:

من الحاجات اللي محتاج تحددها وتعرفها قبل ما تقرر تختار فرقة ولا دي جيه في فرحك، هي إنك تكون عارف ومحدد نوع حفلة زفافك بالظبط.

هل الحفلة هتبقى عبارة عن حفلة عشا صغيرة للعيلة والأصدقاء المقربين بس ولا حفلة ضخمة كبيرة؟

هل المعازيم هيكون عددهم كبير وعايزين هيصة كبيرة، ولا هتبقى الأجواء الأفضل انها تكون هادية والأهل والصحاب يقعدوا يدردشوا مع بعض خلال الفرح؟

إجابات الأسئلة دي هتساعدك في تحديد خياراتك، وانك تختار نوع الفرقة أو الدي جيه المناسب ليك.

فمثلاً فرق الموسيقى الوترية هتكون أنسب في خلق أجواء رومانسية في حفلات العشا الصغيرة.

وفي أي نوع موسيقى الفرق بتوفر نوع من الترفيه والتسلية للضيوف اللي مبيحبوش يقوموا يرقصوا.

أما بالنسبة للدي جيه فهو يقدر يوفر أي نوع موسيقى تفضله ويرضي جميع الأذواق ويخلق جو احتفالي مع أي أغاني تطلبوها ويقدر يوفرها على طول.

وده بعكس فرق الموسيقى الحية اللي عندها جدول معين من الأغاني اللي متدربين عليها وميقدروش يخرجوا عنها بسهولة.

فميقدروش يعزفوا أي حاجة تطلب منهم من غير ما يكونوا مستعدين لها، ولكن برضه نقطة لصالحهم إنهم يقدروا يضيفوا لمسة خاصة بيهم على الأغنية.

وده بإنهم يضيفوا إدائهم الخاص عليها بعكس الدي جيه اللي بيشغل أغاني مسجلة مفيهاش جديد أو اختلاف إلا بتشكيلته هو.

فرقة ولا دي جيه أنهي منهم هيكون مناسب أكتر للمكان:

عادة الفرقة الموسيقية بتحتاج مكان أكبر من الدي جيه؛ فعشان كدة لازم تتكلم الأول مع إدارة المكان اللي هتعمل فيه فرحك.

اسألهم إذا كان المكان هيساع لفرقة موسيقية ولا لا؟ وكمان ممكن تكون فيه ترتيبات معينة هتحتاجها في استخدام الكهرباء.

خصوصاً إن فيه آلات موسيقية كتير بتحتاج كهرباء منفصلة وتوصيلات معينة في حين أغلب القاعات بتكون مجهزة بوصلات الدي جيه من الأساس.

وأكيد آخر حاجة ممكن تحتاجها في يوم زي ده هي إن الكهرباء تفصل منكم وانتم في رقصتكم الأولى مثلاً.

وعشان كدة لازم تكون عارف الإمكانيات المتاحة في المكان عشان تقدر تحدد على أساسها أنهي هيكون الأنسب ليك إنك تختار فرقة ولا دي جيه؟

أسئلة محتاج إجابتها من الفرقة أو الدي جيه اللي هتختاره قبل ما تتفق معاه:

بعد ما تحصر خياراتك في نوعية معينة من الموسيقيين اللي هتجيبهم في فرحك فانت محتاج تقابل اللي من المحتمل تتعاقد معاهم عشان تقدر تحدد بشكل نهائي هتختار مين؟

وفي المقابلة دي هتحتاج تطرح عليهم أسئلة محددة إجابتهم عليها هي اللي هتخليك قادر تاخد قرارك النهائي.

الأسئلة دي ممكن تتمثل في: هل هتكون متاح في تاريخ فرحي؟ وده لإن أغلب اللي بيشتغلوا في مجال موسيقى الأفراح بيكونوا محجوزين من قبلها بست شهور أو أكتر.

وكمان لازم تسأل عن أجرهم لو هيعزفوا طول ساعات الفرح أو لو لمدة محددة في فقرة معينة خلال الفرح.

وكمان تحط احتمالية إن الفرح يمكن ياخد وقت إضافي ساعتها ايه الأجر اللي ممكن يطلبوه مقابل الوقت الإضافي ده؟

سواء هتختار فرقة ولا دي جيه اسأل عن الأغاني المهمة اللي انت عايزها، هل متاحة عندهم، ولو مش موجودة هل يقدروا يوفروها أو يتعلموا عزفها قبل الفرح؟

وبعد ما تحدد كل الأسئلة المهمة اللي حابب تستفسر عنها وتاخد إجابتها وتستقر على الموسيقيين اللي هتتعاقد معاهم.

جه دلوقتي وقت مضي العقد؛ فلازم تكون متأكد إن كل النقط المهمة واضحة فيه زي ميعاد عزف الفرقة أو الدي جيه.

عدد الساعات أو المدة اللي هيعزفوا فيها وأوقات الاستراحة، شروط الدفع، مبلغ العربون وامتى بيتدفع؟

وهل هتتحمل أي تكاليف إضافية زي تكاليف التنقل أو السفر والإقامة والأكل والشرب، وايه سياسة الاسترداد، وامتى ميعاد دفع باقي المستحقات النهائية؟

وفي نهاية المقال نتمنى اننا نكون قدمنا لك معلومات مفيدة تقدر تساعدك وتستخدمها في تحديد اختيارك فرقة ولا دي جيه في فرحك.

ونتمنى لكم فرح سعيد مليان بهجة وأغاني واحتفالات تدوم ذكراها معاكم للأبد وتكون بداية لحياة زوجية فرحها مبينتهيش.